اسرائیل د لبنان په یو شمېر سیمو بریدونه کړي، چې اته تنه یې وژلي.
یاد حکومت ویلي، چې دا بریدونه یې پر دوی د لبنان له لوري د را توغول شویو توغندیو په غبرګون کې کړي دي.
بل لورته لبنان د اسرائیل په خاوره د توغندیو توغول رد کړي او ویلي یې دي، چې دوی لاهم له اسرائیل سره اوربند ته ژمن دي.
د لبنان او اسرائیل ترمنځ نږدې یو کال اوربند شوی وو.
د پښتونخوا ایالتي وزیر علي امین ګنډاپور ویلي، که د پاکستان حکومت دنده ورکړي، نو د طالبانو حکومت له مشر سره به خبرې وکړي.
ګنډاپور ویلي، د اوسنۍ ستونزې یوازینی حل خبرې اترې دي.
نوموړي یو وار بیا د پاکستان له حکومت غوښتي، چې د دغو خبرو فرصت په رسمي ډول ورکړي.
دغه پاکستاني چارواکي زیاته کړې، چې طالبان د قومي مخورو خبرې نشي ردولی.
هغه تر دې وړاندې هم ویلي، چې کابل ته به د قومي مخورو یوه جرګه ولېږي.
د حماس ډلې سیاسي مشر صلاح البردویل او د هغه مېرمن د اسراییل په هوایي برید کې د غزې په خان یونس کې ووژل شول.
حماس ته نږدې رسنیو هم د هغه او د مېرمنې د مړینې خبر تایید کړی دی.
تر اوسه اسراییلي چارواکو د دې برید او د البردویل د وژنې په اړه څه نه دي ویلي.
دا پېښه داسې مهال شوې چې په غزه کې تر اوربند وروسته اسراییلو یو ځل بیا بمبارۍ پیل کړې او تر اوسه یې زرګونه کسان وژلي دي.
د سيآیای پخوانۍ مامورې سارا ادم د امریکا له لوري د جایزو له نوملړه د سراج الدین حقاني او عزیز الرحمان حقاني د نومونو اېستل د امریکا لپاره خطرناک بللي دي.
نوموړې ویلي، چې دغه اقدام یوازې دوښمن ته ګټه رسوي.
هغې زیاته کړې، مونږ د ترهګرۍ پر وړاندې د حقیقي بدلون هیله درلوده؛ خو اوس همغه زړې تېروتنې تکراریږي.
ادم زیاتوي، داسې ښکاري چې د امریکا د نوي حکومت له لوري حقاني شبکې ته دا انعامونه ورکول کېږي.
امریکا د طالبانو حکومت د کورنیو چارو د سرپرست وزیر سراج الدبن حقاني نوم، د جایزې له لېست څخه وویست.
له ده سره دوه تنه نور عبدالعزیز حقاني او یحیی حقاني هم له دغه لیست څخه وتلي
امریکا د سراج الدین حقاني په اړه د معلوماتو د شریکولو په سر، لس ميلیونه ډالر انعام ټاکلی وو.
د پکتیا پخوانی والي محمد حلیم فدایي وایي، طالب مبلغینو خپلو مخالفینو ته پیغورونه پیل کړي، چې خلیلزاد او ادم بوایلر له طالبانو سره لیدلي.
نوموړی وایي، د طالبانو له دې کړنې څرګندیږي، چې دوی لاهم له عقدې ډک چلند کوي او همغه جګړهییز ادبیات کاروي.
هغه وایي، دا یوه ناپوهه ډله ده، چې تر اوسه د تعامل او دیپلوماتیکو اړیکو په توپیر نه پوهیږي او د امریکا د رضایت لپاره خپلو مخالیفینو سره دوښمني کوي.
