د فرانسې یوې محکمې لس کسان د ولسمشر امانویل مکرون د مېرمنې برېژیت مکرون پر ضد د انلاین ځورونې او بدنامو افواهاتو د خپرولو په تور محکوم کړل.

د رویټرز خبري اژانس د راپور له مخې محکمې وویل، دغو کسانو په ټولنیزو شبکو کې ناسم او سپکوونکي مطالب خپاره کړي وو، چې پکې د هغې د هویت په اړه جعلي ادعاوې شاملې وې.

د محکمې د معلوماتو له مخې، دغو کسان په منظم ډول داسې ادعاوې خپرولې چې ګواکې برېژیت مکرون ټرانسجینډره ده او پخوا یې بل نوم درلود، په داسې حال کې چې دا ادعاوې بې‌بنسټه او دروغ ثابتې شوې.

محکمې دا ډول کړنې د فردي وقار او شخصي حریم ښکاره سرغړونه وبلله.

قاضي پر محکوم شویو کسانو د تر اته میاشتو پورې معلق بند سربېره، قانوني محدودیتونه هم ولګول او ټینګار یې وکړ چې د ټولنیزو شبکو له لارې د نفرت او جعلي معلوماتو خپرول به بې‌ځوابه پاتې نه شي.

پاکستان او چين په يوه ګډه اعلاميه کې ټينګار کړی، چې د افغانستان له خاورې بايد د هېڅ هېواد پر ضد وسله‌وال او ترهګريز فعاليتونه ترسره نه شي او د دې لپاره د «عملي او د باور وړ اقداماتو» غوښتنه شوې ده.

دغه اعلاميه د دواړو هېوادونو د بهرنيو چارو وزيرانو تر ستراتيژيکو خبرو اترو وروسته خپره شوې، چې پکې ويل شوي ترهګرې ډلې لا هم د سيمه‌ييز او نړيوال امنيت لپاره جدي ننګونه بلل کېږي.

اعلاميه کې دواړو لورو د طالبانو پر حکومت غږ کړی، چې يو ټول‌ګډونه سياسي جوړښت رامنځته کړي، متوازنې پاليسۍ خپلې کړي، پرمختګ ته لومړيتوب ورکړي او له ګاونډيو هېوادونو سره د باور پر بنسټ اړيکې ټينګې کړي.

چين د ترهګرۍ پر ضد د پاکستان د اقداماتو ستاينه کړې او دواړو هېوادونو د زغم تګلارې پر دوام، د امنيتي همکاريو پر پياوړتيا او د چين او پاکستان د اقتصادي دهليز د خوندي کولو پر ګډو هڅو ټينګار کړی دی.

د امریکا ولسمشر ډونالد ټرمپ یو ځل بیا د ایران مشرانو ته جدي خبرداری ورکړی او ویلي یې دي، که د ایران حکومت د تېرو وختونو په څېر د ولسي اعتراضونو پر ضد تاوتریخوالی وکاروي او خلک ووژني، واشنګټن به پرې سخت او دردناک اقدام وکړي.

ټرمپ دغه څرګندونې د امریکا د ولسمشرۍ الوتکې کې له خبریالانو سره د خبرو پر مهال وکړې، چې پکې یې په ایران کې د وروستیو اعتراضونو او د امنیتي ځواکونو د چلند په اړه پوښتنې ته ځواب ورکاوه.

هغه وویل، امریکا روان وضعیت له نږدې څاري او د خلکو پر ضد هر ډول خونړۍ کړنه به جدي پایلې ولري.

نوموړي ټینګار وکړ چې د ولسي اعتراضونو ځپل او د معترضانو وژل د منلو وړ نه دي، او زیاته یې کړه چې که د ایران چارواکي بیا هم دغه لاره خپله کړي، امریکا به چوپه خوله پاتې نه شي.

دا په لنډ وخت کې دوهم ځل دی چې ډونالد ټرمپ د ایران حکومت ته د معترضانو د وژلو په تړاو خبرداری ورکوي.

د ډنمارک صدراعظمې مېته فریډریکسن د امریکا له ولسمشر ډونالډ ټرمپ غوښتي، چې د ګرینلنډ د نیولو له ګواښونو دې لاس واخلي او د نړیوالو قوانینو درناوی دې وکړي.

نوموړې ویلي، امریکا د ډنمارک د شاهي قلمرو د هېڅ برخې د الحاق حق نه لري.

دغه غبرګون وروسته له هغه څرګند شو، چې ټرمپ یو ځل بیا ګرینلنډ د امریکا د امنیت لپاره «ضروري» وباله.

