د افغانستان لپاره د پاکستان پخواني ځانګړي استازي اصف دراني ویلي، چې افغانستان له پاکستان سره ځانګړې او تاریخي اړیکې لري.
هغه ټینګار کړی چې اوسنۍ ترینګلتیا به دایمي نه وي، ځکه تجربه ښيي چې د دواړو هېوادونو ترمنځ به سوداګرۍ او د خلکو تګ راتګ بېرته عادي شي.
درانی زیاتوي چې حکومتونه راځي او ځي؛ خو د دواړو لورو خلک یو له بل سره مینه لري، او دا باید د راتلونکي لپاره د قوي اړیکو بنسټ شي.
د طالبانو حکومت ویاند ذبیح الله مجاهد ویلي، چې د افغانستان او پاکستان ترمنځ د سوداګرۍ او ترانزیټ مهمې لارې د پاکستاني لوري له خوا په غیرقانوني ډول د سیاسي او اقتصادي فشار د وسیلې په توګه تړل شوې دي، چې دواړو هېوادونو ته، په ځانګړي ډول ولسونو ته، یې جدي مالي او بشري زیانونه اړولي دي.
نوموړي زیاته کړې، که څه هم افغانستان دا مهال خپل ډېری اړین توکي له نورو بدیلو هېوادونو څخه برابروي؛ خو «اسلامي امارت» لا هم غواړي چې سوداګري او ترانزیټ پراخ شي او د دواړو لورو ولسونه له باعزته تجارت څخه برخمن شي.
ذبیح الله مجاهد ټینګار کړی، چې سوداګریزې لارې به یوازې هغه وخت بېرته پرانیستل شي، کله چې د پاکستان حکومت له لوري قوي او عملي تضمین تر لاسه شي، څو دا لارې بیا هېڅکله د سیاسي فشار، غیرقانوني استفادې او د ولسونو د زورولو لپاره ونه کارول شي.
هغه دغه راز ویلي، چې «اسلامي امارت» غواړي د دواړو هېوادونو د تجارانو او عام ولس حقونه خوندي پاتې شي او سوداګري د سیاسي شخړو قرباني نه شي.
د هند حکومت کابل ته د انفلونزا او مننجایتس ۶۳ زره او ۷۳۴ دوزه واکسینونه واستول.
د هند د بهرنیو چارو وزارت ویاند رندهیر جیسوال ویلي، دا مرسته د افغانستان د روغتیايي سکتور د پیاوړتیا په موخه ترسره شوې او هند به د افغان ولس ملاتړ ته دوام ورکړي.
دا مرسته په داسې حال کې کېږي چې افغانستان دا مهال د ساري ناروغیو له زیات خطر سره مخ دی او روغتیايي بنسټونه له جدي ننګونو سره لاسوګرېوان دي.
د ډسمبر څلورمه په افغانستان کې د جاپاني اینجینر تیتسو ناکامورا شپږم تلین سره برابره ده.
هغه شپږ کاله وړاندې په جلال اباد ښار کې د نامعلومو وسله والو له لوري په ډزو ووېشتل شو، چې لومړی ټپي او بیا یې ساه ورکړه.
جمهوري نظام ویلي وو چې د هغه د وژنې په اړه څېړنې کوي؛ خو تر اوسه په دې اړه کوم ګام نه دی اخیستل شوی.
عام افغانان د هغه وژل کېدل د افغانستان لپاره لوی زیان ګڼي او اوس هم د طالبانو له حکومت غوښتنه کوي چې د هغه قاتلین پیدا او سزا ورکړي.
پاکستاني رسنیو راپور ورکړی چې له نږدې دوو میاشتو وروسته، تورخم او سپینبولدک لاره به بیا د ملګرو ملتونو د بشري مرستو د لېږد لپاره پرانیستل شي.
د معلوماتو له مخې، د مرستو په لومړي پړاو کې به د ملګرو ملتونو د درېیو ادارو ۱۴۳ کانټینرونه افغانستان ته داخل شي.
تر اوسه د طالبانو حکومت په دې تړاو رسمي څرګندونې نه دي کړې.
