د طالبانو حکومت د اسراییلو او حماس ترمنځ د اوربند هرکلی کړی.

د طالبانو حکومت په یوه اعلامیه کې د حماس او اسراییلو ترمنځ د اوربند د هوکړې له امله له منځګړو هېوادونو په ځانګړې ډول له قطر او مصر څخه مننه کړې.

اعلامیه کې راغلي دا هوکړه په غزه کې د حماس د مقاومت او غزې د خلکو د صبر پایله ده.

دوی ټینګار کړی، چې هوکړه باید په بشپړ ډول عملي او دایمي اوربند ته لاره هواره او غزې ته بشري مرستې پیل شي.

د طالبانو حکومت ویلي، نړیوال باید دا ډاډ تر لاسه کړي چې اسرائیل د هوکړې ټولې برخې په بشپړ ډول پلي کړي.

دوی یو وار بیا ویلي چې د غزې د ستونزو حل د خپلواک هېواد په توګه د فلسطین پېژندل دي.

هندي رسنیو خبر ورکړی، چې د بالیووډ مشهور ستوري سیف علي خان او دده مېرمن کرینه کپور کور باندې د هند په ممبۍ ښار کې غلو برید کړی چې سیف علي خان سخت ټپي شوی دی.

هندوستان ټایمز ورځپاڼې د هندي ډاکټرانو له قوله ویلي چې سیف علي خان د پنجشنبې په سهار درې نیمې بجې روغتون ته وړل شوی او پر بدن یې شپږ ټپونه دي.

بل لورته د ممبۍ پولیس وايي، بریدګر له پېښې وروسته تښتېدلی او ځواکونه یې په لټه کې دي.

سیف علي خان د هندي بالیووډ یو له مشهورو ستورو څخه دی چې په لسګونو مشهورو فلمونو کې راڅرګند شوی دی.

د پاکستان لومړي وزیر شهباز شریف ویلي، چې د هېواد اقتصاد ته به پرمختګ ورکوي.

شهباز شریف خپل ولس ته ډاډ ورکړی، چې اقتصاد به یې په پښو ودروي او له اوسنیو ستونزو به ولس ژغوري.

هغه دغه راز زیاته کړې، چې نړیوال بانک ورسره د شل میلیارده ډالره پور ژمنه کړې.

د یادونې ده چې پاکستان اوس مهال له اقتصادي، امنیتي او سیاسي پلوه له سختو ستونزو او کړکېچونو سره مخ دی.

په داسې حال کې چې حماس او اسراییل په غزه کې پر اوربند هوکړه وکړه؛ خو د امریکا ولسمشر بایډن او منتخب ولسمشر ټرمپ بیا د دغې هوکړې کریډیټ خپلو ځانونو ته ورکوي.

بایډن ویلي، چې دی د دغې طرحې اصلي طراح دی او د غزې جګړه یې پای ته ورسوله؛ خو ټرمپ وايي چې غزه کې د اوربند ټینګېدو په برخه کې د ده هڅې اغېزناکې وې.

د یادونې ده، چې تېر ماښام دواړو لوریو د شپږو اوونیو لپاره پر اوربند هوکړه وکړه.

بل لورته رویټرز ویلي، چې اسراییلو په تازه بریدونو کې غزه کې ۳۲ تنه وژلي.

ملګري ملتونه وايي، روان کال افغانستان کې تر ۵۰۰ زرو ډېر ماشومان د خوارځواکۍ له خطر سره مخ دي.

یاد سازمان په یو راپور کې ویلي، چې د دغې خوراځواکۍ یو اساسي علت اقلیمي بدلون دی.

بل لورته په کابل کې د یوناما مشرې روزا اتونبایووا ژمنه کړې، چې په افغانستان کې به د اقلیمي بدلون له کبله رامنځته شوې اقتصادي ستونزې څېړي.

د یادونې ده، چې افغانستان په لومړنیو شپږو هغو هېوادونو کې دی، چې د اقلیمي بدلون له کبله ډېر ځپل شوی.

