د افغانستان لپاره د پاکستان ځانګړي پخواني استازي اصف دراني ویلي، چې اکثره افغانان له طالبانو ملاتړ نه کوي.
نوموړي ویلي طالبان د کورني او بهرني مشروعیت له نشت سره مخ دي او هیچا په رسمیت نه دي پېژندلي.
هغه دغه راز زیاته کړې چې د کابل پر وړاندې د اسلام اباد پالیسي قاطع او د پاکستان له دوښمنانو د افغانستان پر نه ملاتړ ور ټوله ده.
د امریکا په لاس انجلس کې د اور لګېدنې له امله د وژل شویو کسانو شمېر ۲۴ تنو ته ورسېد.
امریکایي چارواکو ویلي چې ممکن د وژل شویو کسانو شمیر نور هم لوړ شي.
امریکایي چارواکو زیاته کړې، چې دې اورلګېدنې زرګونه کورونه سوځولي او له ۱۰۰ زرو زیات خلک یې له خپلو سیمو او کورونو پرېښودو ته اړ کړي دي.
امریکایي رسنۍ وایي، چې دغه اور تر اوسه ۳۰ سلنه مهار شوی او د پاتې اور د مهارولو هڅې روانې دي.
د دغه اور له کبله د اوښتو زیانونو د کره شمېر په اړه تر اوسه څه نه دي ویل شوي.
د هېواد د بهرنیو چارو پخواني وزیر حنیف اتمر د طالبانو له حکومت غوښتي چې د افغان ښځو پر زده کړو لګېدلي بندیزونه لغوه کړي.
نوموړي ویلي، د نجونو پر زدکړو بندیز ناروا عمل دی او باید لغوه شي.
هغه زیاته کړې چې طالب مشران باید په دې اړه د اسلامي همکاریو سازمان د مشرانو خبرې ومني.
د اتمر په خبره، که طالبان دا غوښتنې ونه مني؛ نو ښایي د افغان ملت او نړۍ له جدي غبرګون سره مخ شي.
د طالبانو حکومت د بهرنیو چارو وزیر امیر خان متقي په کابل کې د سعودي عربستان له سفیر فیصل طلق البقمي سره لیدلي.
د دغه وزارت مرستیال ویاند ضیاء احمد تکل په یوه خبرپاڼه کې ویلي، چې په دې ناسته کې دواړو لوریو د دوو اړخیزو اړیکو پر پراختیا، سعوديمېشتو افغانانو ته د کونسلي خدماتو رسول او په ټوله کې دوو اړخیزو اړیکو کې له شته فرصتونو څخه پر استفادې خبرې وشوې.
خبرپاڼه زیاتوي، چې امیرخان متقي په دې ناسته کې د افغانستان او سعودي اړیکې ارزښتناکې او تاریخي بللې او ټینګار یې کړی چې د دواړو هېوادونو ترمنځ د پلاوو تبادله زیاته شي.
خبرپاڼه کې ویل شوي، چې په یاده ناسته کې امیرخان متقي غوښتنه کړې چې د سعودي حکومت د افغانانو لپاره د حج او عمرې په کوټه کې زیاتوالی راولي او همداراز سعودي کې مېشتو افغانانو ته د کونسلي خدماتو په رسولو کې هم مرسته وکړي.
خبرپاڼه کې دغه راز زیاته شوې چې د سعودي سفیر ویلي چې هېواد یې غواړي په کابل کې د خپل حضور له لارې په مختلفو برخو کې افغانانو سره مرسته وکړي.
د افغانستان کرکټ بورډ ادارې نن د چمپینز ټراپي لپاره ۱۵ـ کسیزه لوبډله اعلان کړه.
کرکټ بورډ په یوه خپره کړې خبرپاڼه کې ویلي، چې دغه سیالۍ به د راتلونکي فبرورۍ میاشتې په ۱۹مه نېټه د پاکستان او عربي متحده اماراتو په کوربتوب پيل شي.
د کرکټ بورډ له لوري په اعلان شوې لوبډله کې حشمت الله شهیدي لوبډلمشر دی او د لوبډلې په ترکیب کې نور غوره شوي لوبغاړي ابراهیم ځدراڼ، رحمن الله ګربز، صدیق اتل، رحمت شاه، اکرام علیخل، عظمت الله عمرزی، محمدنبي، ګلبدین نایب، راشدخان، الله محمد غضنفر، نوراحمد، فضل حق فاروقي، فرید ملک او نوید ځدراڼ دي.
همدارنګه دروېش رسولي، ننګیالی خروټي او بلال سمیع بیا د احتیاطي لوبغاړو په ډله کې شامل دي.
په لندن کې مېشت افغانان د مغرضو کړیو پر ضد او د افغانستان د کرکټ په ملاتړ اعتراضیه غونډې ته چمتووالی نیسي.
