ایراني رسنیو ویلي، د تهران او دوبۍ ترمنځ د مستقیمو الوتنو د ټکټونو پلور بېرته پیل شوی او ټاکل شوې ده چې دغه الوتنې د چنګاښ له ۱۰مې نېټې د دواړو هېوادونو د نړیوالو هوايي ډګرونو ترمنځ بیا ترسره شي.
دغه هوايي مسیر په وروستیو اوونیو کې د ایران، امریکا او اسرائیل ترمنځ د پوځي ترینګلتیاوو او د هوايي حریم د محدودیتونو له امله له ځنډ او ګډوډۍ سره مخ شوی و.
د دوبۍ هوايي ډګرونه هم د همدې کړکېچ پر مهال اغېزمن شوي وو.
په متحده عربي اماراتو کې د هوايي حریم له بېرته پرانیستل کېدو وروسته، د الوتنو د عادي کېدو بهیر پیل شوی، خو د اروپايي ټولنې د هوايي چلند د خوندیتوب ادارې خبرداری ورکړی چې هوايي شرکتونه دې لا هم د ایران، عراق او لبنان له هوايي حریم څخه ډډه وکړي.
یادې ادارې ویلي، د اوربند د احتمالي نقض او د هرمز تنګي شاوخوا د امنیتي ګواښونو له امله د سیمې وضعیت لا هم بشپړ عادي شوی نه دی.
