‏حماسه میډیا ته یو شمېر باوري سرچینو تایید کړې چې د طالبانو مشر شیخ هبت الله اخوندزاده د امر باالمعروف وزیر خالد حنفي له دندې ګوښه کړی او پرځای یې د لوړو زده کړو اوسنی وزیر شیخ ندا محمد ندیم د امر باالمعروف وزیر ټاکل شوی.

سرچینې دغه راز ویلي چې شیخ هبت‌الله اخوندزاده دا کار د خپلو فرمانونو د ښه تطبیق په موخه ترسره کړی دی.

یادې سرچینې ویلي، چې ندا محمد ندیم شیخ هبت‌الله ته نږدې کس دی او د هغه هر امر پر ځای کوي.

دا په داسې حال کې ده چې په دې وروستیو کې د طالبانو د حکومت ترمنځ د ګڼو اختلافاتو د رامنځته کېدو خبره کېږي.

ازبکستان وایي، چې له افغانستان سره د قوش تېپې کانال د جوړېدو او د آمودریا له سیند څخه د اوبو د حق په اړه خبرې کوي.

ازبکستان د ولسمشر ځانګړي استازي عصمت‌الله ایرگاشف وايي، چې دوی یو ګډ کمیسیون جوړ کړی چې په دې اړه دواړه لوري خبرې سره وکړي.

ایرگاشف ویلي، چې د آمودریا د اوبو د حق په اړه د طالبانو له حکومت سره هېڅ مخالفت نه لري.

هغه زیاته کړې چې د افغانستان خلک هم دغې اوبو کې حق لري او موږ یې مخنیوی نه کوو.

د یادونې ده چې د قوش تېپې کانال د افغانستان د اوبو تر ټولو ستره مصنوعي اوب‌لاره ده او ۲۸۵ کیلومتره اوږدوالی، ۱۰۸ متره سور، او ۸.۵ متره ژوروالی لري، چې پیل یې د بلخ ولایت له کلدار ولسوالۍ څخه کېږي او د فاریاب ولایت تر اندخوۍ ولسوالۍ پورې اوبه رسوي.

د افغانستان لپاره د ازبکستان نوی ټاکل شوی سفير اويبک عثمانوف کابل ته رسېدلی دی.

عثمانوف له ۲۰۲۰ څخه تر ۲۰۲۴ کال پورې په پاکستان کې د ازبکستان د سفیر په توګه دنده ترسره کړې ده.

عثمانوف په افغانستان کې د یادګار شادمانوف ځای ناستی شوی.

عثمانوف له ۱۹۹۸ ز کال راپدېخوا د ازبکستان د بهرنیو چارو د وزارت په ګډون په مرکزي دفتر او نړیوالو ماموریتونو کې بېلابېلې دندې ترسره کړې دي.

د هند لومړي وزیر نریندرا مودي‌ او هسپانوي سیال یې پېدرو سانچز نن د هند د پوځي الوتکو د تولید لومړنۍ شخصي فابریکه پرانيسته.

دغه فابریکه د هند د ګجرات ایالت په وادودارا ښار کې موقعیت لري.

په تېرو ۱۸ کلونو کې دا لومړی ځل دی چې د هسپانیې یو مشر هند ته سفر کوي.

اسوشیتید پریس خبري اژانس ویلي، چې نوې پرانيستل شوې فابریکه د هسپانیې د ایربس په همکارۍ به (سي ۲۹۵) ایربس پوځي ترانسپورتي الوتکې تولیدوي او دغه تولیدېدونکې پوځي الوتکې به د هند د هوایي پوځ په واک کې ورکول کېږي.

د مصر ولسمشر عبدالفتاح السیسي‌ پرون په غزه کې د دوه ورځني اوربند وړاندیز اعلان کړی دی.

د ښاغلي السیسي د دغه وړاندیز په یوه برخه کې راغلي چې یوشمېر برمته شوي اسرایلیان له فلسطیني بندیانو سره تبادله شي چې بیا “یوه بشپړ اوربند” ته زمینه برابره شي.

السیسي په قاهره کې خبریالانو ته ددغه اوربند په اړه معلومات ورکړي، خو دا یې نه‌ دي ویلي چې دا پلان یې د جګړې اصلي لوریو اسراییل او حماس ته سپارلی او که نه.

