د ایران د مذهبي مشر سلاکار علي لاریجاني ویلي، ایران د لبنان او حزب الله د سولې سبوتاژ کول نه غواړي.
هغه ویلي، که لبنان له اسرائیل سره هر ډول سوله کوي؛ نو تهران یې ملاتړ کوي.
دی دا څرګندونې بیروت ته له تازه سفر وروسته کوي.
دا په داسې حال کې ده چې څه موده وړاندې رسنیو راپور ورکړی و، چې اسرائیل له لبنان سره د سولې په لټه دی.
د افغانستان د کرکټ بورډ اجرائیه رئیس نصیب خان ویلي، چې د افغان کرکټ لوبډلې مشر روزنکی جانټن ټراټ به د چمپینز ټرافي په لوبو کې د افغان لوبډلې روزنکي په توګه بیرته راستون شي.
نصیب خان ویلي، چې نوموړی به له زمبابوې سره لوبو کې ارام وکړي.
د یادونې ده چې د جانټن ټراټ قرارداد په راتلونکې ډسمبر میاشت کې پای ته رسېږي.
د افغانستان له ۱۹ کلونو کم عمره ملي لوبډلې د درې اړخیز سیریز په لومړۍ لوبه کې خپلې سیالې پاکستانۍ لوبډلې ته په سلو منډو ماتې ورکړه.
په دې لوبه کې افغان لوبډلې لومړۍ توپ وهنه وکړه او په پنځوسو اورونو کې یې د ۸ لوبغاړو په سوځېدو سره ۳۰۶ منډې جوړې کړې.
د افغانستان لپاره په توپوهنه کې فیصل شینوزاده ۱۲۳ منډې جوړې کړې.
پاکستان لوبډلې ورکړل شوی هدف پوره نشو کړی او ټوله لوبډله یې په ۲۰۶ منډو وسوځېده.
د لبنان د بلعیک ښار په ختیځه برخه کې اسرائیلو د یاد هېواد پر مدني دفاعي مرکز برید کړی.
د لبنان روغتیایي چارواکو ویلي، چې دغه برید کې ۱۲ تنه وژل شوي او درې نور ټپیان شوي دي.
د لبنان روغتیا وزارت دا برید غندلی او د روغتیایي ځایونو په نښه کول یې وحشیانه عمل بللی دی.
پاکستان له طالبانو یو وار بیا غوښتي چې له ترهګرو سره د مبارزې په اړه د دوی غوښتنې جدي وګڼي.
د پاکستان د بهرنیو چارو وزارت ویاندې ممتاز زهرا بلوڅ ویلي، چې له افغانستان څخه د راپېښو ګواښونو په اړه باید نور د دوی زغم ونه ازمایل شي.
د طالبانو حکومت تر اوسه په دې اړه څه نه دي ویلي؛ خو تر دې وړاندې یې له پاکستان غوښتي چې خپلې ستونزې په کور دننه حل کړي.
ټاکل شوې چې د امریکا ولسمشر جوبایډن به سبا په پیرو کې د چین له ولسمشر سره وګوري.
د سپینې ماڼۍ د ملي امنیت سلاکار وایي، دا لیدنه به د اسیا پسفیک د اقتصادي همکاریو په څنډه کې ترسره شي.
یاده لیدنه داسې مهال کېږي، چې چین وایي د امریکا له نوې رهبري سره د اړیکو پراختیا ته چمتو دي.
نن ماښام د کابل په پلچرخي سیمه کې دوه طالب سرتېري د نامالومو موټرسایکل سپرو له لوري وژل شوي دي.
سیمه ییزو سرچینو رسنیو ته ویلي، پېښه هغه مهال رامنځته شوه، چې دغه طالب سرتېري یو دوکان ته د سودا اخیستلو لپاره له موټره ښکته شول.
تر اوسه چا د دغه برید مسؤلیت نه دی منلی.
بل لورته د طالبانو حکومت هم تر اوسه په دې اړه څه نه دي ویلي.
بدخشان کې د طالبانو د چاپیریال ساتنې ادارې ریاست وایي، په شکي ولسوالۍ کې یې هغه کس نیولی، چې یو خرس یې ښکار کړی و.
د یادې ادارې رییس فیض الرحمن ابراهیمي ویلي، د وحشي ژویو ښکار غیر قانوني دی او هر هغه کس چې دغه کړنه وکړي، قانوني چلند به ورسره وشي.
د یادونې ده چې څو ورځې وړاندې په شکي ولسوالۍ کې شپږ کسانو یو خرس ښکار کړی و او وروسته یې ورسره یادګاري تصویرونه هم اخیستي وو.
د طالبانو د مشر شیخ هبت الله اخوندزاده حکم طالبان په دوو ډلو ویشلي دي.
د طالبانو حکومت د لوړو زده کړو وزیر ندا محمد ندیم، د امربالمعروف وزیر، د خوست او د ننګرهار واليان په کنفرانسونو او غونډو کې خبریالانو ته د د عکس او ویډیو اخیستلو اجازه نه ورکوي؛ خو د رییس الوزرا سیاسي مرستیال، د کورنیو چارو وزیر، د خوست مرستیال والي او په کابل کې ګڼ شمیر نورې حکومتي ادارې له بهرنیو چارواکو او افغانانو سره د خپلو غونډو عکسونه او ویډیوګانې خپروي.
عام افغانان پوښتنه کوي، چې دین ولې د طالبانو لپاره په مختلفو ځایونو کې بېلابېل تفسیرونه لري؟
دوی زیاتوي چې د ملا هبتالله اخوندزاده امر ولې ځینې طالب چارواکي پر ځای کوي او ځینې ترې سرغړونه کوي او نه یې مني؟
په دې وروستیو کې یو شمېر ولایتونو ته د طالب چارواکو تګ راتګ زیات شوی دی.
درې ورځې وړاندې د طالبانو حکومت د کورنیو چارو سرپرست وزیر سراج الدین حقاني میدان وردګ ته تللی و؛ خو وړمه ورځ بیا پکتیا ته ورسېد.
له هغه سره په یو وخت د طالبانو د رییس الوزرا سیاسي مرستیال مولوي عبدالکبیر وړمه ورځ بامیان ته تللی وو؛ خو نن بیا د پکتیا میرزکې ولسوالۍ ته رسېدلی دی.
یو شمېر شنونکي باور لري، چې د افغانستان په اړه د واشنګټن بدلېدونکو سیاستونو طالبان وېرولي او هڅه کوي چې اوس عام افغانان پر ځان راټول کړي.
د طالبانو رییس الوزرا سیاسي مرستیال مولوي عبداکبیر نن د میرزکې د خلکو ستونزې اورېدلي او د حل ډاډ یې ورکړی