پر مسکو د اوکراین د بېپیلوټه الوتکو پراخو بریدونو د روسیې د پارلماني ټاکنو وروستۍ ورځ اغېزمنه کړه، په داسې حال کې چې لومړنۍ پایلې ښيي د ولسمشر ولادیمیر پوتین ملاتړی «متحده روسیه» ګوند (United Russia) د رایو په شمېر کې مخکښ دی.
د راپورونو له مخې، اوکرایني ځواکونو د ټاکنو په وروستۍ ورځ پر مسکو او شاوخوا سیمو د بې پېلوټه الوتکو بریدونه کړي دي.
د روسیې چارواکو ویلي، په دغو بریدونو کې ځینې ودانۍ او د تېلو یوه فابریکه زیانمنه شوې او د مرګژوبلې راپورونه هم ورکړل شوي دي.
د روسیې د ټاکنو د کمېسیون د لومړنیو معلوماتو له مخې، «متحده روسیه» ګوند د رایو په لومړنیو شمېرنو کې نږدې ۵۸ سلنه رایې ترلاسه کړې دي.
دا د اوکراین د جګړې له پیل وروسته د روسیې لومړنۍ پارلماني ټاکنې بلل کېږي.
د روسیې ولسمشر ولادیمیر پوتین دغه ټاکنې د جګړې پر وړاندې د خلکو د ملاتړ د ارزونې په توګه یادې کړې وې.
روسي چارواکو ویلي چې ټاکنې له امنیتي ستونزو سره سره ترسره شوې، خو د مخالفو ډلو ځینو غړو پر ټاکنیزې پروسې نیوکې کړې دي.
