د روغتیا نړیوال سازمان په افغانستان کې د شکر ناروغۍ د تشخیص او درملنې لپاره د لا زیاتو پانګونو پر اړتیا ټینګار کړی او ویلي یې دي، چې دا ناروغي په هېواد کې د عامې روغتیا له مهمو ستونزو ده.
په افغانستان کې د دغه سازمان استازي ډاکټر اډوین سینیزا سلواډور د شکر ناروغۍ نړیوالې ورځې په مناسبت ویلي، ډېری کسان هغه مهال د شکر پر ناروغۍ د اخته کېدو خبر ترلاسه کوي، چې د دې ناروغۍ له امله له روغتیايي ستونزو او عوارضو سره مخ شوي وي.
د نوموړي په وینا، اوس مهال په هرو شلو عامه روغتیايي مرکزونو کې یوازې یو مرکز د شکر ناروغۍ د تشخیص خدمات وړاندې کوي.
هغه له ۴۰ کلونو او پورته عمر لرونکو کسانو غوښتي چې د وینې د شکر معاینې لپاره نږدې روغتیايي مرکز ته مراجعه وکړي؛ ځکه پر وخت تشخیص کولی شي د سترګو او پښتورګو له زیان او د دې ناروغۍ له نورو جدي عوارضو مخنیوی وکړي.
