د فوربس له مخې، ایلان ماسک د تاریخ لومړی کس شو چې خپله شتمني یې ۶۰۰ میلیاردو ډالرو ته ورسوله.

فوربس، چې د نړۍ په کچه د شتمنو کسانو، شرکتونو او بازارونو د تحلیل او راپورونو لپاره پېژندل کېږي، ویلي دي، دا پرمختګ وروسته له هغو راپورونو راغی چې ښيي د هغه د فضايي شرکت سپېس‌اېکس د عامه ونډو خرڅلاو (IPO) د احتمال له مخې، ارزښت یې شاوخوا ۸۰۰ میلیارد ډالر اټکل شوی دی.

ایلان ماسک د سپېس‌اېکس شاوخوا ۴۲ سلنه ونډه لري او د دې عامه کېدو سره به شتمني یې نوره هم زیاته شي، اټکل کېږي چې ټولې شتمنۍ به یې ۶۷۷ میلیاردو ډالرو ته ورسېږي.

همدارنګه، د هغه د برېښنايي موټرو شرکت ټیسلا ونډه هم د شتمنۍ په زیاتوالي کې مهم رول لري.

په نومبر کې د ټیسلا ونډه‌والو د ماسک لپاره د تاریخ د تر ټولو لوی د معاش پلان تصویب کړ، چې ارزښت یې ۱ ټریلیون ډالر دی.

سربېره پر دې، د ماسک مصنوعي ځیرکتیا شرکت xAI د ۱۵ میلیاردو ډالرو د نوې پانګې د راټولولو په پرمختللو خبرو بوخت دی، چې ارزښت یې شاوخوا ۲۳۰ میلیارد ډالر اټکل شوی.

دا پرمختګ د ماسک د سوداګریزو امپراتوریو، ټیسلا، سپېس‌اېکس او xAI ستر ځواک او نړیواله اقتصادي اغېزه نندارې ته وړاندې کوي.

د طالبانو حکومت د عامې روغتیا وزارت د خوړو او درملو معین مولوي حمدالله زاهد د رسمي سفر پر مهال په تهران کې د ایران د روغتیا وزارت له معین او د خوړو او درملو سازمان له رئیس مهدي پیرصالحی سره لیدنه کړې ده.

ایران کې د طالبانو حکومت د سفارت د خبرپاڼې له مخې، په دې لیدنه کې د یاد سفارت سرپرست مولوي فضل محمد حقاني هم ګډون درلود.

دواړو لورو په دې ناسته کې د درملو د تأمین، تخنیکي تجربو د تبادلې او د دواړو هېوادونو ترمنځ د روغتیايي همکاریو د پراختیا پر لارو چارو خبرې کړې دي.

په کابل کې د یوه خصوصي شرکت مسوولانو ویلي، چې له هند څخه افغانستان ته د درملو واردات په رسمي ډول پیل شوي دي.

د دوی په وینا، د یوه هندي معتبر شرکت د څانګې له پرانیستل کېدو سره سم، په لومړي پړاو کې د ۲۵ قلمه درملو واردات روان دي.

هندي شرکت «سپلا» هم ژمنه کړې چې د درملو د تولید په برخه کې به له افغانستان سره همکاري کوي.

دا اقدام وروسته له هغه کېږي چې د طالبانو حکومت له پاکستانه د درملو پر وارداتو بندیز لګولی او واردوونکو ته یې د بدیلو لارو د موندلو سپارښتنه کړې ده.

د مراکش د اتلانتیک ساحل په صافي ولایت کې سختو سېلابونو درنه مرګ‌ژوبله اړولې ده.

د ځایي چارواکو د معلوماتو له مخې، په دې پېښه کې لږ تر لږه ۳۷ کسانو خپل ژوند له لاسه ورکړی او ۹ نور لا هم لادرکه دي؛ خو د ژغورنې هڅې دوام لري.

د بېړني وضعیت له امله په یاده سیمه کې ښوونځي د درې ورځو لپاره تړل شوي او ګڼ کورونه او دوکانونه زیانمن شوي دي.

راپورونه وایي، دا بارانونه وروسته له هغې وورېدل چې مراکش له څو کلنې سختې وچکالۍ سره مخ و.

د شري لنکا پخوانی ټېسټ کرکټر ډي‌اېس‌ډي سلوا له دې نړۍ سترګې پټې کړې.

د شري لنکا کرکټ بورډ وایي ، هغه په ۱۲ ټېسټ او ۴۱ ون‌ډې یا یو ورځینو نړیوالو لوبو کې د هېواد استازولي کړې وه.

سلوا د ۱۹۸۲ کال د شري لنکا د لومړۍ ټېسټ لوبډلې غړی هم و او له ۲۰۰۹ تر ۲۰۱۱ پورې د دې هیواد د کرکټ بورډ موقت مشر په توګه هم پاتې شوی و.

د طالبانو حکومت د عامې روغتیا وزیر، مولوي نور جلال جلالي، هند ته په خپل لومړي رسمي سفر ورسېد.

د هند د بهرنیو چارو وزارت ویاند رندهیر جیسوال وایي، دا سفر د افغانستان د روغتیايي سکتور لپاره د هند د دوامدار ملاتړ څرګندونه کوي او تمه ده چې دواړه لوري پر روغتیايي همکاریو، د درملو رسولو او تخنیکي مرستو مهمې خبرې وکړي.

