د امریکا ولسمشر ډونالد ترمپ ویلي، هغه په خپله لومړۍ دوره کې د امریکا پوځ په تریلیونونو ډالرو سمبال کړ؛ خو یوه برخه تجهیزات یې په افغانستان کې په بېخوده توګه پاتې شول.
ترمپ دا څرګندونې د سعودي ولیعهد محمد بن سلمان سره د لیدنې پر مهال په سپینې ماڼۍ کې کړي.
هغه زیاته کړې، هغه څه چې په افغانستان کې پاتې شول یوازې د ټول پوځ د تجهیزاتو یوه کوچنۍ برخه وه.
ترمپ ویلي، امریکا به خپل پوځ بیا د تاریخ په تر ټولو لوړه کچه رسوي.
پولیټیکو په یوه راپور کې ویلي، د امریکا دوه لوړپوړي پوځي چارواکي په یو نا اعلان شوي سفر کې د اوکراین پلازمېنې کیف ته رسېدلي دي.
ټاکل شوې چې دوی نن ورځ د اوکراین له پوځي مشرانو، وکیلانو او ولسمشر ولادیمیر زېلېنسکي سره جلا جلا ناستې وکړي.
سرچینې وایي چې د دغو لیدنو اصلي بحث به د روسیې سره د سولې د درېدلې بهیر ارزونه او د دې پروسې د بیا پيل په تړاو د اوکراین د دریځ اورېدل وي.
وال سټریټ ژورنال په یوه بل راپور کې لیکلي چې یاد امریکايي چارواکي پلان لري په راتلونکو ورځو کې له روسي چارواکو سره هم د خبرو یوه ناسته ترسره کړي.
په لبنان کې د فلسطینیانو د عینالحلوه کډوالو پر کمپ د اسراییلي بېپیلوټه الوتکې په برید کې لږ تر لږه ۱۳ کسان وژل شوي او ګڼ نور ټپیان شوي دي.
د اسوشیټېډ پرېس د معلوماتو له مخې، دا برید د صیدون ښار ترڅنګ د کمپ په یوه جومات پورې اړوند تم ځای کې ترسره شوی دی، چې د ملکیانو د مرګژوبلې د زیاتېدو لامل شوی دی.
اسراییلي پوځ دعوه کوي چې برید یې د حماس پر یوه روزنیز مرکز کړی، هغه ځای چې د دوی په وینا د اسراییل پر ضد د بریدونو د پلان جوړولو لپاره کارېده.
خو د سیمې اوسېدونکي او د کډوالو د چارو فعالان وایي چې په پېښه کې عادي خلک وژل شوي.
د جاپان د اور وژنې ملي ادارې ویلي، د دغه هېواد په سوېلي برخه کې په یوه سمندري ښار کې لګېدلي پراخ اور نږدې ۱۷۰ څخه ډېرې ودانۍ په بشپړ ډول له منځه وړي دي.
د چارواکو په خبره، دا اور چې پرون مازیګر بل شوی، لا هم نه دی کنټرول شوی.
لومړني معلومات ښيي چې په پېښه کې یو کس ورک شوی او شااوخوا ۱۷۵ تنه اوسېدونکي د خوندیتوب لپاره بیړنیو سرپناهو ته کډه شوي دي.
ویل کېږي چې د اور وژنې ټیمونه د باد له امله د اور د وژلو برخه کې له ستونزو سره مخ دي.
د کندهار طالب چارواکو دوکاندارانو ته درې میاشتنۍ اخطاریه ورکړې چې له خپلو دوکانونو څخه دې ټول پاکستاني توکي لیرې کړي.
که څه هم دا موده درې میاشتې ټاکل شوې، سوداګر وايي چې د خبر تر اعلان یوازې یوه اونۍ وروسته عملي کمپاین پيل شوی دی.
د کندهار د بازار یو شمېر تاجران وایي چې له بندیز سره سره لا هم پاکستاني درمل په پټه توګه بازار ته راوړل کېږي.
هغوی زیاتوي چې د نیول شویو توکو بیا پلور د قیمتونو کچه نږدې درې برابره لوړه کړې، چې له امله یې پر مصرفوونکو اضافي اقتصادي فشار راغلی دی.
