د بشر حقونو سازمان «حال‌وش» راپور ورکړی چې د ایران په سراوان کې د سپاه پاسداران د یو عملیاتي ټیم لږ تر لږه ۱۰ غړي د وسله‌والو په برید کې وژل شوي او ۲ نور ټپیان دي.

راپور وایي، وژل شوي کسان د ایران، افغانستان او پاکستان اتباع وو، او دا برید د شنبې سهار د سپاه قدس سیمه‌ییزې قرارګاه پورې اړوند ټیم باندې شوی.

د راپور له مخې، لږ تر لږه پنځه وژل شوي افغانان دي، او یو افغان او دوه پاکستانیان ټپیان شوي دي.

حال‌وش ادعا کړې چې دا کسان له پخوا افغان نظامیان وو، چې د طالبانو له واکمنېدو وروسته ایران او پاکستان ته تللي او سپاه د مخالفینو پر ضد کارولي.

تر اوسه هیڅ ډلې د برید مسؤلیت نه دی منلی؛ خو د سراوان سیمه ډېری وخت د جیش العدل او نورو بلوڅو وسله‌والو د بریدونو شاهد وي.

د ډیلي میل ورځپاڼې د راپور له مخې، وروسته له دې چې د طالبانو لاس ته د شاوخوا ۱۹،۰۰۰ هغو افغانانو معلومات ورغلي چې له بریتانوي ځواکونو سره یې همکاري کړې او د پناه غوښتنې غوښتنه یې کړې وه، په تېرو څو ورځو کې لږ تر لږه ۱۰ کسان د طالبانو له لوري وژل شوي دي.

په دې وژل شویو کې څلور کسان په بدخشان کې په ډله‌ییزه توګه اعدام شوي او څلور نور بیا له ایران څخه د جبري بیرته ستنیدو وروسته وژل شوي دي.

ویل کېږي چې دا کسان ښایي د افغان ځانګړو ځواکونو پخواني غړي وي چې د طالبانو حکومت پر وړاندې یې د بریتانوي ځواکونو ملاتړ کاوه.

د اسراییل د لومړي وزیر دفتر اعلان وکړ چې بنیامین نتانیاهو د خوړو له مسمومیت سره مخ شوی او په راتلونکو درې ورځو کې به خپلې دندې له کور څخه ترسره کړي.

دفتر وايي چې د هغه روغتیایي وضعیت په ښه کېدو دی.

۷۵ کلن نتنیاهو د خرابو خوړو له امله د کولمو له التهاب او د بدن د اوبو له کمښت سره مخ شوی.

د یادونې ده، چې نتنیاهو تر دې وړاندې هم سالم روغتیايي حالت نه درلود.

خراسان ډایري وایي، د افغانستان په شمال بدخشان ولایت کې د سرو زرو په کان اخ و ډب کې د څلورو چنایانو په ګډون ۸ تنه وژل شوي دي.

دغې رسنۍ لیکلي چې یاده پیښه د بدخشان د شهر بزرګ ولسوالۍ د سرو زرو په یو کان د شخړې له امله رامنځته شوې.

د بدخشان سیمه ایز چارواکي پیښه تایید کړې خو د پیښې د څرنګوالي په اړه یې څه نه دي ویلي.

روسي رسنۍ وایي، طالب ځواکونو د هیواد په شمال کندز ولایت کې یو روسي څیړونکی نیولی او د پوښتنو ګرویږونو لپاره یې منتقل کړی دی.

‏یادې رسنۍ ویلي چې سویاتوسلاو کاورین نومیږي او روسي کلتور پیژندونکی دی چې د روسیې د علومو اکاډمۍ د ختیځ پیژندنې اسنټیتوت او لرغونې قوم پیژندنې مرکز سره کار کوي.

د افغانستان لپاره د پاکستان ځانګړی استازی محمد صادق وايي، د پاکستان د کورنیو چارو وزیر محسن نقوي او د طالبانو حکومت د کورنیو چارو وزیر سراج‌الدین حقاني د ترهګرۍ پر ضد د مبارزې په برخه کې هوکړه کړې ده.

محمد صادق په خپله ټویټر پاڼه کې ویلي چې دواړو غاړو د ترهګرۍ په اړه مفصلې خبرې کړې دي او د ګډې همکارۍ لپاره یې ژمنه کړې ده.

د طالبانو حکومت د کورنیو چارو وزارت هم ویلي چې دواړو خواوو د نشه یي توکو پر ضد مبارزې او امنیت د ټینګښت په اړه خبرې کړي دي.

د یادونې ده، چې دواړو لوریو تېره ورځ ناوخته دا لیدنه ترسره کړې وه.

بلوچستان کې د ځمکې پر سر شخړه شوې، چې له امله یې دواړو لورویو ته مرګ ژوبله اوښتې.

له سیمې څخه سرچینې وايي، چې په دغه پېښه کې لس تنه مړه او پنځلس نور ټپيان دي.

د سرچینې د معلوماتو له مخې، قومي مخورو د شخړې د زیاتېدو د مخنیوي هڅې پیل کړې دي.

‏د غزې روغتیا وزارت خبر ورکوي چې د اسراییلي ځواکونو په ډزو کې لږترلږه ۶۷ فلسطینیان وژل شوي دي.

دغه پېښه هغه مهال رامنځته شوه چې خلک په شمالي غزه کې د ملګرو ملتونو مرستو ته انتظار وو.

اسراییلو په دغو سیمو کې د بې ځایه شویو خلکو د ایستلو نوې هدایتونه هم صادر کړي دي.

د یادونې ده، چې په دغه برید کې ګڼ شمېر نور کسان ټپیان شوي دي.

د طالبانو حکومت په یوې خپرې کړې اعلامیه کې د فلسطین په غزه کې د ښځو او ماشومانو پر ضد د اسرائيلي ځواکونو دوامداره بمبارۍ، لوږې، تندې، ناروغیو او کلابندۍ ته سخت غبرګون ښودلی دی.

اعلامیه کې راغلي چې «اسلامي امارت» دغه ظلمونه په کلکو ټکو غندي او دا یې له انساني، اسلامي او نړیوالو اصولو سره ښکاره تضاد بللی دی.

د طالبانو حکومت له اسلامي هېوادونو، مسلمانو ملتونو او ټولو مؤثرو نړیوالو اړخونو غوښتنه کړې چې د غزې مظلومو خلکو، په ځانګړې توګه ښځو او ماشومانو ته د بېړنیو بشري مرستو د رسېدو لپاره عاجل اقدام وکړي.

په اعلامیه کې خبرداری ورکړل شوی چې که نړیوال او اسلامي امت په دې برخه کې بې‌پروایي وکړي، نو د الله تعالی له سخت عذاب سره به مخ شي.

د طالبانو حکومت د کورنیو چارو سرپرست وزیر خلیفه سراج‌الدین حقاني د پاکستان د کورنیو چارو له وزیر سید محسن نقوي او مل پلاوي سره وکتل.

په دې لیدنه کې دواړو خواوو د همکاریو پر پراخولو، امنیت، نشه‌يي توکو ضد مبارزې، او افغان کډوالو ته د آسانتیاوو پر برابرولو ټینګار وکړ.

حقاني د باور فضا د ستونزو د حل کلیدي وبلله او زیاته یې کړه، چې ستونزې باید د خبرو له لارې حل شي.

په ورته مهال بیا نقوي ژمنه وکړه چې سوداګرو او خلکو ته به آسانتیاوې برابروي او ګډ کار ته به دوام ورکوي.