د طالبانو حکومت د پیښو سره د مبارزې د آمادګۍ ملي ادارې د هلمند ولایت، د مارجې ولسوالۍ په یوه عملیات کې د ناچاوده توکو لویه کچه کشف او خنثی کړې.

په دې عملیاتو کې د AREA ماین پاکۍ مؤسسې د QRT-11 تخنیکي ټیم په ملاتړ؛ ۲ د ۸۲mm مرمۍ، ۴ د RPG7 راکټونه، ۶۳ د SPG7 راکټونه، ۱۰ کړۍ Almms ماینونه، ۸ د F1 ګرنیډونه، ۲ د RGP5 راکټونه، ۵ د SPG9 فیوزونه، ۱۵ د F1 ګرنیډ فیوزونه، ۱۱ د ۴۰mm مرمۍ او ۵۰۰ د SAAخنثی کړي.

یادې ادارې ویلي، دا ګامونه د ولسونو امنیت ټینګښت او د ناچاوده توکو له خطرونو د مخنیوي لپاره ترسره شوي دي.

د افغانستان او قرغیزستان ترمنځ د اقتصادي او تجارتي اړیکو د پراختیا په موخه، د قرغیزستان د سوداګرۍ خونه په کابل کې په رسمي ډول پرانیستل شوه.

د پرانیستې مراسمو کې د طالبانو حکومت د صنعت او سوداګرۍ وزیر نورالدین عزیزی، د قرغیزستان د اقتصاد او تجارت وزیر بکیت صدیکوف او د دواړو هېوادونو د خصوصي سکتور ګڼ شمېر فعالان حضور درلود.

د یاد وزارت د خبرپاڼې له مخې، د دې سوداګرۍ خونې پرانیستل د دواړو هېوادونو ترمنځ د سوداګرۍ د همکاریو د پیاوړتیا، د تبادلې د پراختیا، د پانګونې د هڅونې او د سوداګرو ترمنځ د اړیکو د اسانتیا لپاره مهم ګام ګڼل کېږي.

د ایران د بهرنیو چارو وزیر عباس عراقچي ویلي، د ۱۲ ورځنۍ جګړې پر مهال د امریکا او اسراییل په بریدونو کې د ایران ګڼ اټومي تجهیزات ویجاړ شوي دي.

هغه منلې چې امریکا د ایران پر اټومي تاسیساتو په برید کې بریالۍ وه.

عراقچي ټینګار کړی، سره له دې زیانونو د ایران اټومي پروګرام له منځه نه دی تللی او خپل بنسټیز فعالیتونه یې ساتلي دي.

د هغه په وینا، د ایران اټومي ټېکنالوژي وارداتي نه ده او پر کورنیو ظرفیتونو ولاړه ده.

هغه الجزیرې ته ویلي، ایران خپل اټومي پروګرام د خپلو ساینسپوهانو د پوهې پر بنسټ پیل کړی، څو د هر ډول برید په صورت کې تش لاس پاتې نه شي.

د ملګرو ملتونو د بشري حقونو دفتر په افغانستان کې د خپلو دفترونو ته د ښځو پر تګ د بندیز پر دوام اندېښنه ښودلې ده.

دغه دفتر ویلي، د ښځینه کارکوونکو د حضور بندیز ۱۰۰ ورځې پوره کړې او د طالبانو له حکومت یې غوښتي چې دا محدودیتونه ژر تر ژره لېرې کړي.

ملګرو ملتونو ټینګار کړی، چې د ښځو له ګډون پرته اړمنو کسانو ته د حیاتي مرستو رسول ستونزمن دي او دا بندیز د هېواد په ګټه نه دی.

رویټرز راپور ورکړی، چې د امریکا ولسمشر ډونالډ ټرمپ د غزې لپاره د نړیوال ځواک د جوړولو په طرحه کې له پاکستان څخه د ځواکونو د استولو غوښتنه کړې ده.

د راپور له مخې، د پاکستان د پوځ مشر عاصم منیر له دې غوښتنې سره ټاکل شوې روانه اوونۍ واشنګټن ته سفر وکړي.

ویل شوي، که پاکستان په دې ځواک کې برخه وانخلي، د ټرمپ له ناخوښۍ سره به مخ شي؛ خو د ځواکونو لېږل به په کور دننه پراخ مخالفتونه هم را وپاروي.

د پاکستان–افغانستان د سوداګرۍ ګډې خونې (PAJCCI) ویلي، د تګ‌راتګ لارو بندېدو د پاکستان سوداګرۍ ته تر دې دمه له ۴٫۵ میلیارد ډالرو زیات تاوان اړولی دی.

د پاکستاني رسنیو په وینا، د کرنې او ودانیزو توکو ورځني صادرات د ۵۰ څخه تر ۶۰ میلیونه ډالرو پورې رسېدل.

یاده خونه خبرداری ورکوي چې که ستونزه حل نه شي، د نارنجو او کچالو موسمي صادرات به د ډسمبر او مارچ ترمنځ نږدې ۲۰۰ میلیونه ډالره نور زیان وویني.

