د متحده عربي اماراتو په ختیځ کې د تیلو د صادراتو فجیره بندر ته نږدې د برید وروسته اور لګیدنه رامنځته شوې.
د راپورونو له مخې د یاد برید د شنډېدو وروسته د بندر د تیلو د بارولو ځینې چارې لنډ مهال لپاره ځنډول شوي.
د اماراتو د رسنیو دفتر ویلي چې توغول شوی توغندی یا ډرون د هوايي دفاع له خوا شنډ شوی او د پېښې له امله هېڅ ډول مرګ ژوبله نه ده رامنځته شوې.
د بلخ پخواني والي عطا محمد نور پر افغان خاوره د پاکستان وروستي پوځي بریدونه په کلکو ټکو غندلي دي او ویلي یې دي چې په دغو بریدونو کې ملکي وګړي زیانمن شوي دي.
نوموړي ویلي، پاکستان د هغو ډلو د ځپلو په پلمه پر افغانستان بریدونه کوي چې پخوا یې خپله ملاتړ کاوه، خو د دغو بریدونو قربانیان عادي افغانان دي.
عطا محمد نور همداراز ټینګار کړی چې د ده په اند د افغانستان اوسنی سیاسي وضعیت او د طالبانو تګلارې هم د دې لامل شوي چې د نورو هېوادونو د مداخلې زمینه برابره شي.
هغه زیاته کړې چې د افغانستان خلک باید د نورو هېوادونو د سیاسي سیالیو قرباني نه شي او هېڅ بهرنی برید چې د ملکي خلکو د مرګژوبلې سبب کېږي د منلو وړ نه دی.
نور همداراز ویلي چې افغانستان او پاکستان باید د متقابل درناوي، ښه ګاونډیتوب او همکارۍ پر بنسټ اړیکې ولري، ځکه د دواړو هېوادونو امنیت او ثبات یو له بل سره تړلی دی.
د طالبانو حکومت د کونړ د اطلاعاتو او کلتور ریاست ویلي، چې د پاکستاني ځواکونو له لوري د دغه ولایت د دانګام ولسوالۍ د مرکزي لېسې ودانۍ په توپونو شوې ده.
د یاد ریاست د اطلاعاتو امر ضیاءالرحمن سپینغر ویلي، په دې پېښه کې چاته ځاني زیان نه دی اوښتی؛ خو د لېسې ودانۍ ته درانه مالي زیانونه رسېدلي دي.
نوموړي زیاته کړې چې دا پېښه د سرحدي تاوتریخوالي په دوام کې رامنځته شوې ده.
د ننګرهار پخوانی والي ضیاءالحق امرخېل د ایران او پاکستان په اړه څرګندونې کړي دي.
نوموړي ویلي چې داسې ښکاري چې ایران به په روانه جګړه کې د خپلو قربانیو په بیه بریا ترلاسه کړي، او که بریا ترلاسه شي، په سیمه کې به لومړۍ او وروستۍ خبره د ایران وي.
هغه دغه راز ویلي چې بل په دې بهیر کې تر ټولو ډېر معنوي او مادي زیان پاکستان ته رسیدلی دی.
د هغه په وینا، پاکستان د سیمهییز سیاست او په ځانګړې توګه د مسلمانانو تر منځ د کرایه يي او اجرتي پوځ په توګه پېژندل شوی، او په نړیواله کچه ورته کوم ځانګړی ارزښت نه ورکول کېږي، یوازې د کرایه يي پوځ په نوم یې پېژني.
د طالبانو حکومت د ملي دفاع وزارت ویلي، د پاکستان د وروستیو بریدونو په غبرګون کې د مشرقي زون اړوند د کونړ او ننګرهار ولایتونو پر پوله د ډیورنډ فرضي کرښې په اوږدو کې افغان دفاعي ځواکونو د پاکستان پر یوې پوځي پوستې برید کړی او هغه یې نیولې ده.
د یاد وزارت د معلوماتو له مخې، په دې عملیاتو کې ۱۴ پاکستاني پوځیان وژل شوي او ۱۱ نور ټپیان دي.
