د کورنیو چارو وزارت پخواني ویاند طارق ارین ویلي، په داسې حال کې چې افغانستان د پاکستان تر بمبارۍ او تېري لاندې دی او ملکي وګړي زیانمن شوي، د پخواني حکومت یو شمیر چارواکي لکه میرویس ناب او نصیر اندیشه د پاکستان استخباراتي ادارې سره پټې ناستې کړي دي.

د نوموړي په وینا، ټاکل شوې د مارچ میاشتې په ترڅ کې په لندن کې یوه غونډه ترسره شي چې ظاهراً ملي بڼه لري، خو زمینه‌سازي یې د ISI له لوري شوې ده.

ارین ټینګار کړی چې په جلاوطنۍ کې سیاسي ډلې او اشخاص باید له تېر څخه درس واخلي، ځکه پاکستان هېڅکله د افغانستان د سولې او ثبات لپاره رښتینې طرحه نه ده لرلې او نه به یې ولري.

هغه دغه ډول تګلارې د وطن پر وړاندې خیانت او استخباراتي پروژه بللې ده.

تازه خبر:
د طالبانو حکومت لخوا د “رد الظلم” په نوم د عملیاتو په لړ کې نن شپه پر پاکستاني پوځیانو د ډیورینډ پر فرضي کرښه سخته جګړه پیل شوې.

د راپورونو له مخې یاده جګړه دا مهال د کندهار په شورابک، سرو څاهانو او معروف، د زابل په شملوزو او د خوست په علیشیرو کې روانه ده.

د کندهار په شورابک کې د پاکستاني پوځیانو څلور پوستې او معروف کې دوه پوستې دا مهال د طالب ځواکونو لاس ته لویدلي.

‏تازه خبر:
‏د کندهار، معروف ولسوالۍ او د زابل په شملزو ولسوالۍ ځنځیر بازار ته څیرمه د کرښې په اوږدو کې په پاکستاني پوځیانو انتقامي بریدونه پیل شول.

د طالبانو حکومت استخباراتي چارواکی جابر نعماني وایې چې د پاکستان پوځي رژیم سره ښایي جګړه اوږده شي.

ښاغلی نعماني چې په ایکس پاڼه شیبه په شیبه د پاکستان د تیرې په اړه د خپلو ځواکونو د جګړې په اړه معلومات ورکوي وایي چې شورابک ته څیرمه څلور پاکستاني پوستې د طالب پوځیانو لاس ته لویدلي دي.

دغه استخباراتي چارواکي لیکلي، چې د پراخو انتقامي بریدونو په لړ کې چې ګړۍ وړاندي پیل شوي دي ګڼو پاکستاني ځواکونو ته مرګ ژوبله اوښتې.

د طالبانو حکومت مرستیال ویاند حمدالله فطرت ویلي، د پکتیکا ولایت په شکین، وازه‌خواه او تروو ولسوالیو کې د پاکستاني پوځ له لوري درانه توپونه او هاواني مرمۍ ویشتل شوې دي، چې له امله یې ملکي خلکو ته درانه مالي او ځاني زیانونه اوښتي دي.

د خبرياڼې له مخې، د شکین ولسوالۍ په مربوطاتو کې د روژه مات پر مهال د یوه ملکي وګړي پر کور د هاوان مرمۍ لګېدلې، چې په پایله کې یې د یوې کورنۍ پنځه غړي ټپیان شوي دي.

همداراز د تروو ولسوالۍ په اړوند سیمه کې د «غاټول» په نوم د یوه ملکي وګړي کور د ډي‌سي توپ په مرمۍ ویشتل شوی او په بشپړ ډول تخریب شوی دی.

په ورته وخت کې د برمل ولسوالۍ په بېلابېلو سیمو هم هاواني بریدونه شوي، چې د خلکو یو شمېر استوګنیز کورونه یې زیانمن کړي، خو د ځاني تلفاتو راپور نه دی ورکړل شوی.

د طالبانو حکومت مرستیال ویاند حمدالله فطرت وایي، د پاکستاني پوځي رژیم له لوري یو ځل بیا د افغانستان پر خاوره نه بښونکې جنایي او وحشیانه حمله ترسره شوې ده.

د نوموړي په وینا، نن سهار شاوخوا لس بجې د پاکستاني پوځ له لوري د کونړ ولایت د خاص کونړ ولسوالۍ په مربوطاتو کې د راستنېدونکو کډوالو پر یوه کمپ د (D-30) درنو توپونو مرمۍ توغول شوي.