لندن کې مېشتو افغانانو ویلي، چې د دغې غونډې اعتراض لیک به د برېتانیا پارلمان ته هم ولېږي.
دوی زیاته کړې چې دغه غونډه به د روانې جنوري میاشتې په ۱۹ نېټه د لندن په اجویر سیمه کې ترسره شي.
د یادونې ده چې له دې وړاندې د برېتانیا د پارلمان ۱۶۰ غړو د دغه هېواد کرکټ لوبډلې نه غوښتنه کړې وه، چې له ښځو سره د طالبانو د چلند په غبرګون کې له افغانستان سره سیالي لغوه کړي.
بل لورته د کرکټ نړۍوالې شورا (ای سي سي) هم د افغان کرکټ ملي لوبډلې ملاتړ کړی او ویلي چې د کرکټ د ودې په موخه به د افغان کرکټ بورډ سره خپلو مرستو ته دوام ورکړي.
د بدخشان شهر بزرګ ولسوالۍ اوسېدونکو د کانونو د ناعادلانه وېش په غبرګون کې لاریون کړی.
د سیمې خلک وایي، کانونه د دوی د سیمې دي؛ خو هیڅ ونډه نه ورکول کېږي.
دوی وایي طالبان کانونه د نورو ولایتونو خلکو ته ورکوي.
بل لورته د طالبانو ځایي چارواکي وایي، چې د ستونزې د حل لپاره سیمې ته ورغلي دي.
د خیبر پښتونخوا په بېلابېلو سیمو کې اووه پاکستاني پوځيان وژل شوي دي.
سیمهييزې سرچینې وايي، چې د شمالي وزیرستان په بېلابېلو سیمو کې د ایف سي ځواک سرتیری، پولیس افسر او دوه نور پوځیان وژل شوي دي.
د سرچینو د معلوماتو له مخې، دغه راز بیا د سوات په خوازه خېلو سیمه کې هم یو پولیس افسر د نامعلومه کسانو له لوري وژل شوی دی.
یاد کسان تر ډېره له وسله والو سره په مخامخ جګړه کې وژل شوي دي.
سرچینې زیاتوي، چې د لکي مروت به ګنډي چوک کې د عملیاتو پر مهال دوه پوځیان وژل شوي او درې نور ټپیان شوي هم دي.
د نړۍ د مسلمانانو شورا مشر محمدالعیسی د اسلامي همکاریو سازمان ناسته کې ویلي، چې د ښځو د زدکړو له حقونو په کُلي یا جزيي شکل منکرېدل او بیا دا اسلام پورې تړل ناسم عمل دی.
نوموړی زیاتوي حلالو ته حرام ویل لویه ګناه ده.
هغه د طالبانو حکومت ته په اشارې ویلي چې خپلو پرېکړو ته اسلامي بڼه ورنه کړي.
د یادونې ده چې یادې ناستې طالب چارواکي هم بلل شوي وو؛ خو ګډون یې پکې ونه کړ.
د افغان ښځو یو شمیر افغان فعالانې چې مشري یې شبنم صالحي او سپوژمۍ اکبرزۍ کوي د مغرضو کړیو ضد او د افغان اتلانو په ملاتړ د اَظیسيسي او بریتانیا پارلمان په ګډون یو شمیر اړوندو ادارو ته د لیک استولو او ایکس سپیسونو له لارې د افغانستان د کریکټ څخه ملاتړ څرګند کړی دی.
میرمن اکبرزۍ په خپل ایکس پاڼې لیکلي چې افغان میرمنې د نارینه وو او ښځینه وو دواړو او د هیواد د ملي کرکټ ټیم لپاره د دوامداره ملاتړ غوښتنه کوي.
هغې لیکلي:«د جنګسالارۍ او ویجاړونکي سیاست برعکس، موږ ښځې، په نړیوالې ټولنې غږ کوو چې د افغانستان ملاتړ وکړي، او په دې هېواد کې د جنسیتي توپیر د له منځه وړلو او په رسمیت پیژندلو لپاره عملي ګامونه پورته کړي.»
د بشري حقونو پخوانۍ غړې او د پوهنتون استادې شبنم صالحي بیا افغان لوبغاړي د خلکو ترمنځ د یوالي سمبول بولي او لیکلي چې د دوی تحریم کول هغه ملت منزوي کوي چې دمخه یې ستونزې زغملي دي.
صالحي لیکلي:«د افغان سپورټ ټیمونو په نښه کول افغانانو ته زیان رسوي، نه طالبانو ته، ددې پرځای راځئ د افغان میرمنو او مدني ټولنو د ملاتړ په زیاتولو تمرکز وکړو.»