نوموړی زیاتوي:« تر ټولو بېشرمه خبره لا دا ده چې دوی د امریکا د رضایت او ښه نیت لپاره د هغوی بندیان خوشې کوي، خو د خپل ولس نجونو ته د ښوونځیو او پوهنتونونو دروازې د «ښه نیت» له مخې هم نه خلاصوي. یا په بله وینا، دوی «رحماء علی الکفار» دي، خو «اشداء علی البنات والنساء المسلمات الافغان»! دي.»
په اسلام آباد کې د طالبانو حکومت پخواني سفیر ملا عبدالسلام لیکلي چې د خپلو خلکو چوپړ کې باید خولې توی شي او د بل د خوشالۍ لپاره سیاسي تګلارې جوړې نه شي.
ښاغلي ضعیف پر خپله ایکسپاڼه لیکلي:«هغه ډلې او اشخاص ناکامه کیږي چې د بل د خوښۍ لپاره خپلې سیاسي تګلارې جوړوي، هغه څوک به بریالي پاتې کیږي چې د خپلو خلکو د خوښۍ او سوکالۍ لپاره وزرې غوړوي، د پردو ملاتړ د هغوی تر ګټو تړلی دی، د خپلو ملاتړ د ټولو تر ګټو تړلی دی، د خپلو د سوکالۍ لپاره تګلارې جوړې کړئ، په چوپړ کې یې خولې توی کړئ»
د یادونې ده چې ملاضعیف تر دې وړاندې هم د طالبانو حکومت په مشر شیخ هبتالله اخوندزاده نیوکې کړې دي.
د سوریې د نوي انتقالي حکومت مشر احمد الشرع له ولادیمیر پوتین غوښتي، چې مسکو ته د بشارالاسد له لوري د سوریې سپارل شوې پیسې بېرته دوی ته ورکړي.
العربیه بیا د خپلو سرچینو په حواله ویلي، چې الشرع له پوتین غوښتي چې بشارلاسد هم ور وسپاري.
ورته مهال رویټرز ویلي چې روسیې له دغې غوښتنې سره موافقت نه دی کړی.
یو شمېر معترضو مېرمنو ټرمپ ته لېږلي لیک کې خلیلزاد خیانتکار مامور بللی او د هغه د محاکمه کېدو غوښتنه یې کړې.
دوی ویلي، چې افغان ښځې د خلیلزاد د ناسمو سیاستونو له کبله وځپل شوې.
لیک کې راغلي چې خلیلزاد د امریکا له ارزښتونو سره خیانت کړی او یوې تروریستي ډلې ته یې مشروعیت ورکړی.
د مشرانو جرګې پخواني مشر فضل هادي مسلمیار د نوي کال د پیل په مناسبت ویلي، چې یو بل کال هم نوی شو؛ خو لا هم افغان نجونې د ښوونځي د زنګ په انتظار په کورونو بندیوانې ناستې دي.
ښاغلي مسلمیار په خپله ایکس پاڼه لیکلي، تعلیم یوازې یو انساني حق نه بلکې له تعلیم سره د یوه هېواد پرمختګ، سوکالي، سرلوړي او روښانه راتلونکی تړلی دی.
هغه ویلي:«موږ که وغواړو له نړۍ سره د سیالۍ پر ډګر هسکه غړۍ او سیال ودرېږو، باید په پخپلو خویندو، لوڼو او زامنو زده کړې وکړو، ځوان نسل ته کاري، تعلیمي او د زده کړو په برخه کې هر اړخیز فرصتونه چمتو کړو ترڅو افغان زلمی او افغانه پتمنه خور د نړۍ د سیالو ځوانانو او نجونو سره په تعلیمي ډګر کې داسې هسکه غاړه ودرېږي لکه څومره چې ددې وطن عظمت هسک دی.»
نوموړي دغه راز ویلي، چې تعلیم د یوې کورنۍ، ټولنې، هېواد او په ټوله کې د یوه فرد انساني، اساسي او حیاتي حق دی، چې د جهالت پر وړاندې د مقابلې عالي وسیله او د ټولنې او کورنۍ د تربیت، سوکالۍ او ډاډمن راتلونکي تضمین دی.