د اوربند پر تړون له هوکړې څو ساعته وروسته، اسراییلي پوځیانو د غزې سویل رفع او مرکز نصیرت باندې بریدونه کړي.

رویټرز وايي، په دغو بریدونو کې ۳۲ کسان وژل شوي دي.

دا په داسې حال کې ده، چې دواړه لوري تېره شپه ناوخته پر اوربند هوکړې ته ورسېدل.

د هوکړې له مخې په غزه کې به د شپږ اوونیو لپاره اوربند وي او دواړه لوري به د یو بل بندیان خوشې کړي.

د امريکا د دفاع وزارت د اسراييلو او حماس ترمنځ د اوربند د هوکړې هرکلی کړی.

د امریکا دفاع وزیر لویډ اسټین ویلي، چې دا د واشنګټن د څو مياشتو د پرله پسې هڅو پايله ده.

اسټین زیاته کړې، چې د یوه حکومت په توګه موږ دې هوکړې ته د رسېدو لپاره نه ستړي کېدونکي هلې ځلې وکړې.

هغه ویلي، که څه هم دا تړون ډیر ناوخته شوی خو د میاشتو وینو تویولو وروسته کیدای شي د اسراییلو او حماس لپاره د نوي امید یوه کړکۍ وي.

نوموړي د هغو امریکايي کورنیو سره هم خواخوږي څرګنده کړه چې په دې جګړه کې د حماس له خوا وژل شوي دي.

دا په داسې حال کې ده، چې په غزه کې تر ۱۵ میاشتینۍ جګړې وروسته اسراییل او حماس د اوربند موافقې ته ورسېدل.

د ملګرو ملتونو سرمنشي انتونیو ګوتریش په غزه کې د اوربند او د یرغمل شویو بندیانو د خوشې کېدو هرکلی کړی.

ګوترېش پر اسرائیلو او حماس غږ کړی چې پر خپلو ژمنو ودرېږي او ډاډ ترلاسه کړي چې دا تړون په بشپړ ډول عملي کېږي.

نوموړي د فلسطين او اسرائيلو ترمنځ د اوربند تړون يو عاجل لومړيتوب بللی دی.

په ورته وخت کې د ترکیې په ګډون یو شمېر هېوادونو د حماس او اسرائیلو ترمنځ د اوربند د هوکړې هرکلی کړی او د هغې پر بشپړ تطبیق یې ټینګار کړی دی.

د افغان سولې لپاره د امریکا پخوانی ځانګړی استازی زلمی خلیلزاد وایي، د دې پر ځای چې پاکستان په امریکا دننه د ځان سپینولو ته کار ووایي، ښه دا ده چې دا لګښت دې په داخلي کشالې ولګوي او هغه ته حل لار ومومي.

ښاغلي خلیلزاد په خپلې ایکس پاڼې لیکلي چې پاکستاني پوځ دې په خپل هېواد کې د وضعیت عادي کولو لپاره درې ګامونه واخلي.

نوموړي د پاکستان د پخواني لومړي وزیر عمران خان چې دا مهال په زندان کې دی د خلاصون، د هغه له ګوند سره مذاکرات او دا هرڅه دې د جنورۍ تر شلمې پورې ترسره کړي.

هغه ویلي چې دا ګامونه به نه یواځې دا چې د پاکستان حکومت دپاره یو مثبت بدلون ومومي بلکې د ولسمشر ټرمپ له ادارې سره به د اسلام اباد په ښو اړیکو کې هم مرسته وکړي

د الجزیرې خبري شبکه د اسراییلو د لومړي وزیر بنیامین نتنیاهو د دفتر له قوله ویلي، چې په غزه کې د اوربند تړون نهايي شوی نه دی.

الجزیرې ویلي، چې په راتلونکو ساعتونو کې به وروستي جزئیات حل شي.

بل لورته ټلیګراف د خپلو سرچینو له قوله خبر ورکړی وو چې په دوحه کې د اسراییلو او حماس ترمنځ د مذاکره کوونکې ډلې ترمنځ په اوربند موافقه شوې.