د اسلامي حزب امیر ګلبدین حکمتیار پر ایران د اسرائیلو برید ناکام بللی.
ښاغلي حکمتیار ویلي تل ابيب له ډیرو لافو او دروغ وروسته پر ایران ناکام برید وکړ، او ویی نشو کړای خپل تللی حیثیت ترلاسه کړي.
د حزب اسلامي مشر ویلي اسرائیل د لویدیځ او امریکا له ملاتړ پرته د ځان دفاع هم نه شي کولای.
نوموړي لیکلي، چې تل ابیب د جنون حد ته رسیدلې او په منځني ختیځ کې د بې ګناه خلکو په وژلو خپلو جنایتونو ته دوام ورکوي.
د افغانستان دغه جهادي مشر پر اسرائیلو د ایران برید بریالی بللی او لیکلي چې د ناټو د دریو هیوادونو د ملاتړ سره بیاهم ایران خپل اهدافو ته رسیدلی

د افغان سولې لپاره د امریکا ځانګړي استازي زلمي خلیلزاد د افغان ابدالیانو له لوري د اسیا جام سیالیو د پای لوبې ګټلو مبارکي ورکړې.

هغه ویلي، دا بریا دې ټولو افغانانو ته مبارک وي.

د یادونې ده چې افغان ابدالیانو د اسیا د ایمرجینګ سیالیو اتلولي وګټله او د پخواني جمهوري حکومت د ګڼ شمېر چارواکو په ګډون یو شمېر طالب چارواکو د شیخ هبت الله اخوندزاده د مخالفت سره سره هېوادوالو ته ددغې بریا مبارکي ورکړې ده.

له کرکټ سره د شیخ هبت‌الله اخندراده له مخالفت سره ـ سره یو شمېر طالب مشرانو هېوادوالو ته د کرکټ د بریا مبارکي ورکړې.

د طالبانو حکومت د قطر دفتر مشر سهیل شاهین پر خپله ایکس‌پاڼه د افغان ابدالیانو د بریا مبارکي ته لیکلي”د افغان ابدالیانو ستره او تاريخي بریا مو مبارک شه.
افغان ابدالیانو اتلانو د لومړي ځل لپاره د اسیا جام د سیالیو پایلوبه وګټله او دا تاریخي اتلولي یې پخپل نوم کړه. په نورو میدانونو کې هم د اتلولیو لپاره لاس په دعا یم.”

د یادونې ده چې افغان آبدالیانو د لومړي ځل لپاره د اسیا ایمرجینګ سیالیو اتلولي وګټله.

‏د افغانستان د وروستي جمهوریت مشرانو د کرکټ پر بریا خوښي ښودلې او افغان ولس ته یې مبارکي ویلې.

د افغانستان پخواني ولسمشر حامد کرزي، د مشرانو جرګې پخواني مشر فضل هادي مسلم یار، د ملي دفاع پخوانی سرپرست شاه محمود میاخیل، د ننګرهار پخواني والي ضیاء الحق امرخيل، د کرکټ بورډ مشر میرویس اشرف او ګڼو چارواکو د کریکټ پر بربا خوښې ښودلې.

پخواني ولسمشر حامد کرزي په دري ژبه په خپله ایکس‌پاڼه لیکلي:«پیروزی شیرین و به‌یادماندنی تیم ملی الف کرکت ⁧‎#افغانستان⁩ در بازی فاینل ⁧‎#ایمرجینگکپآسیا⁩ در مقابل ⁧‎#سریلانکا⁩ و کسب قهرمانی این مسابقات را به همه هموطنان عزیز به‌ویژه بازیکنان کرکت کشور تبریک میگویم»

پداسې حال کې چې د طالبانو د حکومت مشر شیخ هبت‌الله اخوندزاده د کرکټ لوبې له مخالفانو څخه دی، خو پخوانی طالب چارواکی او په اسلام آباد کې د طالبانو د تېرې دورې سفیر ملا عبدالسلام ضعیف هېوادوالو ته د افغان ابدالیانو له لورې د اسیا ایمرجینګ اتلولۍ مبارکي ورکړې.

ښاغلي ضعیف په خپله ایکس‌پاڼه لیکلي:” مبارک د سریلانکا په وړاندې د افغانستان بریا د اول ځل لپاره افغانستان د اسیا جام خپل کړ.”

د یادونې ده چې افغان آبدالیانو د لومړي ځل لپاره د اسیا ایمرجینګ سیالیو اتلولي وګټله.