د طالبانو حکومت د صنعت او سوداګرۍ وزارت سرپرست نورالدین عزیزی د پاکستان له یو شمېر افغان سوداګرو او مهاجرو سره د لیدنې پر مهال ویلي، چې اسلامي امارت د افغان مهاجرو د بېرته ستنولو بهیر ته جدي پاملرنه لري او له هغوی هر اړخیز ملاتړ کوي.

نوموړي څرګنده کړه چې د دوی حکومت د افغانستان دننه د مهاجرو د ژوند د شرایطو د ښه والي لپاره پراخ اقدامات پیل کړي دي.

د دغه وزارت له خوا خپره شوې خبرپاڼه وایي، ښاغلي عزیزي د افغان مهاجرو له پاکستان څخه داوطلبانه او د درناوي ډک بېرته ستنیدو غوښتنه کړې او ټینګار یې کړی چې دا به د ملګرو ملتونو د کډوالو عالي کمیشنرۍ (UNHCR) د نړیوالو معیارونو مطابق ترسره شي.

د اسراییلو د دفاع وزیر، اسراییل کاتز وایي، چې د دغه هېواد پوځ به د غزې په هغو سیمو کې چې پاکې او نیول شوې دي، پاتې شي، حتی که جګړه هم پای ته ورسېږي.

کاتز ویلي، د اوربند د موافقې د بیا فعالولو هڅې ناکامې شوي او اوس اسراییلي پوځ د غزې دننه پراخه امنیتي سیمې رامنځته کړې دي، چې د فلسطینیانو پر ژوند یې جدي اغېز کړی.

اسراییلي پوځ وایي، دوی دا مهال د غزې ۳۰ سلنه برخه تر خپل کنټرول لاندې راوستې او د رفح ښار نیولو وروسته، د مورګ دهلېز پر لور پرمختګ کوي.

دغه دهلېز د غزې له ختیځ څخه تر مدیترانې سمندر پورې غځېدلی دی.

د اسراییلو په وینا، له ۱۸ مارچ راهیسې یې سلګونه حماس جنګیالي وژلي، چې پکې د دې ډلې لوړ پوړي مشران هم شامل دي؛ خو دغه عملیاتو ملګري ملتونه او اروپایي هېوادونو اندېښمن کړي دي.

د سعودي عربستان دفاع وزیر شهزاده خالد بن سلمان ټاکل شوې ده چې د راتلونکې پنجشنبې په ورځ تهران ته سفر وکړي.

دا تر اوو کلونو وروسته د دواړو هېوادونو ترمنځ تر ټولو لوړپوړی رسمي سفر ګڼل کېږي.

ایراني رسنۍ وایي، چې نوموړی به د ایران له لوړپوړو سیاسي او نظامي چارواکو، په ځانګړي ډول د وسله‌والو ځواکونو له لوی درستیز محمد باقري سره وویني.

راپورونه زیاتوي، چې په دې لیدنو کې به د غزې جګړې، د منځني ختیځ د هېوادونو وضعیت او د ایران او امریکا ترمنځ د احتمالي مذاکراتو په اړه بحث وشي.

دا سفر د سیمه‌ییزو اړیکو د تودېدو مهم ګام بلل شوی.

نیویارک ټایمز ورځپاڼې د امریکايي چارواکو له قوله راپور ورکړی چې د امریکا ولسمشر دونالد ټرمپ د اسراییلو له خوا پر ایران د هستوي تأسیساتو د پلان شوې حملې مخالفت کړی دی.

سرچینې وايي، اسراییلو غوښتل د مې میاشتې په جریان کې پر ایران برید ترسره کړي، څو د دغه هېواد د اتومي وسلو د تولید وړتیا لږ تر لږه یو کال ورو کړي؛ خو ټرمپ ویلي دا اقدام به د ایران سره د مذاکراتو بهیر ته زیان ورسوي.

د راپور له مخې، ټرمپ له اوږدو داخلي بحثونو وروسته پریکړه وکړه چې د نظامي برید پر ځای باید د ایران سره د خبرو له لارې ستونزې حل شي.

یاده دې وي، چې امریکا او ایران تیره اونۍ په عمان کې خبرې وکړې چې دواړو لوریو دا خبرې مثبتې او رغوونکې بللې دي.

د افغانستان لپاره د پاکستان ځانګړي استازي محمد صادق د طالبانو د بهرنیو چارو له وزیر مولوي امیرخان متقي سره د دواړو هېوادونو ترمنځ د همغږۍ د ګډې کمیټې (JCC) په ناسته کې کتلي.

په دې لیدنه کې امیرخان متقي د روان وضعیت، د دواړو هېوادونو د اړیکو، او په ځانګړي ډول د افغان کډوالو د جبري ایستلو په اړه ژوره اندېښنه څرګنده کړې.

نوموړي ټینګار کړی چې دواړه هېوادونه باید خپل اختلافونه د خبرو له لارې حل او له هغو څرګندونو او کړنو ډډه وشي چې د ولسونو احساسات راپاروي.

