د امریکا ولسمشر ډونالډ ټرمپ ویلي چې هغه تمه لري ایران به د واشنګټن د سولې وروستي وړاندیز ته خپله ځواب نن شپه ورکړي.

نوموړي ویلي: «زه تمه لرم چې د ایران له لوري به نن شپه یو لیک یا رسمي ځواب راشي، نو موږ به وګورو چې څه کېږي.»

په همدې حال کې، د امریکا د خزانې وزارت اعلان کړی چې پر ۱۰ کسانو او شرکتونو یې بندیزونه لګولي دي، ځکه هغوی د ایران د “شاهد” ډرونونو د تولید لپاره د وسلو او موادو په برابرولو کې مرسته کړې ده.

دا شرکتونه په چین او هانګ کانګ کې هم شامل دي.

راپورونه وايي، دغه بندیزونه داسې وخت اعلان شوي چې د امریکا او ایران ترمنځ د جګړې د پای ته رسولو خبرې د منځګړو هېوادونو په مرسته روانې دي، خو لا هم ځینې اختلافونه پاتې دي.

بل لور ته، روسیې ویلي چې د امریکا او ایران د خبرو ملاتړ کوي او غواړي چې په سیمه کې جګړه بیا ونه شي.

راپور زیاتوي، د امریکا استخباراتي ادارې وايي چې د ايران مذهبي مشر مجتبی خامنه‌یي د ایران د جګړې په ستراتیژۍ کې مهم رول لري، خو هغه له عامه صحنې څخه پټ دی او د روغتیايي ستونزو له امله تر درملنې لاندې دی.

د عوامي نېشنل ګوند د خیبر پښتونخوا څانګې مشر میا افتخار حسین په پېښور کې د باچا خان مرکز کې یوې غونډې ته ویلي چې د افغانستان په ګډون له ټولو ګاونډیو هېوادونو سره سوله‌ییزې او سوداګریزې اړیکې د وخت مهمه اړتیا ده.

نوموړي ویلي، جګړه هېڅ ستونزه نه شي حل کولی، بلکې نورې ستونزې زیاتوي.

د هغه په وینا، د افغانستان او پاکستان ترمنځ ټول اختلافات باید د خبرو او سیاسي لارو حل شي.

میا افتخار حسین زیاته کړې چې په تېرو پنځو لسیزو کې پښتنې سیمې د جګړو، ناامنۍ او وینې تویېدو سره مخ دي او لا هم په خیبر پښتونخوا کې هره ورځ خلک د ناامنۍ له امله وژل کېږي.

هغه وویلي، که په سیمه کې سوله‌ییزې اړیکې ټینګې شي، نو د پرمختګ، کاروبار او سوکالۍ نوې لارې به پرانیستل شي.

نوموړي همدارنګه ادعا کړې چې ځینې کړۍ په پښتنو سیمو کې ناامني د خپلو ګټو لپاره کاروي او هڅه کوي د سیمې پر طبیعي زیرمو او کانونو واک ترلاسه کړي.

سي‌اېن‌اېن وايي، د امریکا استخباراتي ارزونو ښودلې چې د ايران مذهبي مشر مجتبی خامنه‌یي د بدن د یوې برخې د سختو سوځېدنو له امله تر درملنې لاندې دی.

راپور وايي، د هغه مخ، لاس، د بدن پورتنۍ برخه او پښه سوځېدلې ده.

د راپور په وینا، مجتبی خامنه‌یي له هېڅ الکترونیکي وسیلې استفاده نه کوي او یوازې په حضوري ډول یا د استازي له لارې له خلکو سره اړیکه ساتي.

سرچینې زیاتوي، که څه هم ښايي مجتبی خامنه‌یي د جګړې د تګلارې په جوړولو کې رول ولري، خو د نه لاسرسي له امله اوس د سپاه پاسداران لوړپوړي چارواکي د محمد باقر قالیباف په ملتیا ورځنۍ چارې پر مخ وړي.

تر اوسه د ایران حکومت په دې اړه رسمي غبرګون نه دی ښودلی.

د نړیوالو رسنیو د راپورونو له مخې، ایران او امریکا ښايي راتلونکې اوونۍ په اسلام اباد کې مذاکرات بېرته پیل کړي.

راپورونه وايي، دواړه هېوادونه د منځګړو هېوادونو په همکارۍ د یوې ۱۴ ماده‌ییزې طرحې پر سر کار کوي، څو د تاوتریخوالي او جګړې د کمېدو لپاره یوه هوکړه رامنځته شي.

په دې طرحه کې د ایران د غني شویو یورانیمو د مدیریت موضوع شامله ده، چې ښايي د درېیم هېواد له لوري ترسره شي.

همداراز، په هرمز تنګي کې د ترینګلتیاوو کمول، د سمندري تګ راتګ خوندیتوب، او پر ایران د امریکا د بندیزونو د لرې کولو موضوعات هم شامل دي.

