د پښتون ژغورنې غورځنګ مشر منظورپښتین په یو ویډیويي پیغام کې په خیبر پښتونخوا کې د ملتپاله ګوندونو له مشرانو ګیله وکړه چې په لوی لاس یې د خیبر دلویې او تاریخې جرګې پریکړې وننګولې او بریالۍ جرګه یې ناکامه کړه.

ښاغلي پښتین وویل په داسې حال کې چې د جرګې ټولې پریکړې د ملتپاله ګوندونو د استازو په مشوره او تایید اعلان شوي وو خو د ناڅرګند دلیل له امله دوی له دې پریکړو په شاه شول او همدا ددې لامل شوه چې د جرګې پریکړې عملي نه شي.

منظور پښتین یو ځل بیا په پښتونخوا کې په سیاسي ګوندونو غږ وکړ چې اوس هم شونې ده چې د جرګې ټولې پریکړې عملي شی خو شرط دادی چې په واقعې مانا سره راټول او د جرګې د پریکړې عملي کیدل وغواړو.

ګڼو افغانانو د انګلستان په زړه لندن کې د سوله ایز لاریون وروسته د افغان کریکټ په ملاتړ لویه غونډه ترسره کړه.

ویناوالو د یو شمیر پردیپالو کړیو له لورې په افغان لوبډلې تورونه وغندل او اړوندو ادارو یې وغوښتل چې ورزش سیاسي نه کړي.

پدې غونډه کې د ولسي جرګې پخوانۍ غړې شکریه بارکزۍ ګډون د ټولنیزو رسنیو د کاروونکو پام ځانته اړولې او د همدې جرګې بله غړې فوزیه کوفي چې ویل کیږي په افغان کریکټ د بندیز غوښتونکې ده مخاطب کړې او ورته یې لیکلي:« وکیل تا وکیل است»

د امریکا ولسمشر ډونالډ ټرمپ ویلي، چې طالبانو ته پاتې شوې وسلې به بېرته ورنه واخلي.

نوموړي پر بایډن تونده نیوکه کړې، چې د امریکا وسلې یې د امریکا دوښمن ته سپارلې دي.

هغه بایډن یو بې کفایته ولسمشر بللی او زیاته کړې یې ده، چې طالبانو سره یې میلیاردونه ډالره مرسته کړې.

ټرمپ ویلي، طالبانو باندې به مرستې بندې او له دوی سره د امریکا پاتې شوې وسلې به بېرته ترې واخلي.

په امریکا کې له ۱۴ ساعته ځنډ وروسته، ټیک ټاک کمپنۍ بېرته اعلان وکړ، چې اوس مهال هلته یو شمېر امریکايي وګړو بیا دغه اپلیکیشن ته لاسرسی پیدا کړی او د ټرمپ په راتګ سره به دا اپلیکشن بېرته فعال شي.

د یکشنبې په ورځ په ټوله امریکا کې ټیک ټاک وتړل شو، چې نږدې دوه سوه میلیونه کاروونکي یې لرل.

خو تېر ماښام بیا د دغه فلټ فارم کاروونکو پر خپلو ټولنیزو رسنیو لیکلي وو، چې بېرته یې ټیک ټاک ته لاسرسی پیدا کړی دی.

امریکا وايي، د دغه چینايي کمپنۍ مالکین ښايي د امریکايي وګړو معلوماتو ته لاسرسی پیدا کړي؛ نو ځکه یې یاد اپلیکیشن وتړه.

د افغان سولې لپاره د امریکا ځانګړي پخواني استازي زلمي خلیلزاد ویلي، چې د نجونو او ښځو پر مخ باید ښوونځي او پوهنتونونه د راتلونکي ښوونیز کال له پیل سره سم پرانېستل شي.

هغه په دې اړه د عباس ستانکزي څرګندونې او د اسلامي همکاریو سازمان ناستې پرېکړه لیک هیله بښوونکی بللی دی.

