د ملي دیموکراتیک غورځنګ مشر محسن داوړ ویلي، په پاکستان کې له محرومو او څنډهییزو سیمو سره د حکومت استعماري چلند وضعیت داسې پړاو ته رسولی چې د جبران امکان یې ډېر کم شوی او هېواد له ژور سیاسي او اداري بحران سره مخ دی.
داوړ زیاته کړې، تر هغې چې په پاکستان کې د اساسي قانون له مخې ټاکل شوی حکومت اصلي واک ونه لري او پرېکړې د پردې تر شا ځواکمنې کړۍ (په ځانګړي ډول پوځي اسټېبلېشمنټ) کوي، هېڅ حکومت به بریالی نه شي.
هغه ټینګار کړی چې د هېواد د روانو ستونزو د حل لپاره یوازنۍ لار د یوه نوي ټولنیز تړون رامنځته کول دي.
