د پخواني حکومت د سولې د مذاکراتي ټیم مشر معصوم ستانکزی وایي، د افغان ښځو د زدکړو حق باید ورکړل شي.
نوموړی وایي، د اسلامي نظام اساس زدکړې دي او د اسلامي نظام او اجماع غوښته تعلیم ده.
هغه زیاتوي، هیڅوک عقل کل نشي کېدلای چې د ټولې اسلامي ټولنې خلاف روان وي.
د جمهوري حکومت لومړی مرستیال امرالله صالح وایي، له ۲۰۲۱ کال راهیسې نږدې یو زر او دوه سوه کسان په کونړ او ننګرهار کې د طالب استخباراتو له لوري وژل شوي دي.
ښاغلي صالح په خپله ایکسپاڼه لیکلي، دا کسان د طالبانو د استخباراتو د یو رییس ډاکټر بشیر په واسطه له محکمې پرته وژل شوي دي.
صالح ویلي، طالبانو کابل ته له ننوتو یوه ورځ وروسته په ۴۰۰ بستریز روغتون کې ټپي عسکر په ډزو وویشتل.
نوموړي زیاته کړې، چې د طالبانو يوه چارواکي د دغه جنايت د مسووليت د مخنيوي په موخه رسنيو ته له جسدونو څخه د يوه ډک کانټينر د کشف خبر ورکړ.
امرالله صالح د یادو کسانو د هویت په اړه ډېر معلومات نه دي ورکړي؛ خو تر دې وړاندې د ننګرهار په کانال نهر کې هم د ګڼو خلکو جسدونه موندل شوي دي.
سعودي عربستان په کابل کې بېرته خپله استازولي پرانېستله.
د افغانستان لپاره د سعودي سفارت پر خپله ایکس پاڼه لیکلي چې دا چاره د افغانستان ولسونو ته د خدمت لپاره ترسره کوي او سر له نن څخه یې کارونه پیل دي.
واک ته د طالبانو تر رسېدو وروسته؛ سعودي کابل کې خپل سفارت تړلی وو.
د ننګرهار پخوانی والي ضیاءالحق امرخېل وایي، یوازې کانونه د افغانستان درد نشي دوا کولی؛ ترڅو د زدکړو په څېر با ارزښته برخې ته کار نه وي شوی.
ښاغلي امرخېل په خپله ایکسپاڼه لیکلي، له یو لوري د نجونو پر زدکړو بندیز دی او له بل لوري د نارینهوو زدکړې هم له مسلکي پلوه د خرابېدو لوري ته روانې دي، چې په اوږد مهال کې به د افغانستان لپاره نه جبرانېدونکی زیان وي.
نوموړي زیاته کړې، یو اسلامي هېواد کې یې یوه اوونۍ تېره کړه او هلته یې د نجونو زدکړو ته په کتو د خپلو افغانو نجونو پر حال افسوس وکړ.
هغه دغه راز ویلي، احتیاج د ولسونو عزت النفس وژني او له دغې بیماري د خلاصون لپاره کار پکار دی.
د تحریر شام ډلې مشر محمد الشرع د ترکیې د بهرنیو چارو وزیر هاکان فیدان او د لبنان د دروزي قوم مشر ولید جنبلاط سره لیدلي دي.
دا لیدنه د سوریې په پلازمېنه دمشق کې شوې ده.
په دې لیدنه کې د الشرع له لوري د نیکټايي او رسمي لباس لرل د پام وړ ټکی بلل شوی دی.
هغه واک ته له رسېدو سره سم ویلي وو، چې له نکټايي سره کومه ستونزه نه لري.
د طالبانو حکومت مشر شیخ هبت الله اخندزاده په یو نوي فرمان کې د ټولو هغو کسانو قضیې لغوه کړې چې تېر حکومت کې له طالبانو سره په همکارۍ تورن وو.
په یاد فرمان کې راغلي، چې اړوندې ادارې مکلفې دي ترڅو د دغو کسانو معلومات له بایومټریک سیسټم، عدلي اسنادو، امنیتي او کشفي اسنادو او له ټولو اداري او برېښنايي اسنادو څخه پاک کړي.
د یادونې ده چې دا په تېرو دوو ورځو کې د طالبانو د مشر درېیم فرمان دی.
د ایټالیې لومړۍ وزیرې یو وار بیا دغه هېواد ته د غیرقانوني کډوالو ورتګ یو امنیتي ګواښ یاد کړ او زیاته یې کړه، چې دوی باید خپلې پولې د روسیې د ګواښونو او جنګي ډلو د ورتګ پر وړاندې خوندي کړي.
جورجیا ملوني په یو خبري کنفرانس کې ویلي، چې د کډوالو مسئلې ته یې د یوې همغږۍ په سترګه کتل یوه تېر وتنه ده او دوی نشي کولای، چې له دې کبله خپلې پولې خوندي کړي.
دا په داسې حال کې ده، چې اوس مهال دغه هېواد ته د غیر قانوني کډوالو ورتګ زیات شوی.
د ایران مذهبي مشر علي خامنهيي وايي، دوی هیڅ نیابتي ډلې نه لري او دا ادعا بې اساسه ده، چې ایران اوس مهال خپلې نیابتي ډلې له لاسه ورکړې دي.
نوموړي ویلي، که ایران اقدام کوي؛ نو هیڅ نیابتي ډلې ته اړتیا نه لري.
دی دا څرګندونې په داسې حال کې کوي، چې په منځني ختیځ کې ګڼ شمېر ډلې د ایران د نیابتي ډلو په نوم یادېږي، چې ظاهرا ورسره دغه هېواد مرستې هم کوي.
د روسیې دفاع وزارت اعلان کړی، چې له شنبې تر یکشنبې یې د اوکراین ۴۲ بېپیلوټه الوتکې رانسکورې کړې دي.
یاد وزارت ویلي، چې دا الوتکې د روسیې په پنځو ځایونو کې لوېدلې دي.
د سرچینې د معلوماتو له مخې، یادې الوتکې په اوریول، روستوف، بریانسک، کرانسنودار سیمه کې لوېدلې دي.
سره له دې، چې د الوتکو لوېدو په پېښه کې چاته کوم زیان نه دی اوښتی؛ خو د اوریول سیمې د امنیتي ځواکونو قومندان ویلي، چې په دغه سیمه کې د یوې الوتکې غورځېدو له کبله سیمه کې اور لګېدلی.
د فاریاب په مرکز میمنې ښار کې یو زوی خپله مور د چاقو په واسطه وژلې.
سیمهییزې سرچینې وايي، یاد کس قیام الدین نومیږي، چې خپله مور یې د کورني تاوتریخوالي له کبله په چاقو وژلې ده.
یاده کورنۍ د پښتون کوټ اوسېدونکې وه، خو له یوې مودې راهیسې یې په میمنې ښار کې ژوند کوو.
ویل کېږي، چې قاتل د طالبانو له لوري نیول شوی دی.