د طالبانو حکومت د سترې محکمې رییس او قاضي‌القضات عبدالحکیم حقاني وايي، د دوی بریا د یووالي له امله ده او په همدې سبب په هېواد کې بې‌ساری نظام او امنیت رامنځته شوی دی.

نوموړي دا څرګندونې د سترې محکمې د نوي اداري مرستیال سخاءالله سعید د معرفت غونډه کې وکړې.

هغه د طالبانو حکومت د مشر شیخ هبت‌الله اخوندزاده اطاعت د الله رضا وبلله.

یاده غونډه کې سخاءالله سعید ویلي، د طالبانو د مشر هر حکم د اصلاح لپاره دی او اطاعت یې پر ځان واجب ګڼي.

نوموړي زیاته کړې، حتی که له دندې لرې شي، خوښ به وي، ځکه شخصي مقام ورته ارزښت نه لري، بلکې هدف یې د اسلامي نظام بقاء ده.

واشنګټن پوسټ په یوه مقاله کې لیکلي چې بګرام ته د امریکا بېرته ستنېدل بده مفکوره نه ده او کولی شي د داعش پر وړاندې د عملیاتو او د چین ترڅنګ د واشنګټن د ستراتیژیک حضور لپاره زمینه برابره کړي.

ورځپاڼې ویلي، د یوې کوچنۍ امریکايي ډلې ستنېدل به د پخواني پراخ حضور په څېر نه وي؛ خو امریکا ته به بیا هم په سیمه کې نفوذ ورکړي.

مقاله زیاتوي چې طالبان د بګرام په بدل کې غوښتنې لري؛ لکه د حکومت رسميت پېژندنه، د ملګرو ملتونو څوکۍ او د کنګل شویو شتمنیو لاسرسی.

واشنګټن پوسټ ټینګار کړی، د طالبانو له واکمنۍ څلور کاله وروسته لا هم نړیوال فشارونه هغوی ته د شاتګ لاره نه ده پرانیستې؛ نو امریکا باید په کابل کې خپل اغېز بېرته پیاوړی کړي.

دا بحث وروسته له هغه تود شوی چې ډونالډ ټرمپ د بګرام د بېرته اخیستو خبره وکړه او د طالبانو حکومت ته یې خبرداری ورکړ چې که اډه امریکا ته ونه سپاري، بدې پایلې به ولري.

د امریکا ولسمشر ډونالډ ټرمپ ویلي، که بګرام هوايي اډه بېرته امریکا ته ونه سپارل شي؛ نو ډېرې بدې پایلې به ولري.

هغه په ټروت سوشیال کې لیکلي:«که افغانستان بګرام هغه هېواد ته ورنه کړي چې جوړ کړی یې دی، متحده ایالاتو ته، نو ډېر بد کارونه به پېښ شي.»

د طالبانو حکومت د هغه د څرګندونو په اړه تر اوسه څه نه دي ویلي.

یو شمېر سرچینو رسنیو ته ویلي، چې د طالبانو حکومت د اوبو او برېښنا وزارت مشاور فاروق اعظم د نجونو د زده کړو په تړاو د خبرو له امله نیولی او ترې غواړي چې د خپلو څرګندونو په بدل کې د طالبانو حکومت له مشر شیخ هبت‌الله اخندزاده بښنه وغواړي.

دغو سرچینو ویلي، فاروق اعظم د طالبانو حکومت غوښتنه رد کړې او ټینګار یې کړی چې د نجونو د تعلیم ملاتړ کوي او که زندان هم وي، د نظر څخه نه ګرځي.

نوموړي په یوه لیک کې هم خپلې کورنۍ ته ویلي چې د ښځو د تعلیم او عصري زده کړو په ملاتړ او د طالبانو پر ځینو پالیسیو د نیوکو له امله نیول شوی دی.

د طالبانو حکومت د اوبو او برېښنا وزارت هم منلې چې د هغه نیونه د «امیرالمومنین» په امر شوې او قضیه یې نظامي محکمې ته سپارل شوې ده.

د طالبانو حکومت د استخباراتو مرستیال تاجمیر جواد ویلي چې که اړتیا وي د خپل نظام د ساتنې لپاره به بیا ځانمرګي بریدونه پیل کړي.

نوموړي دا خبرې د پکتیا ولایت د سیدکرم ولسوالۍ کې د «۲۰ کلن جهاد قربانیانو» د یاد غونډې پر مهال کړي.

جواد ټینګار کړی چې د «اسلامي امارت» نظام د شهیدانو په وینو جوړ شوی او د ساتنې لپاره یې هر ډول قربانۍ ته تیار دي.

