د ملي روغې جوړې عالي شورا پخواني مشر عبدالله عبدالله پر ایران د امریکا هوايي بریدونه “غیر انساني” بللي او ویلي یې دي چې دا عمل د نړیوالو قوانینو خلاف دی.
هغه ویلي، چې اسراییلو په جګړه کې د امریکا په ښکېلولو سره د ایران پر “سوله یيزو” اټومي تاسیساتو برید کړی دی.
نوموړي زیاته کړې، دا بریدونه د اسرائیلو له خوا پلان شوي، چې امریکا یې جګړې ته کش کړې ده.
عبدالله خبرداری ورکړی چې دا ډول کړنې نه یوازې د خبرو اترو بهیر ته زیان رسوي، بلکې د سیمې د بېثباتۍ سبب هم کېدای شي.
یوه امریکایي چارواکي رویټرز ته ویلي، چې د ایران پر اټومي تاسیساتو د نننیو بریدونو لپاره (B-2) بمغورځوونکې الوتکې کارول شوې دي.
تر دې وړاندې هم رویټرز راپور ورکړی و، چې دغه درنې بمغورځوونکې الوتکې د لېږد په حال کې دي او د برید لپاره چمتو شوې دي.
د یادونې ده، چې امریکا تېره ورځ شپږ دغه الوتکې ګوام ټاپو ته استولې وې.
د امریکا ولسمشر ډونالډ ټرمپ خبرداری ورکړی چې که ایران سوله و نه کړي؛ نو راتلونکي بریدونه به تر دې هم سخت وي.
هغه دا څرګندونې د ایران پر اټومي تاسیساتو تر برید وروسته په وینا کې کړې او ادعا یې کړې چې د ایران اټومي تاسیسات یې په بشپړ ډول له منځه وړي دي.
ایراني چارواکو ویلي، چې تر برید مخکې یې اټومي مرکزونه تخلیه کړي و.
نړۍوالې رسنۍ وایي، د امریکا ولسمشر ډونالډ ټرمپ د ایران پر اټومي تاسیساتو تر برید وروسته د اسراییل له لومړي وزیر بنیامین نتنیاهو سره ټیلیفوني خبرې کړې دي.
تر اوسه د دغو خبرو جزیات نه دي رسنیز شوي.
بل لورته بیا ټرمپ ویلي، چې فردو اډه یې په بشپړ ډول له منځه وړې.
د ایران د اټومي انرژۍ سازمان ویلي، د امریکا له بریدونو سره سره به د اټومي پروګرام پرمختګ ته دوام ورکړي.
په یوه اعلامیه کې دغه سازمان ویلي، چې امریکا په فردو، نطنز او اصفهان کې پر اټومي تاسیساتو “وحشي او د نړۍوالو قوانینو خلاف” بریدونه کړي دي.
ایران دا بریدونه د اټومي وسلو د نه خپراوي د تړون خلاف بللي او ټینګار یې کړی چې د حقوقي تعقیب په ګډون به لازم اقدامات وکړي.
د سعودي عربستان د هستوي مقرراتو اداره وایي، د امریکا له برید وروسته په سیمه کې هېڅ رادیواکتیفي تشعشع نهده ثبت شوې.
امریکا د یکشنبې سهار د ایران درې هستوي مرکزونه، نطنز، فردو او اصفهان بمبار کړي دي.
د امریکا ولسمشر ډونالډ ټرمپ ویلي، د ایران هستوي ظرفیت «په بشپړ ډول له منځه وړل شوی» او زیاته کړې یې ده چې ایران باید غبرګون و نه ښيي.
نوموړي د برید ستاینه کړې او ویلي یې دي چې له پوځ سره یې تر ټولو غوره ټیم کار کړی.
د ملګرو ملتونو سرمنشي انتونیو ګوتریش پر ایران د امریکا د وروستیو بریدونو په غبرګون کې اندېښنه څرګنده کړې او دا یې «دتاوتریخوالي خطرناک زیاتوالی» بللی دی.
نوموړي خبرداری ورکړی چې شونتیا شته جګړه له کنټروله ووځي، چې پایله به یې د ملکي وګړو، سیمې او نړیوالو لپاره زیانمنه وي.
ګوتریش له غړو هېوادونو غوښتي چې د ملګرو ملتونو د منشور او نړیوالو قوانینو پر بنسټ ترینګلتیا راکمه کړي.
د امریکا ولسمشر ډونالډ ټرمپ د ایران د اټومي تاسیساتو تر برید وروسته، له خدایه، پوځ او خپلو ملاتړو مننه کړې او د دعا پر مهال یې وویل: «خدایه، زه تاسره مینه لرم.»
ټرمپ زیاته کړه:«زه غواړم له ټولو مننه وکړم، او په ځانګړي ډول له خدایه. یوازې وایم: خدایه، زه تاسره مینه لرم. زه خپل ستر پوځ سره مینه لرم. هغوی وساته. خدایه، منځنی ختیځ وساته. خدایه، اسرائیل وساته. او خدایه، امریکا وساته.»
ټرمپ دا څرګندونې وروسته له هغې وکړې چې د امریکا پوځ د ایران په اصفهان، نطنز او فردو کې د اټومي تاسیساتو د بمبارۍ اعلان وکړ.
د ایران د سپاه پاسداران ځواک ویلي چې د امریکا له خوا د دغه هېواد پر اټومي تاسیساتو تر برید وروسته، «اوس زموږ لپاره جګړه پیل شوې ده.»
دا څرګندونې وروسته له هغې شوې چې د امریکا ولسمشر ډونالډ ټرمپ د اصفهان، نطنز او فردو په اټومي مرکزونو هوايي بریدونه تایید کړل.
ټرمپ ویلي، دغه بریدونه بریالي وو او خبرداری یې ورکړی چې که ایران سولې ته غاړه کېنږدي؛ نو راتلونکي بریدونه به تر دې سخت وي.
بل لورته د ایران د دولتي ټلویزیون (صدا و سیما) یوه لوړپوړي چارواکي ادعا کړې چې د بریدونو وړاندې ټول حساس اټومي تاسیسات له پرسونله خالي شوي وو او مرکزونو ته هېڅ جدي زیان نه دی رسېدلی.
د امریکا ولسمشر ډونالډ ټرمپ ویلي، چې د ایران د درېیو مهمو اټومي مرکزونو فردو، نطنز او اصفهان هوايي بریدونه شوي او دغه بریدونه بریالي وو.
نوموړي ویلي، امریکايي الوتکې له ایران څخه وتلي دي.
ټرمپ دا څرګندونې پر خپلې ټولنیزې رسنۍ کړې دي او ویلي یې دي چې د نړۍ بل هېڅ پوځ نه شوای کولای دغه ډول عملیات ترسره کړي.
هغه زیاته کړې چې اوس د سولې لپاره مناسب وخت دی.