راشد خان د جنوبي افریقا په شل اوریز لیګ کې د دونیت ویلالاګي په اوټ کولو سره د ۶۳۳ ویکټو په پوره کولو د نړۍ لومړنی تکړه بالر اعلان شو.
د سویلې افریقا د کرکټ لیګ په لوبه کې د ممبۍ انډین کپټاون لوبډله د راشد خان په کپټانۍ کې د دې جام پای لوبې ته ووتله.
راشد خان په ۴۶۱ شل اوریزو لوبو کې ۶۳۳لوبغاړي سوځولي چې یاد مقام یې خپل کړ.
د طالبانو حکومت د بادغیس د مرستیال والي بدرالدین زوی چې په خیبر پښتونخوا کې د پاکستاني ځواکونو سره په جګړه کې وژل شوی و جسد یې طالباني چارواکو ته وسپارل شو.
تر دې وړاندې د پاکستان حکومت د جسد له سپارلو انکار کړی و، او ویلي یې وو چې له موږ سره نشته، خو اوس یې جسد په داسې حال کې ور وسپارلو چې په تابوت یې ورته د خوارج نوم لیکلی دی.
د بدرالدین زوی په خیبر پښتونخوا کې د وسله والو پر ټرینینګونو ګمارل شوی و، چې څو ورځې وړاندې د دیره اسماعیل خان په کلاچې سیمه کې ووژل شو.
د طالبانو حکومت ویاند ذبیح الله مجاهد ویلي، چې د کورنیو چارو وزیر سراج الدین حقاني له سفر څخه راستون شوی او اوس په خپل هیواد کې دی.
تر دې مخکې د ملګرو ملتونو د امنیت شورا وویل چې سراج الدین حقاني ته یې د لسو ورځو لپاره معافیت ورکړی و چې د عمرې حج ادا کړي.
د یادونې ده چې عربستان ته تر تګ وړاندې سراج الدین حقاني متحده عربي اماراتو ته سفر کړی و او ددغه هېواد له مشر سره یې کتلي و.
سرچینې وایي، چې په کندز ښار کې د طالبانو پر امنیه قومندانۍ چاودنه شوې.
سرچینې زیاتوي، چې دغه چاودنه نن ماښام ۷ بجې د طالبانو د امنیه قومندانۍ پر ودانې شوې.
تر اوسه د دې چاودنې د نوعیت او مرګ ژوبلې په اړه څه نه دي ویل شوي.
د طالبانو حکومت هم تر اوسه په دې اړه څه نه دي ویلي.
پاکستان کې یو افغان د کډوالۍ غوښتنې په بهیر کې د ځنډ له کبله ځانوژنه کړې ده.
سرچینې وایي، چې د دغه افغان کډوال کاناډا ته د تګ بهیر ځنډېدلی و، چې له امله یې بیګا شپه د اسلام اباد په یو ګېسټ هوس کې ځان زندۍ کړی.
سرچینې زیاته کړې، چې دا افغان شېر نومېده او د پنجشېر اوسېدونکی و.
د یادونې ده، چې واک ته د طالبانو حکومت له رسېدو وروسته ډېر شمېر افغانان کډوالۍ ته مجبوره شوي او دوی په بهرنیو هېوادونو کې له ګڼو ستونزو سره لاس او ګرېوان دي.
د سوریې د انتقالي حکومت مشر احمد الشرع له سعودي عربستان څخه ترکیې ته لاړ.
د سوریې ولسمشرۍ ماڼۍ ویلي، چې له احمد الشرع سره په دې سفر کې د بهرنیو چارو وزیر اسعد حسن الشیباني هم ملګری دی.
د یادونې ده چې احمد الشرع ته د ترکیې ولسمشر رجب طیب اردوغان د ورتګ بلنه ورکړې وه.
سویډن کې په یوه ښوونځي کې پنځه تنه زده کوونکي په ډزو وژل شوي دي.
د اسوشیټیډ پریس خبري اژانس راپور ورکړی چې برید د اوریبرو په ښار کې په یوه ښوونځي کې شوی دی.
د سویډن پولیسو ویلي، چې تر اوسه د ټپیانو د کره شمېر په اړه معلومات نشته.
ددغه برید د نوعیت په اړه تر اوسه څه نه دي ویل شوي.
د طالبانو حکومت د ریاستالوزراء اقتصادي مرستیال ملا عبدالغني برادر په افغانستان کې د یوناما له مرستیال ایندریکا راتوات سره کتلي.
په دې لېدنه کې ملا برادر له یاد بنسټ څخه غوښتي، چې په افغانستان کې د بشري مرستو په توزیع کې شفافیت رامنځته او خپلې مرستې دې پراختیايي برخو ته واړوي.
دغې لیدنه کې د یوناما مرستیال ویلي، چې دوی د طالبانو له حکومت سره په همغږۍ خپلو پراختیايي او بشري مرستو ته دوام ورکوي.
نوموړي زیاته کړې، چې د افغان بزګرانو د ملاتړ په موخه به پر هغوی اصلاح شوي تخمونه او کیمیاوي سرې وویشي او کوچني بندونه به جوړ او کاریزونه به پاک کړي.
د ملګرو ملتونو د امنیت شورا د بندیزونو کمېټې ویلي، چې د طالبانو حکومت د کورنیو چارو وزیر سراج الدین حقاني د عمرې حج ادا کولو لپاره سعودي عربستان ته تللی دی.
د امنیت شورا ویلي، چې پر ښاغلي حقاني د لسو ورځو لپاره د سفر بندیز لیرې شوی.
د یادې شورا د اعلامیې پر بنسټ، دا بندیز د ۲۰۲۵زيږديز کال د جنورۍ له ۲۳مې څخه د فبرورۍ تر ۳مې پورې اعتبار لري، او موخه یې سعودي عربستان ته د نوموړي سفر د عمرې د مراسمو د ادا کول بلل شوي دي.
ښاغلي حقاني سعودي عربستان ته په سفر کې د متحده عربي اماراتو د حکومت له مشر سره هم کتلي.
د یادونې ده چې تېره ورځ د سوريې د انتقالي حکومت مشر احمد الشرع هم د عمرې حج ادا کړ او ددغه هېواد د چارواکو له لوري یې تود هرکلی وشو.
د تاجکستان دولتي رسنیو خبر ورکړی، چې د دغه هېواد د عدلیې وزارت اړوند په یوه زندان کې د بندیانو د یوې ډلې له خوا په ډزو کې درې بندیان وژل شوي او د زندان درې کارکوونکي ټپیان شوي دي.
د خاور خبري اژانس د راپور له مخې، د دوشنبې په ورځ یوې ۹ کسیزې ډلې له زندان څخه د تېښتې هڅه وکړه او د زندان پر مامورینو یې په چاقو برید وکړ.
د يو بل خبر له مخې، د زندان د مامورينو په ډزو کې درې تنه بنديان وژل شوي؛ خو اوس په زندان کې وضعيت عادي شوى دى.
دغه زندان د تاجکستان په پلازمېنه دوشنبه ښار کې موقعیت لري او د دغه هېواد له مهمو زندانونو څخه دی چې د تاجکستان د عدلیې وزارت تر څارنې لاندې فعالیت کوي.