روسیې د اوکراین په ختیځ سومي ښار کې پر یو استوګنځي برید کړی، چې له کبله یې ۱۰ کسان وژل شوي او ۵۲ نور ټپیان دي.
رویټرز خبر ورکړی، چې تر برید وروسته د اوکراین حکومت په سیمه کې بېړنی حالت اعلان کړی دی.
د اوکراین د پوځ قومندان ولادمیر ارتیوخ دا پېښه یوه ستره غمیزه بللې ده.
بل لورته د اوکراین د بیړنیو خدماتو ادارې اعلان کړی، چې په سیمه کې د ژغورنې عملیات روان دي.
خیبرپښتونخوا کې د یو جومات مخې ته په شوې چاودنه کې د جمعیت علماء اسلام ګوند سیمهییز مشر مفتي اعجاز وژل شوی دی.
پاکستاني رسنیو ویلي، چې په پېښه کې یو بل تن هم وژل شوی؛ خو د هویت په اړه یې معلومات نه دي ورکړي.
د سرچینو د معلوماتو له مخې، د دغې پېښې هدف د شهزاده جومات ملاامام وو.
په یاده پېښه کې شپږ نور کسان ټپیان شوي دي.
لاهم کومې ډلې د دغې چاودنې مسوولیت نه دی منلی.
اسرائیل تېره ورځ د غزې پر یو شمېر سیمو بریدونه کړي، چې له کبله یې ۷۲ کسان وژل شوي دي.
رویټرز خبر ورکړی، چې دا بریدونه په بیت الاهیا کې پر استوګنیزو کورنو شوي دي.
بل لورته اسرائیلي پوځ هم دا برید تائید کړی او ویلي یې دي، چې په سیمه کې یې د غیر نظامي کسانو د وژلو د مخنیوي لپاره ټوله هڅه کړې.
په ټولنیزو رسنیو کې هم په خپرو شویو ویډیوګانو کې لیدل کېږي، چې ځايي خلک له ویجاړو شویو ودانیو څخه جسدونه راباسي.
رویټرز خبري اژانس وایي چې، د امریکا ولسمشر جوبایډن اوکراین ته د امریکا وسلو د کارونې اجازه ورکړې ده.
رویټرز د خپلو سرچینو له قوله ویلي چې، جوبایډن اوکراین ته په روسیه کې دننه د امریکایي وسلو د کارونې ویلي.
رویټرز دغه راز ویلي، چې دا پرېکړه د اوکراین او روسیې د جګړې په اړه د واشنګټن په پالیسۍ کې د پام وړ بدلون ښکارندوي کوي.
د یادونې ده چې تېره ورځ د اوکراین ولسمشر ولادمیر زیلنسکي ویلي، ټوله هڅه کوي چې روانه جګړه راتلونکی کال د دیپلوماسۍ له لارې پای ته ورسوي.
د ددغه جګړې په اړه تر اوسه د امریکا د نوي منتخب ولسمشر ډونالډ ټرمپ روښانه تګلاره معلومه نه ده، خو وړاندې تر دې یې د دغې جګړې په پای ته رسېدو ټینګار کړی.
د شمالي کوریا مشر کیم جونګ اون د دغه هېواد له پوځ څخه غوښتي، چې د رښتینې جګړې لپاره خپلې وړتیاوې پیاوړې کړي.
کیم جونګ اون امریکا او متحدین یې د کړکېچ د زیاتېدو پړه بللې او د جګړې لپاره یې د چمتووالي غوښتنه کړې ده.
د شمالي کوریا دولتي خبري اژانس KCNA ویلي، چې هغه دغه څرګندونې د دغه هېواد له لوړ پوړو چارواکو سره په کتنه کې وکړې.
نوموړی د جګړې لپاره د چمتووالي خبره داسې مهال کوي چې د هغه په امر د شمالي کوریا زرګونه سرتېري اوکراین سره د جګړې لپاره روسیې ته واستول شول، چې ګڼ غبرګونونه یې را وپارول.
