د امریکا جمهوري غوښتونکي سناتور تیم بورچت له ټرمپ غوښتي، چې پر طالبانو څلوېښت میلیونه ډالري کڅوړې بندې کړي.
هغه په سومالیا کې پر داعش ډلې د امریکا د ولسمشر ډونالډ ټرمپ د ټویټ په غبرګون کې لیکلي، نور د دې وخت دی، چې پر طالبانو هم د هرې اوونۍ څلوېښت میلیوني ډالره کڅوړې بندې شي.
دا په داسې حال کې ده، چې امریکا لا وار دمخه خپلې پراختیايي مرستې ځنډولې دي.
ټرمپ ویلي وو، چې دوی خپل دوښمن ته میلیاردونه ډالره ورکوي، چې نور باید ورنکړل شي.
ټاکل شوې چې د سوریې د انتقالي حکومت مشر احمد الشرع نن ورځ په یو رسمي سفر سعودي عربستان ته ولاړ شي.
واک ته د شام التحریر تر رسېدو وروسته، دا لومړی ځل دی، چې د یادې ډلې مشر بهر ته سفر کوي.
رویټرز راپور ورکړی، چې په دې سفر کې به پر سوریې د امریکا او نورو لویدیځو هېوادونو د بندیزونو لرې کولو په اړه خبرې وکړي.
د امریکا ولسمشر ډونالډ ټرمپ وايي، ځواکونو یې په سومالیا کې د داعش ډلې لوړ پوړي غړي په نښه کړي دي.
نوموړی ویلي، چې د یادې ډلې یو شمېر پټنځایونه یې هم له منځه وړي.
ټرمپ زیاتوي، د داعش دغه غړي امریکا او متحدینو ته یې ګواښ وو.
نوموړي یو وار بیا په بایډن تور پورې کړی، چې دا غړي له ډېر پخوا څخه هدف ګرځېدلي وو؛ خو د بایډن ادارې یې پر وړاندې ګام نه پورته کوو.
سرچینې وایي، چې نن ماښام شپږ بجې د تخار ولایت د طالبانو د امنیه قومندانۍ په دروازه کې چاودنه شوې ده.
تر اوسه د دې چاودنې د نوعیت او مرګ ژوبلې په اړه معلومات نشته.
د طالبانو حکومت هم تر دې مهاله د دې چاودنې په اړه څه نه دي ویلي.
بلوڅ ازادي غوښتونکو تېره شپه د پاکستاني سرتېرو پر کمپ، پوسته او یو بس باندې برید کړي، چې ۱۷ ایف سي سرتېري یې وژلي دي.
دا بریدونه د بلوچستان د کلات به سیمه کې شوي دي.
بل لورته د پاکستان پوځ هم منلې، چې ۱۷ پوځیان یې وژل شوي؛ خو زیاتوي چې دوی هم په مقابلو ډزو کې ۱۲ وسله وال وژلي دي.
سیګار راپور ورکړی، چې طالبان په رسمیت پېژندل شوی حکومت نه دی او دوی د افغانستان لپاره د اختصاص شوې بودجې ته د لاسرسي حق نه لري.
سیګار په خپل راپور کې ویلي چې امریکا ښایي یو وار بیا د افغانستان څلور میلیارده ډالره شتمني تر خپل کنټرول لاندې راولي.
د یادونې ده چې تر دې وړاندې بیا په ۲۰۲۲ کال کې د افغانستان ۳.۵ میلیارده ډالر کنګل شوې شتمني د سویس بانک ته انتقال شوې وه.
د طالبانو پر حکومت د فشارونو سره سره پر یو وخت، د طالبانو د امر باالمعروف وزیر خالد حنفي خپلې ډلې ته د صبر، استقامت او تقوا غوښتنه کړې.
هغه په یو غږیز پیغام کې ویلي، چې دوی باید د هرې توطیې پر وړاندې صبر ولري.
تر دې وړاندې د طالبانو حکومت مشر شیخ هبتالله اخوندزاده هم خپلې ډلې ته ویلي وو چې له زندانونو ویره ونه لري او له استقامت کار واخلي.
یوې باوري سرچینې حماسه میډیا ته د نوم نه ښودلو په شرط ویلي، چې د طالبانو د حج او اوقافو وزیر یو پاکستانی متقاعد خطیب ددې وزارت د ژباړونکي او ترجمان په توګه ټاکلی دی.
نوموړي چې ددې خطیب د نوم او تنخوا په اړه څه ونه ویل؛ خو زیاته یې کړه چې د هغه زامن له ۲۰۰۸ کال راهیسې په بلوچستان کې په پاکستاني پوځ کې دنده ترسره کړې.
سرچینې ویلي، په داسې حال کې چې ګڼ شمیر افغانان بې دندې دي او په حساسو ځایونو کې د پاکستانیانو مقررول ددې هېواد او خلکو سره ظلم دی.
د طالبانو حکومت په افغانستان کې د داعش د فعالیتونو په اړه د افغانستان د بیارغونې لپاره د امریکا د ځانګړې څارونکې ادارې (سیګار) راپور رد کړ.
د طالبانو حکومت مرستیال ویاند حمدالله پر خپله ایکسپاڼه لیکلي، چې داعش په افغانستان کې ځپل شوی او نور جدي ګواښ نه ګڼل کېږي.
هغه دغه راز ویلي، چې د داعش د حضور په اړه اندېښنې یوازې د دې ډلې په ګټه تبلیغات دي.
فطرت زیاته کړې، چې دا ډول راپورونه حقیقت نه لري او د ځانګړو موخو لپاره خپرېږي.
د یادونې ده چې سیګار په خپل راپور کې ویلي وو، چې داعش، القاعده او ټي ټي پي لا هم د افغانستان او سیمې لپاره یو ستر ګواښ دی.
د امریکا ولسمشر ډونالډ ټرمپ ویلي، چې بګرام هوایي اډه اوس د چین په لاس کې ده.
ټرمپ زیاتوي، که دی په واک کې وی؛ نو حتمي به یې دا اډه ساتلې وه.
نوموړی وایي، دا د شرم وړ خبره وه، چې امریکایان ان د بګرام له هوایي اډې هم ووتل.
هغه زیاته کړې، د دوی په ګډوډ ډول له وتلو وروسته روسیه پر اوکراین ور زړوره شوه.
د یادونې ده چې ټرمپ پخوا هم ویلي چې بګرام د دوی لپاره یوه مهمه هوایي اډه وه.