د فرانسې رسنیو او ځینو خبري سرچینو راپور ورکړی، چې د فرانسې حکومت له طالبانو سره پاریس کې د افغانستان سفارت د چارو ورسپارلو او د طالبانو د استازو د ورلېږلو په اړه هوکړې ته نږدې شوی دی.
د طالبانو د بهرنیو چارو وزارت ته نږدې سرچینو ویلي، چې د هوکړې له مخې به په لومړي پړاو کې څلور طالب ډیپلوماټان فرانسې ته واستول شي او اوس د ویزو ترلاسه کولو ته په تمه دي. خو په پاریس کې د افغانستان سفارت ته نږدې سرچینو د دوو طالب ډیپلوماټانو د ورتګ خبره کړې ده.
ویل کیږي، دا هوکړه له فرانسې سره د هغو افغانانو د هویت په تثبیت کې د طالبانو له همکارۍ سره تړاو لري چې فرانسه یې بېرته افغانستان ته ستنول غواړي.
تر دې مخکې «لوموند» ورځپاڼې راپور ورکړی و، چې طالبانو پاریس کې په افغان کونسلګرۍ کې د یوه کاري پلاوي د جوړولو لپاره د فرانسې اصولي موافقه ترلاسه کړې ده.
خو د فرانسې د بهرنیو چارو وزارت د نومبر په پنځمه ویلي، چې دغه هېواد طالبان په رسمیت نه پېژني او د پېژندلو اراده یې هم نه لري. د دغه وزارت ویاند زیاته کړې، چې له طالبانو سره خبرې یوازې د هغو افغانانو د بېرته ستنولو په اړه په تخنیکي کچه دي چې په فرانسه کې په ناقانونه توګه اوسېږي او د فرانسې د عامه امنیت لپاره ګواښ بلل کیږي.
