پاکستان، سعودي عربستان او ترکیې د جمعې په ورځ په مکه مکرمه کې درېاړخیز دفاعي تړون لاسلیک کړ.
د ګډې خبرپاڼې له مخې، د دې تړون موخه د هر ډول بهرني برید پر وړاندې د درې واړو هېوادونو د ګډې دفاعي او مخنیوي وړتیا پیاوړې کول دي.
په خبرپاڼه کې ویل شوي چې که له دغو درېیو هېوادونو په هر یوه وسلهوال برید وشي، دا به د ټولو پر وړاندې برید وګڼل شي او غړي هېوادونه به د ګډې دفاع له اصل سره سم یو له بل سره همکاري کوي. همدارنګه، تړون د پوځي همکاریو، ګډو پوځي تمرینونو، استخباراتي معلوماتو د شریکولو او دفاعي ټکنالوژۍ د پراخولو زمینه هم برابروي.
دا تړون د سعودي ولیعهد محمد بن سلمان، د ترکیې ولسمشر رجب طیب اردوغان او د پاکستان لومړي وزیر شهباز له لوري لاسلیک شوی.
چارواکو ټینګار کړی چې دا یو دفاعي تړون دی او د کوم ځانګړي هېواد پر ضد نه دی جوړ شوی.
دغه تړون داسې مهال لاسلیک کیږي چې سیمه د ایران د جګړې، د غزې کړکېچ او د سره سمندر او خلیج د امنیتي اندېښنو له امله له زیات تاوتریخوالي سره مخ ده.