دا سفر په داسې وخت کې ترسره کېږي چې افغانستان له پاکستان څخه د درملو واردات په بشپړ ډول درولي دي؛ هغه اقدام چې د درملو د بدیلو بازارونو او نوو سیمه‌ییزو همکاریو اړتیا یې لا پیاوړې کړې ده.

شنونکي وایي، د هند سره د روغتیايي اړیکو پراخېدل کولی شي د افغانستان د درملو د کمښت ستونزه راکمه او د روغتیايي سیستم پر پیاوړتیا مثبت اغېز ولري.

د خیبر پښتونخوا ایالتي مجلس له پاکستاني حکومت غوښتنه کړې چې افغانستان ته د زده‌کوونکو د خوندي بیرته ستنولو لپاره عاجل ګامونه واخلي.

راپورونه وایي، زده‌کوونکي د تړل شویو سرحدي دروازو له امله د تګ راتګ او د زده‌کړو په برخه کې ستونزو سره مخ دي.

مجلس د یوې پرېکړې له لارې هم غوښتنه کړې چې په سرحدي دروازو کې د زده‌کوونکو لپاره ځانګړي مرکزونه جوړ شي او روغتیايي خدمات برابر شي ترڅو د دوی بیرته ستنیدل په منظمه توګه ترسره شي.

په ورته وخت کې د افغانستان تړلي سرحدي دروازې د مسافرو او سوداګرو لپاره هم جدي ستونزې رامنځته کړې دي.

مشهورې اسټرالیایۍ اداکارې او ټولنیزې فعالې رېچل کارپاني د اوږدې ناروغۍ وروسته د ۴۵ کلونو په عمر ساه ورکړه.

د نوموړې کورنۍ د هغې د مړینې پخلی کړی، خو د ناروغۍ ډول او د مړینې کره لامل یې نه دی په ډاګه کړی.

د رېچل خور، جارجیا کارپاني، پر انسټاګرام په خپاره کړي پیغام کې ویلي چې نوموړې د اوږدې ناروغۍ پر وړاندې له مبارزې وروسته مړه شوې ده.

د کورنۍ په وینا، د اداکارې وروستي مراسم به د جمعې په ورځ، د ډسمبر پر ۱۹مه، یوازې د نږدې خپلوانو او دوستانو په ګډون ترسره شي.

رېچل کارپاني د اسټرالیا په ټلویزیوني صنعت کې یو بریالی هنري سفر درلود او وروسته یې په امریکايي تولیداتو کې هم خپل استعداد ثابت کړی و.

هغې د اداکارۍ تر څنګ د ښځو د حقونو ملاتړ کاوه او پر نړیوالو بشري او سیاسي مسایلو، په ځانګړي ډول د فلسطین پر موضوع، یې څرګند دریځ درلود.

د طالبانو حکومت د ریاست الوزرا د اقتصادي کمېسیون د تخنیکي کمېټې نوبتي غونډه کې له کونړ سیند د ګمبیري دښتې لاندې برخې څخه د ننګرهار درونټې بند تر کاسې پورې د اوبو د لېږد وړاندیز تایید شو.

دا وړاندیز اوس د اقتصادي کمېسیون د وروستۍ پرېکړې لپاره وړاندې شوی دی.

په غونډه کې د بادغیس ولایت د حلقوي سړک د پنځمې برخې (۲۵ کیلومتره) پروژې په اړه هم بحث شوی او ځانګړې کمېټې ته دنده سپارل شوې څو د پروژې هراړخیزه څېړنه ترسره کړي او راپور یې د تخنیکي کمېټې راتلونکې غونډې ته وړاندې کړي.

د دې اوبو لېږد پروژه په عملي کېدو سره به د ننګرهار ګڼ شمېر کرنیزو ځمکو د اوبو کمښت ستونزه حل کړي او کروندګرو ته به د پایدارو اوبو سرچینې برابرې کړي.

د طالبانو حکومت مشر شیخ هبت الله، د شهیدانو او معلولینو وزارت، کورنیو چارو وزارت، د کار او ټولنیزو چارو وزارت، د زندانونو چارو ادارې، د افغاني سرې میاشتي عمومي ریاست، د جهادي مدارسو او دارالایتامونو مسئولینو لپاره جوړ شوي درې ورځني اصلاحي او روزنیز سیمینار کې ګډون او وینا کړې.

د طالبانو حکومت مرستیال ویاند حمدالله فطرت په خپره شوې خبرپاڼه کې ویلي، چې شیخ هبت الله، په خپلو ویناوو کې د «اسلامي امارت» د قوانینو، د خلکو د خدمت د اصولو، د یتیمانو، کونډو، معلولینو، بې سرپرسته کورنیو او معتادینو د ملاتړ په اړه لارښوونې کړي.

نوموړي ویلي، چې د «اسلامي امارت» فرمانونه د الله تعالی د دین پر اساس دي او د ټولو مسلمانانو د عزت، وقار او امنیت ساتلو لپاره دي.

هغه زیاته کړې چې هر مسؤل باید خپل صلاحیت وپېژني، د خلکو حقوق مراعت کړي، د شریعت په رڼا کې خپل کارونه ترسره کړي، اختلافات ختم کړي، پر وخت کارونه اجرا کړي او خلکو ته د خوشحالۍ زېري ورسوي.