د طالبانو حکومت د ریاستالوزرا اقتصادي معاونیت وايي، په فاریاب ولایت کې د میمنې–اندخوی د ۱۱۰ کیلوولټ برېښنا لېږد مزي د بیارغونې پروژه ګټې اخیستنې ته سپارل شوې ده.
د دغه معاونیت د معلوماتو له مخې، د پروژې په بشپړېدو سره شاوخوا ۶۰ زره برېښنا مصرفوونکو ته د باثباته برېښنا زمینه برابره شوې.
د برېښنا لېږد مزی ۱۳۵ کیلومتره اوږدوالی لري او د بیارغونې چارې یې شاوخوا ۱۴۵ میلیونه افغانۍ لګښت لري. د پروژې چارې د افغان انجینرانو له خوا ترسره شوې او مالي لګښت یې د طالبانو حکومت ورکړی دی.
د ریاستالوزرا اقتصادي مرستیال ملا عبدالغني برادر د پروژې د پرانیستې پر مهال ویلي، چې په راتلونکي یو کال کې به د برېښنا د زېربناوو د پراختیا نورې پروژې هم عملي او د برېښنا اوسنی ظرفیت به څو برابره لوړ شي.