همدارنګه وزارت زیاته کړې، چې یو زرهدار ټانک او یو انټرنیشنل پوځي موټر هم په بشپړ ډول ویجاړ شوي دي.
د کونړ ولایت ځايي چارواکي وایي چې د تېرو ۴۸ ساعتونو په موده کې د پاکستان له لوري د دې ولایت پر بېلابېلو سرحدي ولسوالیو لسګونه توغوندیز او توپچي بریدونه ترسره شوي دي.
د کونړ د اطلاعاتو او کلتور ریاست د معلوماتو له مخې، په دغو بریدونو کې تر ۲۷۰ زیات توغوندي او د توپ مرمۍ توغول شوې دي.
چارواکي زیاتوي چې د بریدونو له امله د استوګنې یو شمېر کورونه او ودانۍ زیانمنې شوې دي.
تر اوسه د دې بریدونو له امله د مرګ ژوبلې راپور نه دی ورکړل شوی، خو د سیمې اوسېدونکي د دوامداره بریدونو له امله له جدي اندېښنو سره مخ دي.
د افغانستان د ولسي جرګې پخوانۍ غړې انارکلي هنریار د پاکستان وروستي هوايي بریدونه پر افغان خاوره په سختو ټکو غندلي دي.
نوموړې ویلي چې په دغو بریدونو کې ملکي وګړي په نښه کېږي او دا عمل د بشریت ضد جنایت او د نړیوالو بشري اصولو خلاف دی.
هنریار زیاته کړې چې پاکستان تل بېدفاع افغانان په نښه کړي او حتی د روژې په مبارکه میاشت کې یې د خلکو عادي ژوند ګډوډ کړی دی.
هغې همداراز ټینګار کړی چې پاکستان تر اوسه د افغانستان لپاره د یوه ښه او باوري ګاونډي په توګه نه دی ثابت شوی.
اسلام اباد کې د طالبانو حکومت پخوانی سفیر مولوي عبدالسلام ضعیف وایي پاکستان باید اوس پوه شوی وي چې د افغانستان له لوري متقابل ځواب ښيي چې د جګړې دوام به په پای کې د پاکستان په زیان تمام شي.
نوموړي ویلي، که تاوتریخوالی همداسې دوام وکړي؛ نو د جګړې لمبې به ورو ورو د پاکستان تر امن دروازو هم ورسېږي او دا به د هغوی لپاره درانه زیانونه ولري.
ضعیف زیاته کړې چې د امریکا د پروژې د ګټو په پرتله به د پاکستان تاوان څو چنده زیات وي او په پای کې به د خپل بادار په خوشحالولو کې هم پاتې راشي.
د امریکا ولسمشر ډونالډ ټرمپ وایي هغه هوکړه چې تهران یې غواړي د منلو وړ نه ده او باید هر ډول احتمالي توافق د امریکا له ملي ګټو او امنیت سره په ټکر کې نه وي.
ټرمپ په خپل پیغام کې د رسنیو پر راپورونو هم نیوکه کړې او ادعا یې کړې چې ځینې رسنۍ د ایران پر وړاندې د امریکا د پوځ د عملیاتو د اغېزو په اړه بشپړ معلومات نه خپروي.
نوموړي ټینګار کړی چې ایران سخت زیانمن شوی او د هوکړې غوښتنه کوي؛ خو د ده په وینا هر ډول راتلونکی توافق باید د امریکا د ګټو له مخې وشي.
الجزیرې خبري شبکې راپور ورکړی چې د امریکا د بهرنیو چارو وزارت د جمعې ناوخته اعلان کړی چې په عمان کې دې له بېړنیو کارکوونکو پرته نور امریکايي دولتي کارکوونکي او د هغوی د کورنیو غړي د امنیتي خطرونو له امله له دغه هېواده ووځي.
بل لور ته د سعودي عربستان د دفاع وزارت ویلي چې د هېواد په شمال کې د الجوف په سیمه کې یې یوه بېپیلوټه الوتکه شنډه او له منځه وړې ده.
تر اوسه څرګنده نه ده چې دغه ډرون د کوم هېواد له لوري توغول شوې وه.