د طالبانو حکومت د اوبو او انرژۍ وزیر، ملا عبداللطیف منصور، د «کوتای اِنسات» ترکي شرکت له مسؤلینو سره په لیدنه کې د اوبو او برېښنا د لویو پروژو په برخه کې د پانګونې پر فرصتونو خبرې کړي.

د یاد وزارت د معلوماتو له مخې، ترکي پانګوالو د اوبو او برېښنا بندونو او د اوبو رسولو په پروژو کې د پانګونې لېوالتیا څرګنده کړې
او د اوبو او انرژۍ وزیر د پانګونې لپاره د دریو مهمو پروژو وړاندیز کړی چې له مخې یې: د ګمبیري اوبولګولو او برېښنا تولید بند پروژه، له صیاد څخه تر نوي کابل پورې د اوبو رسولو پروژه، او له للندر شاتوت څخه تر کابل پورې د اوبو رسولو پروژه ده.

ملا عبداللطیف منصور ډاډ ورکړی چې وزارت به په دغو پروژو کې د پانګونې لپاره اړینې آسانتیاوې برابرې کړي او ټینګار یې کړی چې د تخنیکي او اجرایي چارو د پرمخ بېولو لپاره دې د دواړو لورو ترمنځ تخنیکي ناستې ترسره شي.

په ورته وخت کې، ترکي پانګوالو د تخنیکي څېړنو او د پانګونې د راتلونکو پړاوونو د عملي کولو لپاره خپل چمتووالی اعلان کړی او له اوبو او انرژۍ وزارت سره یې د همکاریو پر دوام ټینګار کړی.

د طالبانو حکومت د کورنیو چارو وزارت ته د هند حکومت له لوري شپږ مجهز امبولانسونه وسپارل شول.

هند ویلي، چې دا مرسته یې د روغتیایي خدماتو چټکتیا او اغېزمنتیا لوړولو لپاره کړې ده او هدف یې د امنیتي ځواکونو او عامو خلکو روغتیایي اړتیاوې پوره کول دي.

د طالبانو حکومت د کورنیو چارو وزارت ویاند، عبدالمتین قانع، ویلي چې دا ګام د دواړو هېوادونو ترمنځ د بشردوستانه همکارۍ د دوام نښه ده او وزارت له هند حکومت څخه د مرستې مننه کوي.

د ملي عوامي ګوند مشر، ایمل ولي‌خان، د پاکستان د پوځ له خوا پر افغانستان د بې‌اساسه تورونو د لګولو په اړه سختې نیوکې کړي.

نوموړي ویلي، چې پاکستان هر ځل په خپل هېواد کې د امنیتي پېښو له پېښېدو وروسته، پرته له کومې پلټنې یا اسنادو، په بې‌ځايه توګه افغانستان تورنوي.

ایمل ولي‌خان همدارنګه د افغان کډوالو پر وړاندې د پاکستان د بد چلند غندنه کړې او خبرداری یې ورکړی چې دا کړنه به په پای کې د پاکستان لپاره ستره ستونزه جوړه کړي.

د پاکستان د جمعیت علما اسلام ګوند مشر، مولانا فضل الرحمن، د طالبانو حکومت د بهرنیو چارو وزیر مولوي امیرخان متقي او د کورنیو چارو وزیر خلیفه سراج الدین حقاني د وروستیو څرګندونو هرکلی کړی.

نوموړي ویلي، د پاکستان د دیني عالمانو مشورې د دواړو هېوادونو اړیکو او سیمه‌ییزې سولې لپاره ارزښت لري.

هغه ټینګار کړی چې واکمن باید د علماوو هڅې ومني او د پاکستان او افغانستان ترمنځ د همکارۍ او سولې د پیاوړتیا لپاره یې ملاتړ وکړي.

مولانا فضل الرحمن زیاته کړې چې دا هڅې باید پراخه او دوامداره شي.

د افغانستان لپاره د روسیې ځانګړي استازي ضمیر کابلوف ویلي، چې مسکو اوس مهال د افغان کارګرانو د پراخ استخدام لپاره هیڅ مؤثره میکانیزم نلري.

نوموړي ویلي چې د افغان کارګرانو په منځ کې د رادیکال عناصرو د شتون خطر شته.

کابلوف ټینګار کړی چې روسیه اړتیا لري د مهاجرینو جریان کنټرول کړي، فیلټرونه او قوانین وضع شي، او نشي کولی دروازې په بشپړ ډول پرانیستې وساتي.

هغه ویلي چې که دا کار په کنټرول سره نه وي، ښایي د «مخربو عناصرو» خطر زیات شي.

د طالبانو حکومت کار وزارت مخکې له دې پلان درلود چې افغان کارګران روسیې ته واستوي، او سفیر گل حسن حسن هم ویلي وو چې په دې تړاو خبرې روانې دي، خو تر اوسه کومه ځانګړې موافقه نه ده شوې.

د مکسیکو د سویل لوېدیځ په اوساکا ښار کې د اورګاډي د چپه کېدو له امله لږ تر لږه ۱۳ کسان وژل شوي او ۹۸ نور ټپیان دي.

