د جرمونو نړیوالې محکمې (ICC) قاضیانو په افغانستان کې د امریکايي ځواکونو او داعش خراسان ډلې د احتمالي جنګي جرمونو اړوند څېړنې په رسمي ډول د تړلو پرېکړه کړې او خپل تمرکز یې د ۲۰۲۱ کال راهیسې د طالبانو حکومت پر کړنو محدود کړی دی.
د رویټرز د راپور له مخې، قاضیانو ویلي چې څارنوالانو نه ده ثابته کړې چې د طالبانو حکومت اړوند قضیې پرته، د افغانستان په اړه نورې ادعاوې په اغېزمنه توګه څېړلی شي.
د راپور له مخې، د محکمې څارنوالۍ د قاضیانو د دې پرېکړې پر وړاندې د استیناف غوښتنه کړې، خو په دې اړه یې نور جزئیات نه دي ورکړي.
دا پرېکړه په داسې حال کې شوې چې امریکا تر دې وړاندې د نړیوالې جنايي محکمې پر وړاندې د خپلو ځواکونو د کړنو د څېړنې او د اسرائیلي چارواکو د نیولو د حکمونو له امله بندیزونه لګولي وو.
د دې پرېکړې سربېره، د طالبانو حکومت د څلورو لوړپوړو چارواکو د نیولو حکمونه لا هم پر خپل ځای پاتې دي. په دې کسانو کې د طالبانو حکومت مشر ملا هبتالله اخوندزاده، د سترې محکمې رئیس شیخ عبدالحکیم حقاني، د پوهنې وزیر مولوي حبیبالله آغا او د لوړو زدهکړو وزیر مولوي ندا محمد ندیم شامل دي.