د پاکستان د پارلمان پخواني مشر او د تحریک انصاف مخکښ غړی اسد قیصر وايي د افغانستان او پاکستان ترمنځ روانو کړکېچونو د خیبرپښتونخوا اقتصاد له سخت فشار سره مخ کړی دی.
د هغه په وینا، د سرحدي ستونزو او سیاسي ترینګلتیا له امله په پښتونخوا کې د پانګونې بهیر ورو شوی او د صنعت ډېری برخې یې له تاوان سره مخ شوې دي.
د عزیزي شرکت مشر میرویس عزیزي وايي، دغه شرکت په وروستیو پنځو میاشتو کې د نږدې پنځه میلیارده ډالرو په ارزښت هغه تخنیکي تجهیزات برابر کړي چې له لارې به یې شاوخوا پنځه زره ميګاواټه برېښنا تولیدېږي.
د ده په وینا، په راتلونکو شپږو میاشتو کې به د لس زره ميګاواټه برېښنا د تولید پروژې په بېلابېلو سیمو کې عملي برخې پیل شي.
عزیزي وايي چې د تخنیکي ارزونو لپاره د شرکت ټیمونو افغانستان ته سفرونه کړي او د ماشینالاتو د برابرولو په هدف یې جرمني، هالنډ، اتریش، امریکا، چیلي او چین ته کاري سفرونه ترسره کړي.
هغه زیاتوي چې د اوبو، ګاز او باد له لارې د نورو تولیدي فابریکو د تدارک پروسه به راتلونکي کال په دویمه نیمایي کې هم روانه وي او د طالبانو حکومت له مرستو یې مننه کړې ده.
د روسیې ولسمشر ولادیمیر پوتین نن د دوه ورځني رسمي سفر لپاره هند ته روانېږي.
راپورونه وايي چې د دې سفر اصلي تمرکز به د مسکو او نويدېلي ترمنځ ستراتیژیکې اړیکې او پوځي همکارۍ نورې پیاوړې کول وي.
سرچینه زیاتوي چې دواړه هېوادونه د سوخو–۵۷ جنګي الوتکو د ټکنالوژۍ د لېږد موضوع هم څېړي.
تمه کېږي پوتین به د هند له لومړي وزیر نرېندرا مودي سره ګڼې رسمي او غیر رسمي لیدنې ولري، او ورسره به لوړپوړي پوځي چارواکي او د سترو روسي شرکتونو استازي ملګري وي.
په واشنګټن کې د یوه افغان کډوال له برید وروسته، د امریکا په استازو جرګه کې د کډوالۍ د تګلارو په اړه لانجې او ناندرۍ ډېرې شوې دي.
جمهوريپالو استازو د بایډن د حکومت پر کډوالۍ نیوکې وکړې او د سختو بدلونونو غوښتنه یې وکړه.
ځینو استازو آن د قانوني کډوالۍ د محدودولو خبره کړې، په داسې حال کې چې نورو د اړتیاپر بنسټ د کډوالۍ د تنظیم ملاتړ کړی دی.
دغه بحثونه وروسته تر هغه تاوده شول چې افغان کډوال رحمانالله لکڼوال د ملي ګارد پر عسکرو برید وکړ او یوه سرتېره یې ووژله.
د طالبانو حکومت د ریاستالوزراء اقتصادي مرستیال ملا عبدالغني برادر اخوند، د ایران د روغتیا وزارت مرستیال مهدي پیر صالحي او سفیر علي رضا بیکدلي سره د یوې ناستې پر مهال اعلان کړی چې افغانستان او ایران به د درملو او طبي وسایلو د تولید او صادراتو په برخه کې اوږدمهاله همکاري پراخه کوي.
ایراني لوري ویلي، تهران چمتو دی چې په افغانستان کې د درملو او طبي تجهیزاتو د تولید ظرفیتونه لوړ کړي او صادرات یې زیات کړي.
ملا برادر د ایران له پرېکړې مننه کړې او ډاډ یې ورکړی چې د “اسلامي امارت” اړوندې ادارې به په دې برخه کې له تهران سره نږدې ګډ کار وکړي.