د طالبانو د امر بالمعروف وزارت وایې، ددې وزارت پوځي مرستیال شیخ سعید احمد شهید خیل د برېتانیا هېواد د یو شمېر دیني عالمانو سره په کتنه کې ویلي «اسلامي امارت» یواځینی اسلامي نظام دی چې ټوله اسلامي نړۍ پرې ویاړي.

شهیدخیل له بریتانوي عالمانو غوښتي، چې د دوی د حکومت رېښیتنی انځور نړۍ ته وړاندې کړي.

د امربالمعروف وزارت په خپلې ایکس پاڼې لیکلي:« د برېتانيې هېواد دیني عالمانو د اسلامي امارت مسؤولین د امت امامان یاد کړل او ویې ویل له ډېرو کلونو راهیسې مسلمانانو داسې انګېرله چې اسلامي امت یتیم دی؛ خو د اسلامي امارت پر راتګ موږ ډاډ ترلاسه کړ چې اسلامي امت اوس غمخوار لري او پرې ډاډه دي.»

د طالبانو د امربالمعروف وزارت وایي دغو دیني عالمانو د طالبانو دغه چارواکي ته ویلي دوی د امریکا او ناټو سره جګړه کې برخه نه ده اخیستې او په دې برخه کې ځان د اسلامي امت پوروړي بولي؛ خو ژمن دي چې د طالبانو د نظام اصلي او واقعې انځور به نړۍ ته وړاندې کړي.

د یادونې وړ ده چې د سعودي په پلازمینه ریاض کې د اسلامي نړۍ یو شمېر هیوادونو په لویه غونډه کې د «اسلامي امت» دغه غمخوار ته بلنه نه ده ورکړل شوې.

د اسلامي چاروکارپوهان په دې باور دي چې د طالبانو اسلام د نورې نړۍ له اسلام سره توپیر لري چې دغه چارې د طالبانو سیاسي حیثیت صفر کړی دی.

ټاکل شوې د روانې دسمبر میاشتې په دیارلسمه هسپانیا د افغان ښځو د د دوهمې لویې غونډې کوربه وي چې د بشري حقونو فعالانو، د جمهوري حکومت پخوانیو چارواکو، ژورنالیستانو او یوشمیر نورو ښځو په کې ګډون وکړي.
ددې غونډې لومړۍ غونډه د البانیا تیرانا ښار کې د روان کال د سپټمبر په ۱۱ نیټه ترسره شوې وه.
د دغې غونډې موخه افغانو میرمنو ته د دې فرصت برابرول ښودل شوي چې له یو بل سره خبرې وکړي.

د دوحې ناسته نن له غرمې وروسته د قطر د امیر په خبرو پیل شوه.

ټاکل شوې چې په دې ناسته کې به د امربالمعروف د نوي قانون په اړه هم خبرې وشي.

بل لورته یادې ناستې ته د پخواني حکومت د پارلمان ځینې غړي هم بلل شوي دي.

په همدې حال کې یادې ناستې ته د افغان سولې لپاره د امریکا ځانګړی پخوانی استازی زلمی خلیلزاد هم ورغلی دی.

یونل مېسي د امریکا د غوره لیګ لانډون ډونوان لخوا د ٢٠٢۴ کال د فوټبال غوره لوبغاړی وټاکل شو.

هغه له تېر کال راهیسې د امریکا غوره لیګ سیالیو کې ۱۹ سیالۍ کړې، چې ۲۰ ګولونه یې وهلي او ۱۶ داسې پاسونه یې ورکړي، چې ټول ګولونه شوي.

نوموړي د دغه مډال اخیستو په مناسبت جوړو شویو مراسمو کې خوښي څرګنده کړې او ویلي یې دي، چې خپلو هڅو ته به دوام ورکوي.

د خیبرپښتونخوا په خرسین پوستې برید شوی چې له کبله یې۶ پاکستاني پوځیان وژل شوي او ۵ نور ټپیان دي.