طالب چارواکو تر اوسه په دې اړه نور جزئیات نه دي ورکړي.
د سيانبيايس د راپور له مخې، نن له سهار راهیسې د Cloudflare په سیستم کې د پراخې تخنیکي ستونزې له امله د ایکس (پخواني ټویټر)، League of Legends او ګڼو نورو ویبپاڼو او اپلیکیشنونو کار ګډوډ شوی او کاروونکي یې د ګڼو ستونزو سره مخ کړي.
کلاډفلر کمپنۍ ویلي چې د “500 خطاګانو” د زیاتېدو له کبله یې ډېر خدمات بند شول، خو تخنیکي ټیمونه د ستونزې د حل په موخه هڅې کوي.
د سيانبيايس د راپور له مخې، شرکت زیاتوي چې ډېری برخې بېرته عادي کېدو ته نږدې دي، خو ښايي ځینې کاروونکي لا هم خطاګانې وویني.
تر اوسه روښانه نه ده چې ستونزه ولې رامنځته شوې، خو دا ګډوډي په نړیواله کچه د میلیونونو کاروونکو پر انلاین فعالیت اغېزمنه شوې ده.
د طالبانو حکومت د بهرنیو چارو وزارت د مدینې منورې په یوه ټرافیکي پېښه کې د هندي حاجیانو د وژل کېدو په اړه خواشیني څرګنده کړې ده.
د وزارت ویاند عبدالقهار بلخي په خپاره شوي بیان کې د هند له حکومت او خلکو سره د دې غمیزې په تړاو خواخوږي او همدردي شریکه کړې ده.
په یاده پېښه کې ۴۳ هندي حاجیانو خپل ژوند له لاسه ورکړی او یو شمېر نور ټپیان شوي دي.
یو شمېر باوري سرچینو رسنیو ته ویلي چې د طالبانو حکومت د صنعت او سوداګرۍ وزیر نورالدین عزیزي به سبا د رسمي سفر په موخه د هند پلازمېنې نوي ډیلي ته روان شي.
ویل کېږي چې نورالدین عزیزي به ددغه سفر پر مهال د هند له دولتي چارواکو سره د سوداګرۍ د پیاوړتیا، د دواړو لورو ترمنځ د صادراتو او وارداتو د پراختیا او ګډو اقتصادي همکاریو په اړه خبرې وکړي.
دا په داسې حال کې ده چې په دې وروستیو کې د طالبانو د حکومت او پاکستان ترمنځ اقتصادي اړیکې سختې ترینګلې شوي دي.
د ننګرهار د طالبانو حکومت د کرنې، اوبو لګولو او مالدارۍ ریاست د معلوماتو له مخې، شاوخوا ۵۰۰ کیلو ګرامه د کبانو غوښه چې په ناقانونه ډول د تورخم له لارې راوړل کېده، د یو ګډ پلاوي له خوا کشف او ضبط شوې ده.
د ریاست ویاند اجمل سبحاني وایي، دغه غوښه د نیول کېدو وروسته له منځه یوړل شوه.
همدارنګه د یاد ریاست رییس محمد ولي محسن ټینګار کړی چې د «اسلامي امارت» د رهبرۍ له حکم سره سم له پاکستان سره سوداګریزې اړیکې تړل شوي او سوداګرو ته سپارښتنه شوې چې له قاچاقي راوړنو او ناقانوني کاروبار څخه ډډه وکړي.
د طالبانو حکومت د اطلاعاتو او کلتور وزارت د فرهنګ او هنر معین مولوي عتیقالله عزیزي د جاپان سفیر ماساموتو کِینیچي سره کتلي او د افغانستان د لرغونو اثارو د ساتنې او فرهنګي همکاریو په اړه یې خبرې کړې.
په دې ناسته کې دواړو خواوو د تاریخي میراث د خوندي کولو ژمنه کړې او ټینګار یې کړی چې دا یوازې د افغانستان مسوولیت نه دی، بلکې د نړیوالې ټولنې ګډ مسؤلیت دی.
همدارنګه دواړو خواوو ژمنه کړې چې په راتلونکې کې به خپلې همکارۍ نورې هم پراخې کړي.