د طالبانو حکومت مشر شیخ هبت‌الله اخوندزاده د احتمالي کودتا د مخنیوي په هڅه کې دی.

خبریال بلال سروري په خپله ایکس‌پاڼه لیکلي، چې پر افغانستان د بیا ځل واکمنۍ وروسته په رسنیو او غونډو کې طالبانو د ملي حاکمیت دعوه کوله؛ خو دغه دعوه او داعیه یې له لومړي سره ناقصه وه.

نوموړی لیکلي، د طالبانو مشر پر خپلو وزیرانو هم بې باوره دی او د دوی په منځ کې بې باوري تر دې حده زیاته شوې، چې د دفاع وزارت،کورنیو چارو وزارت او استخباراتو ریاست څخه یې د وسلو د ویش صلاحیت واخیست.

سروري زیاتوي، په داسې وخت کې دا ډول پرېکړې هیڅ معنی نه لري.

روسیه وايي، تېره شپه یې د مسکو پر لور ګڼ شمېر توغول شوي ډرون خنثی کړي دي.

د یاد ښار ښاروال سیرګي سوبیانین ویلي، هوايي دفاعي سیستم یې د مسکو پر بېلابېلو سیمو تر شلو ډېرې بې پیلوټکه الوتکې ویشتلې دي.

بل لورته ټاس خبري اژانس لیکلي چې د دغو بریدونو له کبله د مسکو دوو هوايي میدانونو خپلې الوتنې د لنډ وخت لپاره ځنډولې دي.

ویل کېږي چې دغه ډرون الوتکې د اوکراین له لوري ورتوغول شوې وې.

پاکستاني رسنیو راپور ورکړی، چې د شمالي وزیرستان په سپینوام سیمه کې یې له افغانستان څخه ورتلونکي شپږ مخالف وسله وال یې وژلي دي.

د ډیلي پاکستان د راپور له مخې، دا پېښه تېر ورځ رامنځته شوې، چې درې وسله‌وال پکې ټپیان شوي هم دي.

د سرچینې د معلوماتو له مخې، یادو کسانو غوښتل چې د افغانستان له خاورې څخه د شمالي وزیرستان میرعلي سیمې ته لاړ شي، چې له پولیسو سره په نښته کې ګېر شوي او پاتې وسله وال بېرته افغانستان ته ستانه شوي دي.

د طالبانو حکومت تر اوسه په دې اړه څه نه دي ویلي، خو تېر کې یې ډاډ ورکړی، چې د دوی خاوره د هیچا پر ضد نه کارول کېږي.

د طالبانو حکومت د قطر دفتر مشر سهیل شاهین وايي، په دغه هېواد کې یې د بېلابېلو هېوادونو له استازو سره لیدنه د طالبانو د رسمیت پېژندنې لپاره ده.

هغه ویلي، د قطر دفتر د طالبانو او نورې نړۍ ترمنځ د پل دروازې حیثیت لري.

د شاهین په خبره، که دوی په رسمیت وپېژندل شي، نو له افغانستان سره به د نورو هېوادونو اقتصادي همکاري هم زیاته شي.

د لبنان پر جنوب کې د اسرائیل په تازه بریدونو کې ۳۳ کسان وژل شوي دي.

د لبنان روغتیا وزارت وايي، د اسرائیل له لوري پر بعلبك-الهرمل سیمه هوايي بریدونه شوي ۲۰ کسان په کې وژل شوې.

په همدې حال کې ۱۳ تنه نور بیا د لبنان پر جنوب کې په یو بل برید کې وژل شوي دي.

دسرچینې د معلوماتو له مخې، د دغو بریدونو له کبله ۱۴ کسان ټپیان دي.

د طالبانو د ټرانسپورت او هوایي چلند وزارت نن د هېواد په ۱۴ ولایتونو کې د باران د اورښت اټکل کړی دی.

د ټرانسپورت او هوایي چلند وزارت د سالنګونو په ګډون یاد اټکل په بدخشان، پنجشېر، تخار، کندز، بلخ، نورستان، لغمان، کونړ، ننګرهار، پروان، سرپل، بامیان او سمنګان ولایتونو کې کړی دی.

د یاد وزارت د اټکل له مخې به د باران کچه په بیلابیلو سیمو کې له (۱۵ څخه تر ۳۵) ملي مترو پورې رسېږي او په سویل ختیځو، مرکزي او لویدیځو ولایتونو کې د تېزو بادونو، خاورو او دوړو اټکل هم شته چې د سرعت کچه به یې ساعت کې له (۵۰ څخه تر ۷۰) کیلو مترو پورې وي.

د متحده ایالاتو نوي ولسمشر ډونالډ ټرمپ ویلي چې مایک پمپیو او نیکي هیلي ته به په حکومت کې برخه نه ورکوي.

مایک پمپیو د ټرمپ د جمهوري ریاست په لومړۍ دورې کې د بهرنیو چارو وزیر او د استخباراتو مرکزي ادارې یا سي آی اې مشر و او نیکي هیلي په ملګرو ملتونو کې د متحده ایالاتو استازې وه.

هیلي او پمپیو تر اوسه په دې اړه کومه تبصره نه ده کړې.

رویټرز راپور ورکړی، چې د بلوچستان د تېرې ورځې په چاودنه کې د وژل شویو پاکستاني پوځيانو جسدونه خاورو ته وسپارل شول.

د سرچینې د معلوماتو له مخې، د یادو پوځيانو د جنازې مراسمو کې د دغه هېواد پوځ مشر عاصم منیر، د بلوچستان والي او وزیر اعلی په ګډون ګڼو لوړپوړو سیمه ییزو چارواکو ګډون کړی و.

سرچینې د سیمه‌ییزو چارواکو له قوله ویلي، د دغه چاودنې موخه د پاکستان پوځ غړي وو.

تر دې وړاندې د پاکستان حکومت ویلي وو، چې په دغه برید کې عامو خلکو ته مرګ ژوبله اوښتې.

په پام کې ده، چې د امریکا ولسمشر جوبایډن د را روانې چهارشنبې په ورځ د امریکا له نوي متنخب ولسمشر ډونالډ ټرمپ سره وګوري.

د سپینې ماڼۍ مطبوعاتي دفتر څخه په خپره شوې خبرپاڼه کې راغلي، چې دوی دواړه به د بایډڼ په دفتر کې وګوري.

تر اوسه د دغې لیدنې اجنډا نه ده معلومه؛ خو په امریکا کې دا پخوانی دود دی، چې ولسمشر به له نوي منتخب ولسمشر سره لیده کاته کوي.

د یادونې ده چې د ۲۰۲۰ کال په ټاکنو کې ټرمپ بیا بایډن ته د لیدلو بلنه نه وه ورکړې.

قطر کې د دغه هېواد یوې باوري سرچینې فرانس پرېس ته ویلي، چې دوی به د اسرائیل او حماس ترمنځ د سولې په خبرو کې د منځګړي رول وځنډوي.

سرچینې ویلي، د حماس سیاسي دفتر له خپلو اصلي اهدافو سره سم عمل نه کوي.

هغه ویلي، قطر به تر هغه وخته پورې د دواړو لوریو منځګړیتوب ونه کړي، ترڅو چې دواړه لوري په خبرو کې له ښه نیت سره نه وي راغلي.

تېره ورځ یو شمېر رسنیو راپور ورکړی و، چې قطر په دغه هېواد کې د حماس دفتر تړي.