د هند لومړي وزیر نریندرا مودي د نیوزیلنډ لومړي وزیر ته د چتیسګر ایالت د بستر سیمې یوه ځانګړې هنري مجسمه ډالۍ کړې ده.
دا مجسمه چې د «ډوکرا د ژوند ونه» (Dhokra Tree of Life Sculpture) په نوم یادیږي، د هند د لرغوني فلزي هنر یوه بېلګه ده چې د موم د له منځه وړلو (Lost-Wax Casting) دودیزې طریقې په وسیله جوړه شوې ده.
د راپور له مخې، دغه هنر د نړۍ له تر ټولو پخوانیو فلزي جوړولو طریقو څخه ګڼل کېږي او هره ټوټه یې د ماهرو هنرمندانو له خوا په لاس جوړېږي، له همدې امله هره مجسمه ځانګړې بڼه لري.
د «ژوند ونه» د انسانانو او طبیعت ترمنځ د اړیکې، بیا رغونې، سوکالۍ او همغږۍ نښه ګڼل کېږي. دغه مفهوم د هند د «کلپورکشا» (Kalpavriksha) له دودیز تصور سره تړاو لري او د نیوزیلنډ د ماؤري خلکو د «واهاکاپاپا» (Whakapapa) له مفکورې سره هم ورته والی لري.
ویل شوي چې دا هنري اثر یوازې د ښکلا لپاره نه دی، بلکې د هند د قومي میراث، دودیزو هنرونو د ساتنې، د هنرمندانو د ملاتړ او د کلتوري دوام او طبیعي همغږۍ ارزښتونه هم څرګندوي.
