د طالبانو حکومت د ریاستالوزراء اقتصادي مرستیال ملا عبدالغني برادر د جوزجان ولایت د یتیمتاق د ګازو له سیمې لیدنه کړې ده.
د طالبانو حکومت تر کنټرول لاندې د افغان ګاز دولتي شرکت د مسوولینو په وینا، اوس مهال په دې سیمه کې اووه څاهګانې فعالې دي، چې هره ورځ تر ۶۵۰ زره مترمکعب ډېر ګاز ترې استخراج او له پروسس وروسته بازار ته وړاندې کېږي.
مسوولینو ویلي، د پنځو نورو څاهګانو د کیندلو قرارداد له یوه بهرني شرکت سره لاسلیک شوی او عملي چارې یې پیل شوې دي.
ملا برادر د ګازو د استخراج پر مهال د معیارونو پر مراعتولو ټینګار کړی او له پانګوالو یې غوښتي، چې د افغانستان د طبیعي ګازو په استخراج او پروسس کې پانګونه وکړي.