دا په داسې حال کې ده چې امریکا تازه پر وینزویلا پوځي برید کړی او ولسمشر نیکولاس مادورو یې نیولی دی، چې په کوپنهاګن کې یې اندېښنې زیاتې کړې دي.

د ګرینلنډ مشرتابه ټینګار کړی، چې دا ټاپو «د پلور لپاره نه دی»، او ډنمارک ویلي چې د خپلې ځمکنۍ بشپړتیا د ساتنې تمه لري، خو له امریکا سره د نږدې متحد په توګه د همکارۍ دوام غواړي.

د وینزویلا لنډمهالې ولسمشرې ډلسي روډریګز ویلي، چې د دغه هېواد خلک غواړي په خپل هېواد کې له بهرنیو فشارونو او ګواښونو پرته ارام ژوند ولري.

نوموړې ټینګار کړی چې د وینزویلا ولس د خپل برخلیک د ټاکلو حق لري او باید د نورو هېوادونو له لاسوهنې خوندي پاتې شي.

روډریګز په خپلو څرګندونو کې ویلي، د وینزویلا حکومت چمتو دی چې له متحده ایالاتو سره د ګډو ګټو پر بنسټ یو ګډ چوکاټ یا اجنډا رامنځته کړي.

د هغې په وینا، دا بلنه د متقابل درناوي، ملي حاکمیت او سیاسي تفاهم پر اصولو ولاړه ده.

هغې زیاته کړې چې د وینزویلا حکومت غواړي له امریکا سره اړیکو ته لومړیتوب ورکړي او هڅه کوي د اوږدې مودې ترینګلتیا پر ځای د خبرو، تفاهم او ډیپلوماسۍ له لارې ستونزې هوارې کړي.

د امریکا عدلیې ادارو یو افغان وګړی، عبدالله حاجي‌زاده، د ۲۰۲۴ کال د ولسمشرۍ ټاکنو پر ورځ د ترهګریز برید د پلان جوړولو په تور په ۱۵ کاله بند محکوم کړی دی.

د امریکا د کډوالۍ او ګمرکونو د پلي کولو ادارې (ICE) په رسمي بیان کې ویلي، چې نوموړي د داعش ترهګرې ډلې په ګټه د برید د ترسره کولو نیت درلود او هڅه یې کوله چې د یادې ډلې لپاره دوه وسلې ترلاسه کړي.

د عدلي اسنادو له مخې، د امنیتي ادارو پر وخت استخباراتي معلومات د دې لامل شول چې یاد پلان له عملي کېدو مخکې شنډ شي او حاجي‌زاده ونیول شي.

د بیان له مخې، عبدالله حاجي‌زاده به د خپلې بند مودې تر بشپړېدو وروسته له امریکا څخه شړل کېږي او افغانستان ته به ولېږدول شي.

د اِن‌فوډیکس معلوماتي شبکې لخوا د نړۍ هغه شل هېوادونه اعلان شوي چې د ښکلو ښځو له پلوه مخکښ بلل شوي دي.

په دغه نړیوال لېست کې ترکیه لومړی مقام خپل کړی، ورپسې برازیل او فرانسه راغلي دي.

د راپور له مخې، افغانستان هم په دې درجه‌بندۍ کې ځای لري او ۱۳م مقام یې ترلاسه کړی دی.

اِن‌فوډیکس لیکي چې دا درجه‌بندي د ظاهري ښکلا، کلتوري ځانګړنو، نړیوالو ټولنیزو نظرونو او رسنیزو ارزونو پر بنسټ ترسره شوې ده.

د نړۍ د ښکلو ښځو لرونکي ۲۰ هېوادونه:
ترکیه، برازیل، فرانسه، روسیه، ایټالیا، هند، وینزویلا، امریکا، سویډن، اوکراین، کولمبیا، ډنمارک، افغانستان، کاناډا، فلیپین، ارجنټاین، پورتو ریکو، پاکستان، هالنډ او بلغاریا.

راپور زیاتوي چې یاد لېست په ټولنیزو رسنیو کې پراخ غبرګونونه پارولي او د بېلابېلو هېوادونو کاروونکو پرې خپل نظرونه شریک کړي دي.

د یادونې ده چې دا سروې د Bscholarly په نوم د څېړنیز بنسټ لخوا په ۲۰۲۴ کال کې شوې چې نتیجه یې اوس خپره شوې ده.

راپورونه ښيي چې د وینزویلا د حکومت دننه د یوې سرچینې په ګډون یوې محدودې ډلې د ولسمشر نیکولاس مادورو ورځنی ژوند له نږدې څاره.