د ملي تحريک ګوند مشر مارشال عبدالرشید دوستم کوچنۍ لور زلیخا دوستم د ترکیې له یوه پوهنتون څخه د طب په برخه کې خپلې زده کړې بشپړې کړې دي.
د ښاغلي دوستم عکس په ټولنیزو رسنیو کې خپور شوی چې د خپلې لور تر څنګ ولاړ دی.
څو ورځې وړاندې په ټولنیزو رسنیو کې ویل کېدل، چې دوحه کې د طالبانو حکومت د سیاسي دفتر مشر سهیل شاهین لورګانې په قطر هېواد کې له پوهنتون څخه فارغې شوې.
دا په داسې حال کې ده چې په هېواد کې پر افغان نجونو د طالبانو حکومت له لوري تر شپږم ټولګي پورته د زده کړو بندیز لګېدلی او ډېری حقونه یې تر پښو لاندې شوي دي.
خیبرپښتونخوا کې د یو جومات مخې ته په شوې چاودنه کې دوه تنه وژل شوي او شپږ نور ټپیان دي.
دا پېښه د پښتونخوا ایالت د جنوبي وزیرستان د برمل ولسوالۍ په اعظم ورسک سیمه کې رامنځته شوې ده.
د سیمې پولیسو ویلي، پېښه د شهزاده جومات په دروازه کې شوې، چې موخه یې د دغه جومات ملا امام او د جمعیت علمای اسلام غړی مولانا شهزاده ترابي و.
اوس مهال سیمه د امنیتي ځواکونو له لوري کلابنده ده.
د یادونې ده چې د پېښې ټپیان د واڼه روغتون ته انتقال شوي.
تر اوسه کومې ډلې د یاد برید مسوولیت نه دی منلی.
ان بي سي نیوز راپور ورکړی، چې ټرمپ ته د واک د انتقال ټیم اوس مهال د هغو اوسنیو او پخوانیو افسرانو د نوملړ په چمتو کولو بوخت دی، چې له افغانستان څخه په مستقیم او غیر مستقیم ډول د امریکایي ځواکونو په وتلو کې دخیل وو.
یاده رسنۍ دا راپور داسې مهال خپروي چې ټرمپ تر دې وړاندې ویلي وو چې د واک په لومړۍ ورځ به یې د هغو افسرانو استعفاوې په میز ایښي وي چې له افغانستان څخه د امریکایي ځواکونو وتلو کې دخیل وو.
ټرمپ له افغانستان څخه د امریکایي ځواکونو د وتلو پر بهیر تل نیوکې کړې دي.
هند په لومړي وار له غږ چټک هایپر سونېک توغندی جوړ او وازمایه.
دا توغندی له غږ چټک او نړۍ کې یو بې ساری توغندی بلل کېږي.
د هند حکومت ویلي، چې دا توغندی تر ۱۵۰۰ کیلو متره فاصلې پورې هستوي سرګولولې لېږدولی شي.
د یادونې ده چې د هند دا توغندی د اوډیشا ایالت په عبدالکلام ټاپو کې ازمایل شوی دی.
د طالبانو حکومت د بهرنیو چارو وزارت سیاسي مرستیال شېرمحمد عباس ستانکزي ویلي، نړۍ باید د افغانستان د بیا رغوونې مسؤلیت واخلي.
نوموړي له ګاونډیو هېوادونو هم غوښتي چې له افغانستان سره رغنده تعامل وکړي.
ستانکزي د تخنیکي او مسلکي زدکړو انستیتوت له لوري د افغانستان غوره نوښتونو په دویم نندارتون کې ویلي، چې نړۍ د علم او پوهې له کبله پرمختګ کړی او د له فقر او لوږې سره د مبارزې لپاره اړتیا ده، چې زده کړو ته وده ورکړل شي.