د پاکستان–افغانستان د سوداګرۍ ګډې خونې (PAJCCI) ویلي، د تګ‌راتګ لارو بندېدو د پاکستان سوداګرۍ ته تر دې دمه له ۴٫۵ میلیارد ډالرو زیات تاوان اړولی دی.

د پاکستاني رسنیو په وینا، د کرنې او ودانیزو توکو ورځني صادرات د ۵۰ څخه تر ۶۰ میلیونه ډالرو پورې رسېدل.

یاده خونه خبرداری ورکوي چې که ستونزه حل نه شي، د نارنجو او کچالو موسمي صادرات به د ډسمبر او مارچ ترمنځ نږدې ۲۰۰ میلیونه ډالره نور زیان وویني.

د امریکا ولسمشر ډونالډ ټرمپ اعلان کړی چې واشنګټن به پر ټولو هغو تحریم‌شویو نفت‌کشونو بشپړه او کلکه محاصره ولګوي چې ونزوېلا ته داخلېږي او یا ترې وځي.

نوموړي همداراز د ونزوېلا حکومت د «بهرنۍ ترهګرې ډلې» په توګه ونوماوه.

ټرمپ د ټروت سوشیال له لارې ویلي، د ونزوېلا رژیم د امریکا د شتمنیو د غلا، ترهګرۍ، د نشه‌يي توکو او انساني قاچاق له امله د ترهګر سازمان په توګه پېژندل شوی دی.

د هغه په وینا، امریکا به اجازه ورنه کړي چې کوم هېواد یا حکومت د امریکا ملي ګټې وګواښي او یا یې شتمنۍ په دښمنانه ډول تر خپل واک لاندې راولي.

دا پرېکړه یوه اوونۍ وروسته له هغې اعلان شوه چې امریکايي ځواکونو د ونزوېلا له سواحلو سره نږدې یو تحریم‌شوی نفت‌کش توقیف کړ.

د بښنې نړیوال سازمان افغانستان ته د افغان کډوالو او پناه‌غوښتونکو د جبري ستنولو په اړه خبرداری ورکړی او ویلي یې دي چې دا کار د بشري حقونو له جدي سرغړونو سره مل دی.

د ملګرو ملتونو د شمېرو له مخې، ایران او پاکستان یوازې روان کال کې تر ۲.۶ میلیونه زیات افغانان ایستلي، چې شاوخوا ۶۰ سلنه یې ښځې او ماشومان دي.

یاد سازمان ویلي، په افغانستان کې د طالبانو له لوري د بشري حقونو ځپنه، روان بشري ناورین او طبیعي پېښې راستنېدونکو ته جدي ګواښونه جوړوي.

دغه راز، راپورونه ښيي چې ځینې اروپايي هېوادونه د افغان کډوالو د جبري ستنولو لپاره له طالب چارواکو سره خبرې کوي، چې دې چارې اندېښنې نورې هم زیاتې کړې دي.

د فوربس له مخې، ایلان ماسک د تاریخ لومړی کس شو چې خپله شتمني یې ۶۰۰ میلیاردو ډالرو ته ورسوله.

فوربس، چې د نړۍ په کچه د شتمنو کسانو، شرکتونو او بازارونو د تحلیل او راپورونو لپاره پېژندل کېږي، ویلي دي، دا پرمختګ وروسته له هغو راپورونو راغی چې ښيي د هغه د فضايي شرکت سپېس‌اېکس د عامه ونډو خرڅلاو (IPO) د احتمال له مخې، ارزښت یې شاوخوا ۸۰۰ میلیارد ډالر اټکل شوی دی.

ایلان ماسک د سپېس‌اېکس شاوخوا ۴۲ سلنه ونډه لري او د دې عامه کېدو سره به شتمني یې نوره هم زیاته شي، اټکل کېږي چې ټولې شتمنۍ به یې ۶۷۷ میلیاردو ډالرو ته ورسېږي.

همدارنګه، د هغه د برېښنايي موټرو شرکت ټیسلا ونډه هم د شتمنۍ په زیاتوالي کې مهم رول لري.

په نومبر کې د ټیسلا ونډه‌والو د ماسک لپاره د تاریخ د تر ټولو لوی د معاش پلان تصویب کړ، چې ارزښت یې ۱ ټریلیون ډالر دی.

سربېره پر دې، د ماسک مصنوعي ځیرکتیا شرکت xAI د ۱۵ میلیاردو ډالرو د نوې پانګې د راټولولو په پرمختللو خبرو بوخت دی، چې ارزښت یې شاوخوا ۲۳۰ میلیارد ډالر اټکل شوی.

دا پرمختګ د ماسک د سوداګریزو امپراتوریو، ټیسلا، سپېس‌اېکس او xAI ستر ځواک او نړیواله اقتصادي اغېزه نندارې ته وړاندې کوي.