د قرغزستان په پلازمېنه بیشکک کې د افغانستان او قرغزستان د سوداګرۍ فورم د دواړو هېوادونو د چارواکو او سوداګرو په ګډون ترسره شوی، چې پکې د اقتصادي همکاریو د پراخولو پر لارو چارو خبرې شوې دي.
په قرغزستان کې د طالبانو د حکومت سفارت ویلي، د غونډې پر مهال په بیشکک کې د سفارت سرپرست عبدالشکور حقاني ټینګار کړی چې افغانستان د دواړو هېوادونو ترمنځ د سوداګریزو اړیکو پراختیا او ګډو اقتصادي نوښتونو هرکلی کوي.
د غونډې مهمه لاستهراوړنه د افغانستان او قرغزستان ترمنځ د سوداګرۍ شورا د جوړېدو هوکړهلیک و، چې موخه یې د خصوصي سکټور ترمنځ د اړیکو پیاوړتیا، د ګډو پانګونو همغږي او د اقتصادي پروژو ملاتړ بلل شوی دی.
دا پرمختګ داسې مهال رامنځته کېږي چې د افغانستان د سوداګرۍ او پانګونې خونې عمومي رئیس سیدکریم هاشمي د یوه سوداګریز پلاوي په مشرۍ قرغزستان ته سفر کړی دی.
