تهران کې د طالبانو حکومت سفارت تایید کړه چې ۱۸ کلن افغان ځوان امیر طاها رضایي، چې مړی یې په ایران کې د دماوند په سیمه کې موندل شوی و، د دوه ایراني اتباعو له لوري وژل شوی دی.
سفارت ویلي، چې د طالبانو حکومت سفیر دا موضوع له ایراني چارواکو سره شریکه کړې.
دوی ټینګار کوي، چې د پېښې عاملین باید له قانوني جزا سره مخ شي.
د یادونې ده، چې د هغه د وژل کېدو په تړاو یو تن نیول شوی وو، چې پر خپل جرم یې اعتراف هم کړی.
د پاکستان د کورنیو چارو وزیر محسن نقوي او د افغانستان په چارو کې د دې هېواد ځانګړی استازی محمد صادق خان د یو پلاوي په مشرۍ کابل ته رسیدلي دي.
د طالبانو حکومت د کورنیو چارو وزارت لومړي مرستیال محمد نبي عمري د حامد کرزي په نړیوال هوایي ډګر کې د پاکستاني پلاوي هرکلی وکړ.
ویل کیږي چې د نقوي د سفر موخه، دوه اړخیزې اړیکې، افغان کډوال او د ټيټيپي اړوند مسایلو خبرې اترې ښودل شوي.
یوه طالب چارواکي حماسه میډیا ته وویل، چې تر هغه چې یو باصلاحیته پاکستاني پلاوی د ستونزو هوارۍ په موخه سفر ونه کړي په دې ډول نمایشي سفرونو ستونزې نه حل کیږي.
دا په روانه اونۍ کې دوهم پاکستاني لوړپوړی پلاوی دی چې کابل ته سفر کوي.
د ازموینې د ملي ادارې مشر عبدالباقي حقاني کابل کې د یوې غونډې پرمهال د کانکور عمومي اول نمره اعلان کړ.
ښاغلي حقاني، سید موسی د سید داود سادات زوی د ۳۵۶ نمرو په اخیستو د کانکور عمومي اول نمره اعلان کړ.
حقاني په ترتیب سره محمد طاهر د محمد نذیر زوی دوهم نمره او حمزه د عبدالطیف زوی دریم نمره اعلان کړ.
نوموړي وویل چې د تیر کال په پرتله ۲۰ زره ډېرو زده کوونکو په کانکور کې ګډون کړی وو.
هغه وویل چې یولک پنځه سوه اته څلویښت کسانو ګډون کړی وو، چې د لوړو زده کړو وزارت یوازې د یو لک کسانو د جذب وړتیا لري.
د ایران د بهرنیو چارو وزارت د خراسان رضوي د استازولۍ مشر احمد معصوميفر اعلان کړی چې د افغان کډوالو د وتلو مهلت د سنبلې تر ۱۵پورې تمدید شوی دی.
نوموړي ویلي، که له دې نېټې وروسته بېاسناده افغانان له هېواده ونه وځي، د اقامت جریمه به پرې ولګول شي.
د نوموړي په وینا، د تمدید دلیل د هوا تودوالی او د لازم زیربناوو نه شتون دی.
دا په داسې حال کې ده، چې ایران په دې وروستیو کې سلګونه زره افغان کډوال را اېستلي دي.
د پاکستان رسنۍ خبر ورکوي چې د دغه هېواد د کورنیو چارو وزیر، محسن نقوي، د یکشنبې په ورځ، د چنګاښ ۲۹مه، کابل ته سفر کوي.
د راپورونو له مخې، دا به د نوموړي یو ورځنی سفر وي، چې په ترڅ کې به د طالبانو حکومت له مشرانو، په ځانګړي ډول د دوی د کورنیو چارو له وزیر سراجالدین حقاني سره وویني.
د طالبانو حکومت تر اوسه د دې سفر په اړه څه نهدي ویلي.
دا د محسن نقوي لومړی سفر دی چې د طالبانو حکومت تر واکمنۍ لاندې افغانستان ته کوي.
د سعودي عربستان شهزاده الولید بن خالد بن طلال بن عبدالعزیز، چې شل کاله په کوما کې و، نن مړ شو.
هغه په ۲۰۰۵ کال کې د یوې ټرافیکي پېښې وروسته کوما ته تللی و او په دې موده کې ورته «شهزاده ویده» نوم ورکړل شوی و.
د هغه د جنازې لمونځ به د دوشنبې په ورځ د ماسپښین وروسته په امام ترکی بن عبدالله جومات کې ترسره شي.
د امریکا د بهرنیو چارو وزیر مارکو روبیو ویلي چې په تېرو درې ورځو کې یې هېواد د اسرائیل، اردن او دمشق چارواکو سره د سوریې د سویل د وروستیو «وېرونکو او خطرناکو» پېښو په اړه نږدې همکاري کړې ده.
هغه ټینګار وکړ چې د سوریې حکومت باید د جنایتونو عاملین، د قانون منګولو ته وسپاري.
د یادونې ده، چې سوریه وروستیو ورځو کې د سختو نښتو شاهده وه.
د طالبانو حکومت د حوادثو د چمتووالي ادارې مشر نورالدین ترابي د نړيوالې ټولنې په هغو شرطونو انتقاد کړی چې د طالبانو د حکومت پېژندنه يې د ښځو د زده کړو، کار او د پراخ بنسټه حکومت جوړولو پورې تړلې ده.
نوموړي ویلي، ټول شرایط یې پوره کړي او اوس باید په رسمیت وپېژندل شي.
ترابي ټینګار کړی چې طالبان په حکومت کې د بېلابېلو قومونو استازي لري او خپل حکومت پراخ بنسټ ګڼي.
هغه ويلي، د ښځو د زده کړو، کار، د ترهګرۍ او نشهيي موادو پر ضد مبارزه د افغانستان داخلي چارې دي او بهرني هېوادونه دې پکې مداخله نه کوي.
ترابي دغه راز زیاته کړې، چې لویدیځ یې قانع کړی؛ ترڅو دوی په رسیمیت وپېژني.
نړۍوالې رسنۍ د مرسي کورپس نادولتي سازمان د راپور له مخې وایي، ښايي کابل د نړۍ لومړۍ پلازمېنه شي چې له سخت اوبو کمښت سره مخ او بشپړه وچه شي.
راپورونه څرګندوي چې د نفوس ډېرښت، د سرچینو کمېدل او د اوبو ناسم مدیریت د دې ښار لپاره ستر ګواښونه جوړ کړي دي.
د راپورونو له مخې، تېرو درې لسیزو کې د کابل د ځمکې لاندې اوبو کچه تر ۳۰ مترو را ټیټه شوې، چې دا به نه یوازې د خلکو ژوند ته ګواښ وي، بلکې اقتصادي اغېزې به هم ولري.
رویټرز خبري اژانس راپور ورکړی چې د سوریې په سوېدا ښار کې، چې ډېری اوسېدونکي یې دروزیان دي، د شنبې پر ورځ نښتې سختې شوې دي.
رویټرز زیاتوي چې د احمد الشرع تر مشرۍ لاندې حکومت هڅه کوي چې اوربند ټینګ کړي، خو جګړه لا هم دوام لري.
د رویټرز خبریالان وايي، د ښار له منځه د درنو وسلو ډزې اورېدل شوي او د هاوان ګولۍ د شاوخوا کلیو پر لور توغول شوې دي.
د تلفاتو کره شمېر تر اوسه نهدی څرګند.