د طالبانو د استخباراتو له زندان څخه تر خلاصیدو شپږ ورځې وروسته د پوهنتون استاد جاوید مومند ېو ځل بیا ټینګار وکړ چې د افغانستان د پرمختګ او سوکالۍ لپاره خپلو هڅو ته دوام ورکوي.
ښاغلي مومند نه دي ویلي چې له کومې لارې غواړې خپلو دغو هڅو ته دوام ورکوي، خو ټینګار یې کړی چې وطن یې خپل دی او غواړي د دردمندو هېوادوالو د درد دوا شي.
تردې وړاندې داسې راپورونه خپاره شوي وو، چې طالب استخباراتو نوموړی پدې شرط خوشې کړی چې نور به په سیاسي بحثونو کې اشتراک نه کوي.

د طالبانو حکومت د کورنیو چارو وزارت د ملګرو ملتونو د هغه راپور چې ویلي وو، افغانستان کې نشه‌یي توکو کې د ۲۰۲۳ کال پرتله دېرش‌ سلنه زیاتوالی راغلی، غبرګون ښودلی.

د طالبانو د کورنیو چارو وزارت ویاند عبدالمتین قانع ویلي، چې د دوی حکومت د نشه یي توکو د له منځه وړلو لپاره تر خپله وسه هڅه کړې ده.

نوموړي ویلي، چې دوی د ملګرو ملتونو وروستۍ څرګندونې او ادعا په کلکه ردوي او له حقيقته يې لرې ګڼي.

عبدالمتین قانع دغه راز ویلي، چې نړیوالو هېوادونو د بزګرانو لپاره د بدیل معیشیت د برابرولو په برخه کې هېڅ مرسته ورسره نه ده کړې او په وینا یې د دوی حکومت دې برخه کې یواځې پرېښودل شوی.

د بشري حقونو سازمان “هه‌نګاو” وایي، چې ایران یو ۲۷ کلن افغان وګړی اعدام کړی دی.

دغه سازمان ویلي، چې اعدام شوی کس نظام الدین نورالحق نومېږي او د مزار ولایت څخه وو، چې تېر کال د ایران د قضايي ادارې له خوا د “قصدي وژنې” په تور په اعدام محکوم شوی و.

یاد سازمان زیاته کړې، چې نوموړی د شنبې په ورځ د شیراز په مرکزي زندان کې اعدام شو.

د یادونې ده، چې په روان کال کې په ایران کې د اعدام شویو افغانانو شمېر ۶۳ تنو ته رسېدلی دی.

اسلام اباد کې په وروستیو لاریونونو کې ۱۹ افغانان هم نېول شوي دي.

د اسلام‌‌‌اباد د پولیسو مشر سید علي ناصر رضوي ویلي، چې په تېرو درېیو ورځو کې د پاکستان د امنیتي ځواکونو له‌خوا شاوخوا ۱۰۰۰ مظاهره‌چيان نيول شوي چې ۱۹ افغانان هم پکې شامل دي.

دا په داسې حال کې ده چې درې ورځې وړاندې پاکستان کې لاریون کونکو د یوه پراخ لاریون په ترڅ کې له زندان څخه د پاکستان د پخواني لومړي وزیر عمران خان د خوشې کېدو غوښتنه کوله.

د یادونې ده چې نن د عمران خان تحريک انصاف ګوند پر خپله ایکس‌‌‌پاڼه وویل، چې دوی خپل لاریون په مظاهرو کې د لږ تر لږه شپږ کسانو له وژل کېدو وروسته وځنډاوه.

د بشري حقونو د څار سازمان وايي، چې طالبان په رسنیو کې د هر ډول انتقادي محتوا لرونکو موادو د خپرولو مخه نیسي.

یاد سازمان د رسنیو په کارونو کې د طالبانو په لاس‌‌‌وهنې او د افغان خبریالانو پر ستونزو اندېښنه ښودلې.

دغه سازمان زیاته کړې چې طالبان په مستقیم ډول د رسنیو په خبري خونو کې په فعالیت سره د هر ډول انتقادي محتوا درلودونکو مواد د خپرولو مخه نیسي.

دوی ویلي، چې طالبانو زیاتره خبریالان نېولي او شکنجه یې هم ورکړې ده.