د یاد برید په پایله کې درې ماشومان، چې عمرونه یې شاوخوا شپږ کاله ښودل شوي، وژل شوي او درې نور ټپیان دي.

د راپورونو له مخې، پر افغانستان د پاکستان د ړندو بمباریو بیعه عام ملکي وګړي پرې کوي چې ډېری قربانیان یې ښځې، ماشومان او سپین ږیري بلل شوي دي.

د امریکا ولسمشر ډونالډ ټرمپ له سي‌ان‌ان شبکې سره په خبرو کې ويلي چې د امريکا پوځ د ايران پر حکومت سخت ګوزارونه کوي؛ خو د هغه په وينا لا هم د بريدونو ستر او اصلي پړاو نه دی پيل شوی.

نوموړي د دې پوښتنې په ځواب کې چې ايا امريکا له پوځي بريدونو ور هاخوا هم د ايران له خلکو سره د مرستې لپاره کوم بل اقدام کوي څو د خپل هېواد واک بېرته ترلاسه کړي، وويل: «هو بېشکه همداسې ده؛ خو اوس مهال غواړو چې ټول خلک په کورونو کې پاتې شي، ځکه بهر خوندي نه دي.»

ټرمپ خبرداری ورکړی چې حالت به لا پسې ناامنه شي او ويې ويل: «موږ لا تر اوسه سخت بريدونه نه دي پيل کړي. ستره څپه لا نه ده راغلې، اصلي څپه ډېر ژر راروانه ده.»

د هند د دفاع وزير، راجنات سینګ د پاکستان پر ضد د خپل هېواد د وروستيو پوځي اقداماتو په تړاو چې «سندور عمليات» نومېږي، سخت خبرداری ورکړی دی.

نوموړي ويلي، که پاکستان يو ځل بيا د هند پر وړاندې خپل ناسم چلند ته دوام ورکړي؛ نو دا ځل به داسې ځواب ورکړل شي چې ټوله نړۍ به يې ننداره کوي.

دغه لوړپوړي هندي چارواکي د يوې وينا پر مهال ټينګار کړی چې سندور عمليات پای ته نه دي رسېدلي او زياته کړې يې ده چې که وضعيت بيا تکرار شي؛ نو دا ځل به هېڅ ډول بښنه او نرمي موجوده نه وي.

د اسرائیل او امریکا له لوري د ایران پر ضد د جګړې د دوام په درېیمه ورځ، نن هم په تهران کې د درنو چاودنو راپورونه ورکړل شوي دي.

تازه اسرائیلي چارواکو ویلي چې د ایران د ځمکنیو پټو قومندانيو مرکزونه یې په نښه کړي دي.

بل لور ته د ایران بریدونه هم پراخ شوي دي چې د سپاه پاسداران ویاند ویاند ادعا کړې چې د اسرائیل د لومړي وزیر دفتر یې هدف ګرځولی دی.

په همدې حال کې قطر اعلان کړی چې د ایران د بې‌پیلوټه الوتکو د بریدونو له امله یې د مایع طبیعي ګاز (LNG) تولید ځنډولی دی.

د امریکا د دفاع وزیر پیت هګست ویلي چې روان پوځي عملیات د ایران دننه د ډیموکراسۍ د ټینګښت لپاره نه دي.

هغه ویلي:«موږ جګړه نه ده پیل کړې؛ خو موږ به یې پای ته ورسوو.»

بل لورته د ایران د عالي امنیت شورا منشي، علي لاریجانی، ټینګار کړی چې ایران د امریکا برعکس ځان د یوې اوږدې جګړې لپاره چمتو کړی دی.

ایراني رسنیو راپور ورکړی چې د ایران د ولسمشر مسعود پزشکیان د حکم له مخې، سید مجید ابن‌الرضا د دغه هېواد د دفاع وزارت د سرپرست په توګه ټاکل شوی دی.

دا ټاکنه په داسې حال کې شوې چې د ایران پخوانی د دفاع وزیر عزیز نصیرزاده د امریکا او اسرائیلو په وروستیو بریدونو کې وژل شوی دی.

د راپورونو له مخې، نوی ټاکل شوی سرپرست به تر هغه وخته د دفاع وزارت چارې پر مخ وړي څو رسمي او دایمي وزیر وټاکل شي.