سرچینې وايي، امریکا غواړي ایران د اوږدې مودې لپاره د یورانیمو غني کول محدود کړي، خو ایران د لنډ مهاله محدودیت غوښتنه لري.

د دواړو لورو ترمنځ د همدې موضوع پر سر لا هم اختلاف موجود دی.

تر اوسه ایران او امریکا په رسمي ډول د دغو مذاکراتو بشپړ جزییات نه دي خپاره کړي.

د امریکا دفاع وزارت (پنټاګون) د جمعې په ورځ د نامعلومو هوایي پدیدو (UFO/UAP) اړوند ۱۶۲ نوې دوسیې افشا کړې، چې پکې د پوځ، FBI، ناسا او بهرنیو چارو وزارت له لوري ثبت شوي راپورونه، ویډیوګانې او انځورونه شامل دي.

دا اقدام د ولسمشر ډونالډ ټرمپ له هغې لارښوونې وروسته شوی چې د دغو موضوعاتو اړوند ټول حکومتي اسناد دې عام شي.

د خپرو شویو موادو په منځ کې ۱۲۰ PDF فایلونه، ۲۸ ویډیوګانې او ۱۴ انځوري مواد شامل دي.

په راپورونو کې د نړۍ له بېلابېلو سیمو څخه د نااشنا هوایي اجسامو مشاهدې ثبت شوې دي، چې پکې د نظامي الوتکو له خوا د ثبت شویو انفراریډ ویډیوګانو صحنې هم شاملې دي.

په ځینو ویډیوګانو کې کوچني سپین رنګه اجسام لیدل کېږي چې په غیر عادي ډول حرکت کوي، او په یو شمېر راپورونو کې ادعا شوې چې ځینې یې ناڅاپي ۹۰ درجې زاویې بدلونونه کوي او په لوړ سرعت الوت کوي.

د ۲۰۲۳ کال د یونان او منځني ختیځ راپورونه هم ښيي چې پیلوټانو د لوړ ارتفاع په فضا کې نااشنا او چټک حرکات لیدلي دي.

په تاریخي اسنادو کې د FBI هغه فایلونه هم شامل دي چې له ۱۹۴۷ څخه تر ۱۹۶۸ پورې د “Flying Discs” په اړه راپورونه لري.

د پنټاګون په وینا، دا ټولې قضیې “ناحل شوې” دي او تر اوسه هېڅ داسې ثبوت نه شته چې د فضایي موجوداتو شتون تایید کړي.

دغه اداره وایي چې ځینې معلومات د امنیتي دلایلو له مخې پټ ساتل شوي، خو د دې موضوع د لا څېړنې لپاره به د اسنادو افشا کول په راتلونکو اونیو کې هم دوام ولري.

د امریکا ولسمشر ډونالډ ټرمپ وایي چې د هغه په غوښتنه د روسیې او اوکراین ترمنځ درې ورځنی اوربند اعلان شوی، چې د روانې اوونۍ د غويي په ۱۹، ۲۰ او ۲۱ مې نیټې به نافذ وي.

ټرمپ په خپله ایکس پاڼه ټروت سوشیال اعلان کړی او ویلي یې دي چې د دې اوربند موخه د جګړې د درولو لپاره د یوې نوې هڅې پیل دی.

د هغه په وینا، په دغه اوربند کې به ټول پوځي عملیات ودرېږي او همدارنګه به د دواړو خواوو ترمنځ د ۱۰۰۰ بندیانو تبادله ترسره شي.

ټرمپ زیاته کړې چې دا طرحه مستقیماً د هغه له لوري وړاندې شوې او د روسیې ولسمشر ولادیمیر پوتین او د اوکراین ولسمشر ولودیمیر زیلنسکي یې ملاتړ کړی دی.

هغه ویلي: «هیله لرم چې دا د یوې اوږدې، خونړۍ او سختې جګړې د پای پیل وي.»

ټرمپ همدارنګه زیاته کړې چې د جګړې د پای ته رسولو لپاره روانې خبرې اترې دوام لري او په وینا یې، ښکېل لوري ورځ تر بلې یوې احتمالي هوکړې ته نږدې کېږي.

د چارو اداري پخواني رئیس فضل محمود فضلي، ویلي، پاکستان باید د خپلو چارواکو د څرګندونو، سیاستونو او تاریخي دریځونو له مخې وپېژندل شي، نه د تبلیغاتو او شعارونو پر بنسټ.

نوموړي د پاکستان د استخباراتو د پخواني مشر جنرال حمید ګل، هغې څرګندونې ته اشاره کړې چې ویلي یې وو: «د پاکستان د پوځ هر مشر د امریکا په امر ټاکل کېږي، او پاکستان له امریکا پرته دوام نه شي کولی.»

فضلي زیاته کړې، افغانان هېڅکله د خپل هېواد په اړه د کم‌ترۍ او حقارت احساس نه لري، ځکه افغانستان د نړۍ د سترو امپراتوریو له شتون مخکې هم خپلواک موجود و او وروسته به هم خپله بقا وساتي؛ خو د هغه په وینا، پاکستان خپله سیاسي او امنیتي بقا له بهرنیو قدرتونو، په ځانګړي ډول امریکا سره تړي.