دا په‌‌‌ داسې حال کې ده چې پرون سه‌‌شنبه په افغانستان کې د ملګرو ملتونو سیاسي استازولۍ یوناما هم د افغانستان د رسنیو او خبریالانو د وضعیت په اړه راپور خپور کړ.

رویټرز خبري اژانس وایي، چې د پاکستان د پخواني لومړي وزیر عمران خان ګوند په موقتي توګه خپل اعتراضونه ودرول.

رویټرز ویلي، چې په دغو لاریونونو کې د عمران خان د ګوند لسګونه غړي هم نیول شوي دي.

په یادو لاریونو کې د څلور پاکستاني ځواکونو او دوو مظاهره چیانو په ګډون شپږ کسان ووژل شول او سلګونه نور ټپیان شول.

د یادونې ده چې د پاکستان پوځ خپلو سرتېرو ته د عمران خان پر معترضو پلویانو د ډزو امر کړی وو.

سرچینې وایي، د هرات په کشک کهنه ولسوالۍ کې یوه ځوان له خپلې مور سر پرې کړی دی.

د سرچینو په خبره، دغه ځوان بسم الله نومېږي او په وینا یې د خپلې مور د بيا واده له امله په غوسه وو.

سرچینو زیاته کړې چې دغه ٢٢ کلن ځوان د خم عبدالرحمن په کلي کې د خپل ماما په همکارۍ خپله مور په چاقو وژلې او تښتېدلی ده.

سرچینې دغه راز ویلي، چې د دغې مېرمنې د دوهم واده ورور او زوی یې مخالف وو.

د طالبانو ځایي حکومت تر اوسه په دې اړه څه نه دي ویلي.

د حماس یوه جګپوړي چارواکي د فرانسې خبري اژانس ته ویلي چې دا ډله په غزه کې اوربند ته چمتو ده او په لبنان کې د اسرائیلو او حزب الله ترمنځ د اوربند د موافقې هرکلی کوي.

دغه چارواکي ویلي، چې موږ په مصر، قطر او ترکیې کې منځګړو ته خبر ورکړی چې حماس د اوربند او د بندیانو د تبادلې جدي تړون ته چمتو دی؛ خو اسرائیل د دې موافقې په وړاندې خنډ دی.

په ورته وخت کې به لبنان کې د اوربند په پلي کېدو سره، امریکايي او اسرائیلي چارواکو هیله څرګنده کړې چې د حزب الله د پوځي ملاتړ له لاسه ورکول به حماس دې ته اړ کړي چې سولې ته غاړه کېږدي.

بل لورته اسرائیلو ویلي، چې حماس د يرغمل شويو کسانو د خوشې کولو په اړه تر اوسه د دغه هېواد شرطونه نه دي منلي.

د طالبانو حکومت سترې محکمې ویلي، چې په پروان کې یې پر یوه کس د قذف حد پلی کړی دی.

یادې محکمې د یوې خبرپاڼې په خپرولو سره ویلي، چې دغه کس په یوه بل کس د زنا تور پورې کړی و چې د ثبوت نه لرلو له امله په عام محضر کې اتیا دُرې و وهل شو.
‎
د یادونې ده چې په تېره یوه میاشت کې د طالبانو حکومت د ۱۵ ښځو په ګډون ۱۰۱ کسان په بېلابېلو ولایتونو کې په عام محضر کې په درو وهلي دي.

د ملګرو ملتونو د بشري حقونو ځانګړی راپور ورکوونکى ریچارډ بینټ وایي، چې په افغانستان کې د طالبانو له لوري د جنسيت پر بنسټ سیستماتیکې ځپنې تاوتریخوالی زیات کړی دی.

ریچارډ بینټ د ښځو پر وړاندې د تاوتریخوالي مخنيوي د ورځې د پیلېدو په مناسبت ویلي، چې د طالبانو د امر بالمعروف قانون د افغانانو ژوند له سختو ستونزو سره مخ کړی دی.

نوموړي زیاته کړې چې په عام محضر کې خلکو ته سزا ورکول لوی جرم دی او په وینا یې دا جرم د طالبانو له لوري ترسره کېږي.

د یادونې ده چې څه موده وړاندې د طالبانو حکومت افغانستان ته د ریچارډ بینېټ په راتګ بندیز ولګوو او هغه یې د پروپاګند په خپرولو تورن کړ.