د امریکا، روسیې او چین ولسمشران به د راتلونکې پنجشنبې په ورځ د چین په شنژن ښار کې په یوه بېسارې درېاړخیزه غونډه کې سره وګوري؛ دا به د نړۍ د درېیو سترو اټومي قدرتونو د مشرانو لومړنۍ ګډه ناسته وي.
سپینې ماڼۍ د جمعې په ورځ د دې غونډې پلان تایید کړ او ویې ویل چې ډونالډ ټرمپ، ولادیمیر پوتین او شي جینپینګ به د اسیا-پسفیک اقتصادي همکاریو (APEC) سرمشریزې په څنډه کې خبرې وکړي.
ټرمپ غواړي له خپلو چینايي او روسي سیالانو سره د ایران د جګړې او د درېیو هېوادونو د اټومي وسلو د زېرمو په اړه بحث وکړي. هغه هیله لري چې د اټومي وسلو د کنټرول په برخه کې د یوې ګډې هوکړې لپاره زمینه برابره کړي.
خو د امریکا یوه جګپوړي چارواکي، چې د نوم نه خپرېدو په شرط یې له خبریالانو سره خبرې کړې، ویلي چې د اوکراین جګړه به د دې ناستې د بحثونو برخه نه وي.
دا غونډه په داسې وخت کې جوړېږي چې د واشنګټن، بیجینګ او مسکو ترمنځ اړیکې له بېلابېلو سیاسي او امنیتي اختلافاتو سره مخ دي.
ټرمپ له تېر کال راهیسې، د سوداګریزې جګړې له اوربند وروسته، له شي جینپینګ سره د اړیکو د ښه کولو هڅې کړې دي؛ خو د ایران پر وړاندې د امریکا جګړې د دواړو هېوادونو ترمنځ نوي اختلافات رامنځته کړي دي.
له بلې خوا، ټرمپ له پوتین سره هم د اړیکو د نږدې کولو هڅه کړې، په داسې حال کې چې روسیه په اوکراین کې جګړې ته دوام ورکوي او له ایران سره یې پوځي، استخباراتي او ډیپلوماټیکې همکارۍ پراخې کړې دي.
سیاسي شنونکي وايي، د درېیو مشرانو دا ګډه ناسته تاریخي اهمیت لري، خو تمه نه کېږي چې د نړیوالو کړکېچونو په حل کې دې د پام وړ پرمختګ رامنځته کړي. د دوی په باور، د غونډې سیاسي او سمبولیک ارزښت ښايي تر عملي پایلو ډېر وي.