راپورونه وایي، پېښه هغه مهال رامنځته شوه چې اورګاډی د اوساکا د نیزندا ښارګوټي ته نږدې له پټلۍ واوښت.

د پېښې پر وخت په اورګاډي کې ۲۴۱ مسافر سپاره وو، چې د څو ټپیانو روغتیايي وضعیت نازک بلل شوی دی.

د امریکا ولسمشر ډونالډ ټرمپ وایي، د اوکراین ولسمشر ولادیمیر زیلینسکي یې د سولې تړون پر اساسي چوکاټ راضي کړی او دواړه لوري د جګړې د پای ته رسولو مهم پړاو ته رسېدلي دي.

ټرمپ دا څرګندونې په فلوریډا کې له زیلینسکي سره تر لیدنې وروسته کړې او ویلي یې دي چې د سولې په خبرو کې، په ځانګړي ډول د اوکراین لپاره د امنیتي تضمینونو په برخه کې، د پام وړ پرمختګ شوی دی.

بلخوا، زیلینسکي ټینګار کړی چې هر ډول سوله باید د امنیتي تضمینونو پر بنسټ وي او وروستۍ پرېکړه به د اوکراین د اساسي قانون له مخې کېږي.

د پاکستان د شخړو او امنیتي مطالعاتو انسټیټیوټ (PICSS) په خپل وروستي راپور کې ویلي، چې په ۲۰۲۵ میلادي کال کې په دغه هېواد کې د تاوتریخوالي کچه په بې‌ساري ډول لوړه شوې ده.

د راپور له مخې، د شخړو اړوند مرګونه د تېر کال پرتله ۷۳ سلنه زیات شوي، چې پکې ۲۱۱۵ وسله‌وال، ۶۶۴ د امنیتي ځواکونو غړي او ۵۸۰ ملکي وګړي وژل شوي دي.

دغه بنسټ ۲۰۲۵ کال د پاکستان لپاره «د یاغیانو تر ټولو مرګونی کال» بللی دی.

راپور زیاتوي، چې دا کال د امنیتي ځواکونو لپاره هم له ۲۰۱۱ وروسته تر ټولو خونړی او د ملکي وګړو له پلوه په تېره یوه لسیزه کې تر ټولو بد کال و.

د انسټیټیوټ په وینا، په ۲۰۲۵ کال کې د ځانمرګو بریدونو او د وړو ډرون الوتکو کارونه زیات شوي او ټولټال ۱۰۶۳ وسله‌وال بریدونه ثبت شوي، چې ځانمرګي بریدونه پکې ۵۳ سلنه زیات شوي دي.

د پاکستان د شخړو او امنیتي مطالعاتو انسټیټیوټ (PICSS) په خپل وروستي راپور کې ویلي، چې په ۲۰۲۵ میلادي کال کې په دغه هېواد کې د تاوتریخوالي کچه په بې‌ساري ډول لوړه شوې ده.

د راپور له مخې، د شخړو اړوند مرګونه د تېر کال پرتله ۷۳ سلنه زیات شوي، چې پکې ۲۱۱۵ وسله‌وال، ۶۶۴ د امنیتي ځواکونو غړي او ۵۸۰ ملکي وګړي وژل شوي دي.

دغه بنسټ ۲۰۲۵ کال د پاکستان لپاره «د یاغیانو تر ټولو مرګونی کال» بللی دی.

راپور زیاتوي، چې دا کال د امنیتي ځواکونو لپاره هم له ۲۰۱۱ وروسته تر ټولو خونړی او د ملکي وګړو له پلوه په تېره یوه لسیزه کې تر ټولو بد کال و.

د انسټیټیوټ په وینا، په ۲۰۲۵ کال کې د ځانمرګو بریدونو او د وړو ډرون الوتکو کارونه زیات شوي او ټولټال ۱۰۶۳ وسله‌وال بریدونه ثبت شوي، چې ځانمرګي بریدونه پکې ۵۳ سلنه زیات شوي دي.

د چین پوځ د تایوان ټاپو شاوخوا پراخ ځمکني، سمندري، هوايي او توغندیز پوځي تمرینات پیل کړي او ویلي یې دي، دا تمرینونه د تایوان د تش په نوم خپلواکۍ غوښتونکو او بهرنیو پوځي مداخلو پر وړاندې د جدي خبرداري په مانا دي.

د چین د پوځ د ختیځې قومندانۍ ویاند شي‌يي ویلي، د «۲۰۲۵ عادلانه ماموریت» تر عنوان لاندې به ریښتینې ډزې هم ترسره شي او د تایوان شاوخوا پنځه سیمې به د لسو ساعتونو لپاره د سمندري او هوايي تګ راتګ پر مخ وتړل شي.

دا پوځي تمرینات په داسې حال کې ترسره کېږي، چې متحده ایالاتو تازه تایوان ته د ۱۱ میلیارد ډالرو څخه د زیاتو وسلو د پلور اعلان کړی او تایوان هم د خپل دفاعي ځواک د پیاوړتیا لپاره د ۴۰ میلیارد ډالرو اضافي بودجه منظوره کړې ده.