د یادونې ده، چې وړمه ورځ عباس ستانکزي په یوه غونډه کې ویلي وو، چې دا د شریعت لار نه؛ بلکې خپل طبیعت دی، چې د ښځو پر وړاندې د زده کړو دروازې تړلې دي.

العربیه راپور ورکړی، چې د درې اسراییلي بندیانو ښځو د انتقال پروسه د سرې میاشتې ټولنې ته سپارل کېږي.

د روني ګونن، امیلي داماري او دورون اشتاتنبرچر په نومونو دا بندي شوې ښځې نن ازادیږي، چې په پام کې ده سرې میاشتې ټولنې ته وسپارل شي.

دا ګام د اوربند له پیل څو ساعته وروسته اخیستل کېږي.

د ازادۍ په نوم جبهې ادعا کړې، چې په بغلان کې یې څلور طالب سرتېري وژلي دي.

دغې جبهې ویلي، چې د طالبانو د استخباراتو د موټرو پر کاروان یې تېر ماښام د پلخمري ښار په مرکزي چوک کې برید وکړ چې څلور طالب سرتېري یې ووژل.

د طالبانو حکومت تر اوسه په دې اړه څه نه دي ویلي.

د هند پولیسو اعلان کړی چې په ممبۍ ښار کې یې د بالیووډ پر ستوري سیف علي خان د برید په تور یو بنګله دېشی وګړی نیولی دی.

هندي پولیسو ویلي، دا سړی چې خپل نوم یې بدل کړی او هند ته په غیر قانوني ډول ننوتلی و، د ممبۍ ښار په څنډه کې پېژندل شوی او نیول شوی دی.

د یادونې ده چې د بالیووډ مشهور ستوری سیف علي خان او مېرمن یې کرینه کپور پنجشنبه د شپې ناوخته د هند په ممبۍ ښار کې په خپل کور کې په یوه برید کې سخت ټپیان شول.

هندي ډاکټرانو ویلي، چې سیف علي خان یې عملیات کړی او له خطر څخه بهر دی.

د اسرائیلو د لومړي وزیر بنیامین نتنیاهو دفتر اعلان کړی چې په غزه کې د اوربند لومړی پړاو به نن یکشنبه پیل شي.

یاد دفتر ویلي، چې د یرغمل شویو کسانو لیست یې ترلاسه کړی چې ټاکل شوې نن خوشې شي.

بل لورته د حماس پوځي څانګې اعلان کړی، چې د هوکړې له مخې به نن درې اسراييلي يرغمل شوې ښځې خوشې کړي.

د یادونې ده چې نن اسرائیلي پوځ په غزه کې په تازه بریدونو کې اته فلسطینیان وژلي او ۲۵ نور یې ټپیان کړي دي.

د طالبانو حکومت د اقتصادي مرستیال د اطلاعاتو رئیس احمد تقي په خپل ایکس‌پاڼې لیکلي چې طالبانو په هیواد کې ټیک ټاک بند کړی او استعمال یې شرعاً جواز نه لري.

هغه لیکلي:«کاش ټیک ټاک ته داسې طریقه پیدا شي چې په هېواد کې یې څوک نه استعمالولی شي او نه یې هم کتلی شي»

خو د طالبانو د کابل د امنیه قومنداني پخواني ویاند «جنرال» مبین دغه خبرو ته په غبرګون کې لیکلي، د بهرنیو هوايي بریدونو د مخنیوي لپاره رادار مهم دی.

جنرال مبین ویلي:«رادار ډېر لازمي دی، بیا به مو څوک خاوره بمبار نکړي سړیه. دا وړې خبرې دي»

«جنرال» مبین داسې مهال دا څرګندونې کوي، چې څه موده وړاندې د پکتیکا په برمل ولسوالي کې د پاکستان د هوایي برید له کبله تر ۵۰ زیات عام وګړي ووژل شول او لسګونه نور ټپیان شول.