باوري سرچینې وایي، چې پر دغې پوستې برید د ۳۵ وسله والو له لوري شوی وو.

تر اوسه چا د برید مسؤلیت نه دی منلی.

یاده پېښه د هنګو او شمالي وزیرستان په ګډه پوله کې رامنځته شوې.

باوري سرچینې وایي، چې د دوحې فورم ۲۲ناسته کې به د افغانستان په اړه هم بحث وشي.

د سرچینې د معلوماتو له مخې، په دغه ناسته کې به د یوناما مشره روزا اتونبایوا او د افغان ښځو د حقونو لپاره د امریکا ځانګړې استازې رینا امیري خبرې وکړي.

ویل کېږي چې د پخواني حکومت چارواکي هم ښایي د دغې ناستې ګډونوال وي.

د یادونې ده چې د یادې ناستې موخه نړیواله سوله، لوږې سره مبارزه، د غزې او منځني ختیځ وروستۍ جګړې او نور موضوعات ښودل شوي.

نیویارک ټایمز راپور ورکړی، چې د فاطمیونو په شمول د ایران ځینې ډلې دمشق ته رسېدلې دي.

د سرچینې د معلوماتو له مخې، دا ډلې دمشق او لاذقیه کې ځای پر ځای شوي دي.

ټولنیزو رسنیو کې هم په ځینو ویډیوګانو کې لیدل شوي، چې فاطمیون دمشق ته نږدې په نظامي یونیفورم کې ګرځي.

دا په داسې حال کې ده، چې اوس مهال هلته د سوریې مخالفو وسله والو په حمص ښار هم خپلو بریدونو ته زور ورکړی دی.

د متحدې جبهې مشر جنرال سمیع سادات ویلي، چې افغانستان کې د طبي انستیتوتونو په تړلو سخت خواشینی دی او طالبان اوس مهال د خپلو افراطي فکرونو له کبله په ټول افغانستان کې د ښځو پر وړاندې ښوونیز مراکز، ښوونځي، پوهنتونونه او طبي انستیتوتونه تړلي دي.

د هغه په خبره، دا چاره له اسلام سره هیڅ تړاو نه لري او دا د دوی خپل فکر دی.

نوموړي ډاډ ورکړی، چې د حساب ورځ را روانه ده او یو وار بیا به ټولې افغانې خویندې خپلو زدکړو ته دوام ورکړي.

دی وايي، د افغانستان د ازادۍ په برخه کې یې زیات پرمختګ کړی او لاهم کار کوي.

سادات زیاتوي ډاډه دی، چې خپلو موخو ته به رسېږي او افغانستان به ازادوي.

سره له دې، چې له سوریې څخه د بشارالاسد د تللو راپورونه خپاره شوي؛ خو تازه وال سټریټ ژورنال د سوریې د امنیتي سرچینو په حواله لیکلي، چې نوموړی لاهم په خپل هېواد کې دی.

د سرچینو د معلوماتو له مخې، بشارلاسد تېره اوونۍ خپله مېرمن، زامن او ورونه له هېواد اېستلي وو.

د معلوماتو پر اساس، د هغه مېرمن او زامن روسیې او ورونه یې عربي متحده اماراتو ته تللي.

تېره شپه داسې راپورونه خپاره شول، چې ګواکې بشارالاسد خپل هېواد پریښی دی.

سوریه کې جنګېدونکې ډلې تحریر الشام اعلان کړی، چې هڅه کوي د سوریې حکومت د هوايي بمباریو د کنټرول لپاره د دغه هېواد پر هوايي ډګرونو ولکه ټینګه کړي.

اوس مهال په حومه، حما او حمص کې سختې جګړې روانې دي.

تحریر الشام دغه راز ویلي، چې له اردن سره پر پوله یې امنیت ټینګ کړی او له یاد هېواد سره د امنیتي اندېښنو په اړه همغږي لري.