د جمعیت علمای اسلام ګوند مشر، مولانا فضلالرحمن خبرداری ورکړی چې د افغان کډوالو شړل به د اسلاماباد او کابل پر اړیکو منفي اغېز وکړي.
نوموړي په یوه ناسته کې ویلي چې د پاکستان حکومت باید د افغان کډوالو د بېلابېل درجو ترمنځ توپیر وکړي او له هېواده د افغان پانګهوالو او محصلینو په ایستلو کې باید ډډه وکړي.
هغه زیاته کړې چې که د افغانانو پانګې له پاکستاني بانکونو وایستل شي، دا به د پاکستان په ګټه نه وي.
ټاکل شوې چې د افغان کډوالو د ایستلو بهیر د روان کال د سپتمبر له لومړۍ نېټې پیل شي.
د پخواني ولسمشر لومړي مرستیال امرالله صالح ویلي، کله ناکله باید د هغو نژادپالو او سپینپوستو کسانو استدلالونه جدي ونیول شي، چې د مهاجرت او ادغام پر منفي اړخونو نیوکه کوي.
هغه زلمي خلیلزاد ته په اشارې ویلي، که څه هم نوموړی د ملګرو ملتونو سفارت په څېر لوړو پوړیو ته ورسېد، خو بیا هم له خپل بومي ذهنیت څخه نه و وتلی او هڅه یې کوله چې د شخصي عقدو پر بنسټ له اشرف غني څخه غچ واخلي.
صالح زیاتوي، که له خلیلزاد څخه د امریکا تابعیت واخېستل شي، شاید د ارزګان خیالي کرکټر “کاکو نظر محمد” هم ترې زیات تدبیر ولري.
د چارو ادارې پخوانی رییس فضل محمود فضلي وایي، واشنګټن ته د پاکستان د پوځ مشر عاصم منیر دوه پرلهپسې وروستي سفرونه د نوو نیابتي ستراتېژیکو بمونو د بازارموندنې لپاره شوي دي.
ښاغلی فضلي وايي چې د دغو بمونو د سوداګریزو موادو تولید پیل شوی او د همدې اګست میاشتې په پای کې به یې لومړنی نندارتون په اسلاماباد کې ترسره شي.
دا په داسې حال کې ده، چې په دې وروستیو کې امریکا ویلي، چې پاکستان سره به د ترهګرۍ د مخنیوي په برخه کې ګډه همکاری وکړي.
د افغان مېرمنو د برخې فعاله ډيوه پتنګ وايي، طالبان په ښکاره د ښځو د تعليم او فعاليتونو پر وړاندې مخالفت کوي؛ خو بايد حقيقت ومنو چې زموږ په ټولنه کې ډېر نارينه چې ځانونه ډيموکرات ګڼي، هم د خپلو ښځو حقونه تر پښو لاندې کوي.
هغه زياتوي، د پخواني ولسمشر اشرف غني او حامد کرزي پرته د احمدشاه مسعود، عطا محمد نور، عبدالله عبدالله، محمد محقق او اسماعيل خان په شان جهادي او سياسي مشرانو تر اوسه خپلې ښځې رسنيو ته نه دي راویستي او د ښځو د حقونو د دفاع لپاره يې اقدام نه دی کړی.
هغې لیکلي:«د ښاغلي ولسمشر غني او ښاغلي پخواني ولسمشر کرزي پرته ايا تر اوسه پورې د احمدشاه مسعود، رباني، عطا محمد نور، عبدالله عبدالله، محمد محقق، اسماعيل خان او داسې نور جهادي او سياسي مشران مو ليدلي چې خپلي ميرمنې يې رسنيو ته راباسلې وي او يا په اوسنيو حالاتو کې د ښځو حقونو څخه د دفاع لپاره راوتلې وي؟
نو بيا ولې له طالب څخه د دې کار تمه ولرو؛ ځکه طالب خو په ښکاره مخالفت اعلان کړی، اما دغه پخواني سياسيون نه مخالفت کوي او نه عمل؛ نو په دې اساس د دوی ذهن له طالب هم بدتره دی.»
