د هیواد پخواني ولسمشر حامد کرزي د امریکا د سټنفورډ پوهنتون له لوري د افغان هنرمندې فریده مهوش د هنري آثارو د خوندي کولو او ډیجیټل کولو هرکلی کړی او دا اقدام یې د افغانستان د کلتوري میراث د ساتنې په برخه کې یو مهم پرمختګ بللی دی.
کرزي ویلي، د استادې مهوش هنري آثار د افغانستان د موسیقۍ او فرهنګ نه بېلېدونکې برخه ده او د دغو آثارو ډیجیټل کېدل د راتلونکو نسلونو لپاره د ملي هنر د ژغورنې او انتقال مهم فرصت برابروي.
هغه زیاته کړې چې فریده مهوش د هېواد د موسیقۍ په ډګر کې د یوې ځلانده ستورې په توګه ارزښتمن خدمتونه ترسره کړي او د هغې هنري میراث د افغان کلتوري هویت یوه مهمه نښه ګڼل کېږي.
