د ملګرو ملتونو د سرمنشي ویاند سټیفن دوجاریک وايي، چې که د نجونو پر زدهکړو بندیزونه همداسې دوام وکړي؛ نو تر ۲۰۳۰ کال پورې به څلور میلیونه افغانې نجونې له زدهکړو بې برخې وي.
دوجاریک هیله ښودلې، چې دا بندیزونه تر یاد کال پورې ونه غځول شي.
تر دې وړاندې یونیسف ویلي وو چې اوس مهال ۲.۲ میلیونه نجونې له زدهکړو بې برخې دي.
د یادونې ده، چې د نوي کال له پیل سره هم ۴۰۰ زره نجونې له زدهکړو بې برخې پاتې شوې دي.
د ملګرو ملتونو د ښځو برخې اجرایه مدیره سیما باهوس وايي، چې افغانستان کې د نجونو پرمخ د زدهکړو بندیز پر نسلونو اغېز کوي.
نوموړې پر خپلې ایکس پاڼې لیکلي، چې د افغان نجونو پر مخ باید ښوونځي پرانېستل شي او د دوی حقونه بېرته ورکړل شي.
نوموړې ټینګار کړی، چې په دې برخه کې باید هیڅ ځنډ ونه شي.
که څه هم د طالبانو حکومت په لومړنیو وختونو کې ژمنې کړې وې، چې د نجونو پر مخ به ښوونځي پرانېزي؛ خو تر اوسه لاهم له شپږم ټولګي پورته د ښوونځیو دروازې د دوی پرمخ تړلې دي.
د امریکا د بهرنیو چارو وزیر مارک روبیو له قطر مننه کړې، چې افغانستان کې یې د بندي امریکايي وګړي د خلاصون لپاره هلې ځلې کړې دي.
هغه د قطر له لومړي وزیر محمد بن عبدالرحمن بن جاسم ال ثاني سره ټیلفوني خبرې کړې، چې د سیمې او افغانستان د امنیت په تامین، سولې او ثبات په اړه هم غږېدلي.
د یادونې ده، چې تېره اوونۍ د طالبانو حکومت امریکايي وګړی جورج ګلېزمن له بنده ازاد کړ.
د امریکا د بهرنیو چارو وزارت ومنله چې د طالبانو د کورنیو چارو وزارت د سرپرست سراج الدین حقاني او د حقاني شبکې د نورو غړو په سر ایښودل شوې جایزه یې لغوه کړې.
د بهرنیو چارو وزارت ویلي چې د لسو میلیونو ډالرو جایزه لغوه شوې خو د ښاغلي حقاني نوم اوس هم د امریکا د تروریستي ډلو او سازمانونو په لیست کې شته.
د امریکا د بهرنیو چارو وزارت وایي،له دې وروسته د سراج الدین حقاني د نیولو او د هغه په اړه د اړوندو معلوماتو د ورکولو په سر یاده جایزه نشته
سیمهییزې سرچینې وایي، چې نن ماښام له روژه ماتي وروسته د کابل عبدالحق څلور لارې سره چاودنه شوې.
تر اوسه د دغې چاودنې د نوعیت او تلفاتو په اړه څه نه دي ویل شوي.
مسؤلو چارواکو هم تر اوسه په دې اړه څه نه دي ویلي.
د ایران د بهرنیو چارو وزیر عباس عراقچي وایي، د امنیتي ځواکونو چمتووالی او د خلکو مرسته یې په لوړه کچه ده او هیڅوک پر ایران د برید جرئت نشي کولی.
نوموړی دا څرګندونې د تهران او واشنګټن ترمنځ د اړیکو د ترینګلتیا په اوج کې کوي.
د یادونې ده چې تېره ورځ امریکایي چارواکو ویلي، چې ټرمپ د پوځي اقدام د مخنیوي لپاره له ایران سره خبرې غواړي.
تېر ماښام د کابل ښار اړوند قلعه زمان کې د دوو کورنیو ترمنځ شخړه کې یو کس وژل شوی او بل تن ټپي شوی دی.
د سیمې اوسیدونکو حماسه میډیا ته وویل چې پیښه د تراوو پرمهال له لفظي شخړې پیل شوه، چې وروسته یو تن په تبر بل کس په تندي وواهه او ځای پرځای یې وواژه.
پاکستانۍ رسنۍ ایکسپریس ټریبون ویلي، چې افغانستان ته د پاکستان د ځانګړي استازي محمد صادق خان د سفر اصلي اجنډا د ټيټيپي په اړه له طالبانو سره خبرې وې.
د سرچینې د معلوماتو له مخې، طالبانو د تحریک طالبان پاکستان ډلې د فعالیتونو په اړه اندېښنه ښودلې او پاکستاني لوري ته یې د همکارۍ ډاډ ورکړی.
ټریبون ویلي، چې طالب چارواکو پاکستاني لوري ته ویلي، چې پاکستان له دومره زور سره د ټي ټي پي پر وړاندې پاتې راځي، نو دوی به د یادې ډلې پر کنټرول څه ډول وتوانیږي.
د یادونې ده چې محمد صادق خان د یکشنبې په ورځ کابل ته راغلی وو.
د طالبانو حکومت د ایران د بهرنیو چارو وزیر له هغو څرګندونو هرکلی کړی، چې ویلي وو، افغانستان کې د پخوا په پرتله حاکمیت ټینګ شوی.
د طالبانو حکومت مرستیال ویاند حمدالله فطرت ویلي، چې د ایران دا خبرې د افغانستان د اوسنیو واقعیتونو درک دی.
د ایران د بهرنیو چارو وزیر ویلي وو، چې افغانستان کې پخوا هره برخه یې ډلې نیولې وه؛ خو اوس هغه حالت له منځه تللی.
د جنوبي پنجاب په دېره غازي کې پر پاکستاني پوځیانو برید شوی، چې درې پوځیان په کې وژل شوي.
سیمهییزو سرچینو ویلي، چې په دې پېښه کې یو شمېر پوځیان ټپیان شوي هم دي.
تر اوسه د پاکستان حکومت په رسمي ډول څه نه دي ویلی.
د یاد برید مسوولیت تحریک طالبان پاکستان ډلې په غاړه اخیستی.