نوموړې ټينګار کوي چې ستونزه يوازې طالبانو کې نه ده، بلکې د ټولنې نارينه د ميرمنو د تعليم، کار او فعاليت مخالفت لري او دا وضعيت به تر هغه وخته دوام وکړي چې د نارينه وو فکر او مفکوره بدله نشي.
د طالبانو حکومت تر واک لاندې د برېښنا شرکت اعلان کړی چې د اوزبېکستان د انرژۍ وزیر جورابیک میرزا محمدوف او د افغانستان لپاره د دغه هېواد ځانګړی استازی عصمتالله ایرګاشیف کابل ته په رسمي سفر راغلي دي.
دوی د امارتي شرکتونو د رییس احمدجان بلال او د برېښنا شرکت د عمومي اجرائیوي رییس عبدالباري عمر سره لیدلي دي.
په نږدې شیبو کې تمه ده چې د افغانستان برېښنا شرکت او د اوزبېکستان استازي د څلورو مهمو پروژو تړونونه لاسلیک کړي.
د خیبر پښتونخوا په کوهاټ ولسوالۍ کې اووه تنه د نامعلومو وسلهوالو لخوا په ډزو وژل شوي دي.
پولیس وايي، وژل شوي کسان چې عمرونه یې له ۱۷ تر ۳۱ کلونو پورې ښودل شوي، د ټنډه بند له لیدو را ستنېدل، چې ناڅاپه پرې وسلهوالو ډزې وکړې.
تر اوسه کومې ډلې د پېښې مسوولیت نه دی منلی.
د پاکستان حکومت هم د وژل شویو کسانو هویت نه دی څرګند کړی.
پخواني ولسمشر حامد کرزي په پښتونخوا او ګلګت کې د سیلابونو له امله خلکو ته په اوښتې مرګژوبلې خواشیني ښودلې.
کرزي ویلي، چې دی د پېښې د قربانیانو له کورنیو سره د تسلیت مراتب شریکوي.
د یادونې ده، چې هلته د وروستیو سیلابونو له امله تر ۳۵۰ ډېر کسان ووژل شول او ګڼ شمېر نو ټپیان شول.
د امریکا ولسمشر ډونالډ ټرمپ ویلي چې اوکراین باید د جګړې د پای ته رسېدو لپاره له روسیې سره هوکړې ته ورسېږي، ځکه په وینا یې «روسیه ستر ځواک دی؛ خو اوکراین داسې نه دی.»
د رویټرز د راپور له مخې، دغه څرګندونې هغه مهال وشوې چې ټرمپ په الاسکای کې د روسیې له ولسمشر ولادیمیر پوتین سره ولیدل.
رویټرز وایي، پوتین د اوکراین د لا نورو سیمو غوښتنه کړې او ټرمپ د هغه غوښتنې د اوکراین ولسمشر ولادیمیر زېلېنسکي ته هم رسولي دي.
ویل شوي پوتین ټوله ډونېتسک سیمه غواړي او غواړي چې زېلېنسکي یې ومني.
د رویټرز د راپور له مخې، د اسرایيلو پوځ د غزې د شمالي برخې د تخلیې لپاره چمتووالی نیسي.
چارواکو اعلان کړی چې له نن یکشنبې څخه به د سیمې اوسېدونکو ته خېمې او د لنډمهالي مېشتېدو نور وسایل ورکړي او د غزې سویل ته به یې انتقال پیل کړي.
غزه چې نږدې ۲.۲ میلیونه وګړي لري، د اسرایيلو په خبره د دې لپاره خالي کېږي چې ولسي وګړي خوندي پاتې شي.
په ورته وخت کې د اسرایيلو لومړي وزیر بنیامین نتنیاهو د ټولې غزې د نیولو او لاندې کولو پلان هم پر مخ وړي.
د طالبانو حکومت د کار او ټولنیزو چارو وزارت اعلان کړی چې د ۱۴۰۴ لمریز کال د زمري ۲۸مه، د سې شنبې په ورځ د هېواد د خپلواکۍ د بېرته ترلاسه کولو د ورځې په مناسبت، په ټول هېواد کې عمومي رخصتي ده.
یاد وزارت په یوه خپره شوې خبرپاڼه کې لیکلي چې دا ورځ د انګریزانو د ښکېلاک پای او د خپلواکۍ د ۱۰۶مې پرتمینې کلیزې سره برابره ده.