د ټولنیزو رسنیو یو شمېر طالب کاروونکي په ممبي کې د طالبانو له لوري د قونسل په توګه د اکرام الدین کامل په نوم د یو کس ټاکل کېدو ته په غصه شوي دي.
دوی له درې رنګه ملي بیرغ سره د کامل عکسونه نشر کړي او ویلي یې دي، چې نوموړی د جمهوریت پلوی دی او تېره شل کلنه جګړه کې ونډه نه ده اخیستې.
بل لورته یو شمېر نورو طالب پلویانو ویلي، چې کامل د نن ټکي اسیا ویبسایټ چلوو او جمهوریتي نه دی.
د طالبانو حکومت سیاسي مرستیال مولوي عبدالکبیر بامیانو ته په خپل سفر کې له خلکو سره په لیدنه کې ویلي، چې اوس مهال په افغانستان کې هر ډول توپیري چلند له منځه تللی دی.
مولوي عبدالکبیر له ځايي خلکو سره په ناسته کې ویلي، چې په افغانستان کې د انکشافي او بنسټیزو پروژو په پلي کولو کې توازن په نظر کې نیول شوی دی.
د هغه په خبره، په تېر شل کلنه جګړه کې د افغانستان خلک د دوی تر شا ولاړ وو.
د طالبانو حکومت د کورنیو چارو سرپرست وزیر سراج الدین حقاني ویلي، چې له خلکو سره باید ښه چلند وشي.
هغه په میدان وردګ ولایت کې یوې غونډې ته ویلي، چارواکي باید وظیفوي غفلت ترسره نه کړي او له خلکو سره په چلند کې له نرمښت کار واخلي.
نوموړي دغه راز طالب سرتېرو ته سپارښتنه کړې، چې خپلې چارې په سم ډول ترسره کړي.
د اسرائیل د بهرنیو چارو وزیر جدعون سار وایي، حزب الله ډلې سره د جګړې د ختمېدو برخه کې د خبرو په اړه پرمختګ شوی دی.
جدعون سار خبریالانو ته ویلي، اسرائیل په دې برخه کې له امریکا سره په ګډه کار کوي.
نوموي د دې اقدام لپاره ویلي، چې په دې اړه کېدونکې هوکړه کې باید داسې اجرائیوي میکانیزم شامل وي، چې د دوی خاورې ته نږدې د حزب الله د تاسیساتو مخه ونیسي.
د متحدې جبهې مشر جنرال سمیع سادات ویلي، چې د ډونالډ ټرمپ له لوري مایک والټز ته د ملي امنیت د سلاکار په توګه د ټاکل کېدو مبارکي وایم.
ښاغلي سادات په خپله ایکسپاڼه لیکلي، چې مایک والټز هغه سړی دی چې د افغانستان د جګړې په ډګر کې یې له امریکا او افغان وروڼو سره اوږه په اوږه مبارزه کړې ده.
نوموړي زیاته کړې، چې دا د یوې ښې راتلونکې او د طالبانو لپاره یو بد کال دی.
سادات دغه راز ویلي، چې په افغانستان کې له مایک والټز سره کار کولو ته سترګې په لار یم.
د طالبانو حکومت د بهرنیو چارو وزارت سیاسي مرستیال شېر محمد عباس ستانکزی وایي، چې په ملګرو ملتونو کې د افغانستان څوکۍ د دوی حق دی او باید ور وسپارل شي.
عباس ستانکزي په خپله ایکسپاڼه لیکلي، د دوی حکومت له هېڅ هېواد سره ستونزه نه لري او د سولې او ثبات ملاتړ کوي.
تر دې وړاندې هم ډېری طالب چارواکو ددغې څوکۍ د ور سپارلو غوښتنه کړې ده.
څه موده وړاندې د ملګرو ملتونو د سرمنشي مرستیالې ویلي و، چې د افغانستان لپاره د ځانګړي استازي د ټاکلو خبره د یوې مودې لپاره ځنډېدلې ده.
دوحه کې د طالبانو حکومت د سیاسي دفتر مشر سهیل شاهین ویلي، چې د امریکا منتخب ولسمشر ډونالډ ټرمپ تر ډېره د عمل سړی ښکاري.
هغه ویلي، د مسایلو د حل په برخه کې اړتیا ده چې ټول لوري ریښتیني وي.
هغه له یوې جاپانۍ رسنۍ، NHK سره په مرکه کې ټینګار کړی چې له نړۍوالې ټولنې او امریکا سره مثبت تعامل ته چمتو دي.
وړمه ورځ د طالبانو حکومت د ریاست الوزرا سیاسي مرستیال مولوي عبدالکبیر هم ویلي وو چې ټولو سره تعامل غواړي.
د افغان سولې لپاره د امریکا ځانګړي پخواني استازي زلمي خلیلزاد د ډونالډ ټرمپ له لوري په افغانستان کې د امریکايي ځواکونو د پخواني افسر مایک والټز ټاکل کېدو په اړه ویلي، چې هغه یو زړور او هوښیار انسان دی.
نوموړي ویلي، والټز تر دې وړاندې په افغانستان کې ازمایل شوی او خپله دنده یې په مېړانې ترسره کړې ده.
د یادونې ده، چې مایک والتز اوس مهال د امریکا د استازو په جرګه کې د فلوریډا ایالت استازی دی.
د امریکا نوي ولسمشر ډونالډ ټرمپ په افغانستان کې د امریکايي ځانګړو ځواکونو پخوانی افسر مایک والټز د ملي امنیت سلاکار په توګه ټاکلی دی.
والټز تر دې وړاندې د افغانستان لپاره د متحده ایالاتو په پالیسۍ او ستراتیژۍ جوړولو په برخه کې هم کار کړی او له طالبانو سر د جګړې مخینه هم لري.
والټز له افغانستانه د امریکا د وتلو په اړه د جوبایډن پر ادارې سختې نیوکې کوي او دغه بهیر یې «شرموونکی» بللی دی.
د یادونې ده چې تېر کال د افغان سولې لپاره د امریکا پخواني ځانګړي استازي زلمي خلیلزاد د کانګرس یوې استماعیه غونډې ته ویلي وو چې طالبان د القاعدې او داعش په ځپلو کې بریالي شوي، خو والټز پرې نیوکه کړې وه او ویلي وو چې ترهګرې ډلې د له منځه وړلو لپاره په بلې ترهګرې ډلې تکیه کول خطرناک او لویه تېروتنه ده
د ارغواني شنبو غورځنګ وایي، چې په افغانستان کې د نجونو پر زده کړو بندیز دغه هېواد له یو لوی ناورین سره مخ کړی دی.
یاد غورځنګ ویلي، چې د نجونو پر زده کړو بندیز د افغان نجونو ټولې هیلې وژلې دي.
دغه غورځنګ زیاته کړې، چې دغه بندیزونه نه یوازې له بنسټیزو بشري حقونو د سرغړونو یوه بېلګه ده؛ بلکې په راتلونکو کلونو کې د لا شاتګ لامل هم ګرځېدای شي.
یاد غورځنګ دغه راز ویلي، چې د نجونو پر زده کړو د بندیز له کبله د طالبانو حکومت نجونې له یوه ناڅرګند برخلیک سره مخ کړې دي.