هغه د طالبانو د مخالفانو پر ضد د ځانمرګو بریدونو ګواښ هم کړی.

تاجمیر جواد د حقاني شبکې مهم غړی بلل کېږي او پخوا د خونړیو بریدونو طراح ګڼل شوی دی.

د جاپان د بهرنیو چارو وزارت اعلان کړی چې دغه هېواد د افغانستان د ختیځ زلزله‌ځپلو سره د یو میلیون ډالرو مرسته کوي.

یاد وزارت په خپره شوې خبرپاڼه کې ویلي، چې سربېره پر دې، د “جاپان پلاتفورم” په نوم بنسټ هم څه باندې ۱.۳۳ میلیونه ډالر د زلزله‌ځپلو لپاره ځانګړي کړي دي.

د جاپان حکومت وایي، د دوی مرسته به د خوراکي توکو او روغتیایي خدمتونو په برخه کې د نړیوال خوراکي پروګرام (WFP) او د صلیب سرخ او هلال احمر نړیوال فدراسیون له لارې ولګول شي.

د دغو مرستو موخه د هغو کورنیو لاسنیوی دی چې د ختیځ زلزلو له امله زیانمنې شوې دي.

د طالبانو حکومت د بهرنیو چارو وزیر امیرخان متقي ویلي، «اسلامي امارت» د افغانستان پر یو انچ ځمکه هم د بهرني پوځ شتون نه مني او د خپلو جنګیالیو شل کلنې قربانۍ د بهرني حضور د منلو لپاره نه دي ورکړي.

که څه هم دا څرګندونې پخوانۍ دي؛ خو د ټرمپ له هغه خبرو وروسته تازه شوې چې ویلي یې دي له طالبانو سره د بګرام د بېرته ترلاسه کولو په اړه خبرې روانې دي.

ځینې راپورونه ښيي چې د طالبان حکومت د بګرام په بدل کې له امریکا د میاشتې یو میلیارد ډالر غواړي، خو امریکا یوازې ۳۰۰ میلیونه ډالر وړاندیز کړي دي.

د افغان سولې لپاره د امریکا پخواني ځانګړي استازي زلمي خلیل‌زاد ویلي، که د امریکا او طالبانو ترمنځ د بندیانو ستونزه حل شي، ښايي دواړه لوري د بګرام هوايي اډې پر سر هوکړې ته ورسېږي.

نوموړي بګرام د ترهګرۍ ضد مبارزې لپاره مهمه اډه بللې ده.

ولسمشر ټرمپ هم ویلي چې له طالبانو سره د بګرام د بېرته ترلاسه کولو په اړه خبرې روانې دي؛ خو د طالبانو حکومت د امریکا پوځي حضور په افغانستان کې نه مني.

ویل کېږي چې د بندیانو په چارو کې د ټرمپ ځانګړی استازی ادم بولر د دې خبرو مشري کوي؛ خو د طالبانو حکومت د لوړو غوښتنو له امله خبرې بندې شوي دي.

د طالبانو حکومت تر اوسه په ښکاره د دغو خبرو پخلی نه دی کړی.

د پاکستان د بهرنیو چارو وزارت ویاند، شفقت علي خان، وایي چې په افغانستان کې د ترهګرو پټنځایونه د طالبانو او اسلام‌اباد ترمنځ د اړیکو ښه‌والي اصلي خنډ دی.

نوموړي په یوه تازه خبري ناسته کې ویلي: «افغانستان زموږ نږدې ګاونډی دی او موږ له دوی سره د ورورولۍ اړیکې غواړو، خو اصلي خنډ دا دی چې هلته د ترهګرو پټنځایونه شته.»

شفقت علي خان د پاکستان د لومړي وزیر شهباز شریف وروستیو څرګندونو ته په اشارې ویلي چې “طالبان باید یا پاکستان غوره کړي یا تحریک طالبان پاکستان.”

نوموړي زیاته کړې: «د لومړي وزیر پیغام ډېر واضح دی، زه پرې نور څه نه لرم چې ووایم.»

دی وایي، دا پیغام که څه هم یو سیاسي دریځ دید خو د ډیپلوماتیکو لارو له لارې د طالبانو حکومت ته رسول شوی.

د سوریې د موقت حکومت مشر احمد الشرع ویلي چې له اسراییل سره د امریکا په منځګړتوب د امنیتي تړون خبرې وروستیو پړاوونو ته رسېدلي دي.

هغه ویلي، ممکن دا تړون په نږدې ورځو کې لاسلیک شي او د ۱۹۷۴ کال تړون ته ورته وي.

نوموړي ټینګار کړی چې دا چاره “هیڅکله” د اسراییل سره د اړیکو عادي کېدل نه دي.