په دې ناسته کې د پاکستاني پلاوي مشر محمد صادق ویلي، چې افغانستان او پاکستان ژورې تاریخي او د ګاونډيتوب اړیکې لري او باید ګډه هڅه وشي چې شته ستونزې په تفاهم سره حل شي.

هغه زیاته کړې چې د پاکستان د لومړي وزیر مرستیال او د بهرنیو چارو وزیر محمد اسحاق ډار به ډېر ژر کابل ته سفر وکړي او هیله‌یې څرګنده کړه چې دا سفر به د دواړو لوریو ترمنځ د اړیکو د پیاوړتیا لامل شي.

د هېواد پخواني ولسمشر حامد کرزي د ناروې له سفیر پیر آلبرت الساس سره لیدلي.

په دې لیدنه کې حامد کرزي د افغانستان له خلکو سره د ناروې له مرستو مننه کړې او د دواړو هېوادونو ترمنځ د اړیکو د لا پیاوړتیا غوښتنه یې کړې ده.

ښاغلي کرزي د نجونو تعلیم د هېواد د پرمختګ او ودې لپاره حیاتي وباله او د تلپاتې سولې او ثبات لپاره یې ملي تفاهم اړین بللی.

د ایران د بهرنیو چارو وزارت ویاند، اسماعیل بقایي ویلي، چې د ایران او امریکا ترمنځ د مذاکراتو ځای له مسقط څخه روم ته احتمالي بدلون به د “نه‌جدي‌توب او بد نیت” نښه وګڼل شي.

نوموړي پر خپله ایکس‌پاڼه لیکلي: «په فوټبال کې د ګول دروازې بدلول یوه مسلکي تېروتنه ده.او په دیپلوماتیکو خبرو کې ورته بدلونونه چې اکثر د افراطي کړیو تر فشار لاندې کېږي کولای شي چې هر ډول پرمختګ له خنډ سره مخ کړي.»

بقایي ټینګار کړی چې ایران لا هم د مذاکراتو په “ازمایښتي پړاو” کې دی او د دا ډول بدلونونو دوام به د خبرو اترو پایلو ته زیان ورسوي.

د ایران ولسمشر مسعود پزشکیان ویلي، د هېواد چارې په عادي ډول پرمخ روانې دي او د امریکا سره د روانو خبرو اترو له امله یې چارې نه دي اغېزمنې شوې.

پزشکیان د ایران د مشر علي خامنه‌اي د وروستیو څرګندونو یادونه وکړه او ویې ویل چې د مذاکراتو بهیر عادي دی او هېواد خپل طبیعي مسیر تعقیبوي.

هغه زیاته کړې، که یو توافق وشي، موږ به یې هرکلی وکړو؛ خو د هېواد د چارو پر روان بهیر اغېزه نه لري.

پزشکیان زیاته کړې، چې د علي خامنه‌اي له خوا ټینګار شوي موارد به جدي وڅېړل شي او د پلي کېدو لپاره به عملي اقدامات وشي.

علي خامنه‌اي د امریکا سره د خبرو د لومړۍ مرحلې په اړه ویلي وو: «نه باید له حده زیاته خوشبینه و اوسو، او نه هم له حده زیاته بدبینه.»

د ارزګان د طالبانو د اطلاعاتو او کلتور ریاست په یوه خپره شوې خبرپاڼه کې ویلي، یو شمېر کسان چې په بېلابېلو جرمونو کې ښکېل پېژندل شوي، سبا پنجشنبه به د ترینکوټ ښار په ورزشي لوبغالي کې ورته تعزیري سزا ورکول شي.

په خبرپاڼه کې زیاته شوې، چې دا ۱۵ کسان د عدلي او قضايي ارګانونو له‌خوا مجرم پېژندل شوي او سزا یې وروستۍ شوې ده.

دغه ریاست له خلکو غوښتنه کړې چې د دغو مراسمو د نندارې لپاره دې ورشي.

د ایران د بهرنیو چارو وزیر عباس عراقچي ویلي چې د خپل راتلونکي سفر پر مهال به د ایران د مشر، آیت‌الله علي خامنه‌اي ځانګړی پیغام د روسیې ولسمشر ولادیمیر پوتین ته وسپاري.

نوموړي د دغه پیغام د محتوا په اړه څه نه دي ویلي.

عراقچي ویلي، که له امریکا سره مذاکرات د متقابل درناوي او برابر دریځ پر بنسټ وي؛ نو پرمختګ ممکن دی؛ خو د فشار له لارې به نتیجه ورنه کړي.

هغه همداراز ټینګار کړی چې ایران د یورانیمو د غني‌سازۍ د بندېدو چمتووالی نه لري؛ خو د باور رامنځته کولو لپاره د ځینو اندېښنو رفع کول امکان لري.

دا سفر داسې مهال ترسره کېږي چې د امریکا او ایران ترمنځ د مذاکراتو دویم پړاو ته تیاری نیول کېږي.