هغه ټینګار کړی چې افغانستان د تاریخي هویت او ولسي مقاومت له امله تلپاتې دی، خو پاکستان د بهرنیو ملاتړونو پرته د دوام وړتیا نه لري.

د امریکا د بهرنیو چارو وزیر مارکو روبیو چې دا مهال ایټالیا ته په سفر تللی، ویلي چې امریکا به هېڅکله دا ونه مني چې د هرمز تنګي کنټرول دې د ایران په لاس کې وي.

هغه زیاته کړې، نړیواله ټولنه هم په دې سلا ده چې ایران ته د اټومي وسلو ترلاسه کول د منلو وړ نه دي.

روبیو د لبنان د وضعیت په اړه هم خبرې کړې او ویلي یې دي چې واشنګټن غواړي د لبنان مشروع حکومت پیاوړی وي، خو د ده په وینا حزب‌الله د دې بهیر پر وړاندې خنډ دی.

د امریکا د بهرنیو چارو وزیر ټینګار کړی چې حزب‌الله په بشپړه توګه د ایران نیابتي ځواک دی او پرته له تهران څخه دوام نه شي کولی.

نوموړي همداراز ویلي، امریکا هڅه کوي د حزب‌الله مالي سرچینې بندې کړي او د دې ډلې د تمویل مخه ونیسي.

راپورونه وايي، د پاکستان او هند د ۲۰۲۵ کال د مې میاشتې له شخړې یو کال وروسته، پاکستان د سیمې په جیوستراتیژیک توازن کې نوی رول خپل کړی، داسې هېواد چې له سخت پوځي فشار وروسته یې خپل اټومي ظرفیت د ډیپلوماتیک نفوذ په وسیله بدل کړی.

تېر کال د مې په ۷مه د پاکستان او هند ترمنځ سختې نښتې وشوې، چې پکې د دواړو لورو د هوایي بریدونو، ډرونونو او توغندیو تبادله رامنځته شوه.

دې نښتو هغه وخت د نړۍ پام ځان ته واړاوه، ځکه دواړه هېوادونه اټومي ځواکونه دي او د شخړې پراخېدو وېره موجوده وه.

د هند له لوري د “سندر عملیات” په نوم پوځي بریدونه ترسره شول، چې د پاکستان په ځینو سیمو کې یې اهداف په نښه کړل.

په ځواب کې پاکستان هم د بېلابېلو پوځي اهدافو د ویشتلو ادعا وکړه او وضعیت تر ډېره وخته ترینګلی پاتې شو.

د راپورونو له مخې، د دې کړکېچ وروسته د نړیوالو فشارونو او منځګړیتوب له لارې اوربند رامنځته شو، خو د دواړو هېوادونو ترمنځ سیاسي او ډیپلوماتیک اختلافات لا هم پر ځای پاتې دي.

هند وایي، دا پوځي عملیات د “ترهګرۍ ضد اقدام” و، او اسلام‌اباد تورنوي چې له وسلوالو ډلو ملاتړ کوي.

بل لور ته پاکستان دا ادعاوې ردوي او وایي چې هند د خپلو کورنیو ستونزو د پټولو لپاره د پاکستان پر ضد تبلیغاتي جګړه پر مخ وړي.

پاکستانی پوځ ادعا کوي چې د هغه کال په نښتو کې یې د هوايي دفاع وړتیاوې یوازې د خپلو اصلي ظرفیتونو یوه کوچنۍ برخه وښودله، او دا د هند لپاره یو واضح پیغام و چې د پاکستان دفاعي ځواک کمزوری نه دی.

شنونکي وایي، د دې کړکېچ وروسته پاکستان په تدریجي ډول له یوه دفاعي حالت څخه د سیمه‌ییز منځګړي رول ته داخل شوی دی.

اوس اسلام‌اباد هڅه کوي چې د ایران او لوېدیځ ترمنځ د اړیکو په شمول په نورو سیمه‌ییزو بحرانونو کې هم د ډیپلوماتیک پل رول ولوبوي.

شنونکي خبرداری ورکوي چې د هند او پاکستان ترمنځ کړکېچ لا هم د “هش ردع” په حالت کې دی، او هره نوې شخړه کولی شي وضعیت بیا خطرناک کړي.

‏د پاکستان د جمعیت علماء اسلام مشر مولانا فضل الرحمن د ګوند یو بل غړی هم په ډزو ووژل شو.

د راپورونو له مخې، د دغه ګوند یاد غړی مولانا عبدالحق د جنوبي پښتونخوا په خانوزیو سیمه کې د نامعلومه وسله والو لخوا هدف ګرځول شوی دی.

تر اوسه د دغه برید مسولیت کومې ډلې پرغاړه نه دی اخیستی.