د لوړپوړو دفاعي چارواکو په وینا، د هغه د خوب، خوراک، تګ راتګ او آن د کورنیو حیواناتو معلومات هم راټولېدل.

دغه پټ بهیر د «بشپړ هوډ» په نوم عملیاتو ته لاره هواره کړه، چې له څو میاشتو پلان جوړونې، تمرینونو او استخباراتي ارزونو وروسته د دسمبر په لومړیو کې یې وروستۍ بڼه خپله کړه.

د مادورو د خوندي کور عین بېلګه جوړه شوې وه او د عملیاتو لپاره د ورتګ لارې څو ځله تمرین شوې وې.

سرچینې وایي، دا پلان په کلکه پټ ساتل شوی و او نه یوازې دا چې د امریکا کانګرس ته پرې مخکې خبر نه و ورکړل شوی، بلکې مشوره هم ورسره نه وه شوې.

امریکایي پوځي چارواکو عملیات د مناسب وخت او د حیرانتیا د شېبې لپاره ځنډولي وو.

که څه هم ولسمشر ډونالډ ټرمپ څو ورځې وړاندې د عملیاتو اجازه ورکړې وه؛ خو پوځ بیا هم د وروستي فرصت په تمه پاتې شو.

بالاخره، د شنبې په شپه د ځایي وخت له مخې د شپې لس بجې او پنځه څلوېښت دقیقې دغه عملیات د هوا، ځمکې او سمندر له لارې پیل شول او نږدې دوه ساعته او شل دقیقې یې دوام وکړ.

ولسمشر ټرمپ دا عملیات په فلوریدا کې له خپلو نږدې سلاکارانو سره په ژوندۍ بڼه څارل، چې د سي‌اي‌اې مشر جان راټکلېف او د بهرنیو چارو وزیر مارکو روبیو هم ورسره ناست وو.

ټرمپ وروسته وویل، دا عملیات یې د یوه تلویزیوني خپرونې په څېر تعقیب کړل او د ترسره کېدو پر څرنګوالي یې خوښي څرګنده کړه.

د امریکا له لوري د وینزویلا د ولسمشر تر نیول کېدو وروسته، د امریکا ولسمشر ډونالډ ترمپ د کولمبیا ولسمشر ګوستاوو پترو ته خبرداری ورکړی او ویلي یې دي چې د سیمې سیاسي وضعیت په چټک ډول د بدلون پر لور روان دی.

ټرمپ ادعا کړې چې د کوبا حکومت به ډېر ژر له جدي ستونزو سره مخ شي.

د امریکايي رسنیو د راپورونو له مخې، ترمپ ویلي: «کوبا د سقوط په درشل کې ده. داسې ښکاري چې دا هېواد د بشپړې ړنګېدنې پر لور روان دی. زه نه پوهېږم چې دوی به څنګه دا وضعیت وساتي، که یې وساتلی هم شي؛ خو دا مهال کوبا هېڅ عاید نه لري.»

ترمپ زیاته کړې چې د کوبا اقتصادي بنسټ تر ډېره د وینزویلا پر مرستو او په ځانګړي ډول د دغه هېواد پر نفتو ولاړ و، او اوس چې وینزویلا له بحران سره مخ ده، د هاوانا حکومت هم له سختو اقتصادي ننګونو سره مخ شوی دی.

د امریکا د بهرنیو چارو وزیر مارکو روبیو ویلي، په وینزویلا کې د امریکا روان اقدامات او عملیات افغانستان، عراق او لیبیا کې د امریکایي ځواکونو له پخوانیو ماموریتونو سره د پرتلې وړ نه دي.

نوموړي دا څرګندونې له سي‌بي‌اېس نیوز سره په مرکه کې کړې او ټینګار یې کړی چې وینزویلا یو لویدیځ هېواد دی او له منځني ختیځ، جنوبي اسیا او د سیمې له نورو هېوادونو سره یې پرتله کول ناسم دي.

روبیو ویلي، د وینزویلا وضعیت له سیاسي، جغرافیایي او ټولنیزو پلوه له هغو هېوادونو سره بنسټیز توپیر لري چې پخوا پکې امریکایي ځواکونه ښکېل پاتې شوي دي.

د هغه په وینا، په وینزویلا کې د امریکا اقدامات محدود، هدفمند او د ځانګړو ستراتیژیکو موخو پر بنسټ ترسره کېږي.

د امریکا د بهرنیو چارو وزیر همدارنګه زیاته کړې چې واشنګټن نه غواړي په وینزویلا کې د اوږدمهاله پوځي ښکېلتیا لاره خپله کړي او هڅه کوي چې موضوع د سیاسي او ډیپلوماټیکو لارو حل کړي.