د طالبانو د بهرنیو چارو وزارت سرپرست امیرخان متقي ویلي، چې موږ هیله لرو چې له امریکا سره اړیکې په تدریجي ډول پراخې شي.

نوموړي دا څرګندونې الجزیره شبکې سره په تازه مرکه کې کړې دي.

متقي ویلي، که د افغانستان اوسني واقعیتونه د ناسمو تبلیغاتو پر ځای په پام کې ونیول شي، نو د اړیکو د ښه‌والي لپاره واقعي فرصت رامنځته کېدای شي.

هغه زیاته کړه چې نه غواړي د تېرو کلونو ترخې تجربې تکرار شي.

د نوموړي په وینا، عمومي عفوه اعلان شوې او اوس افغانستان د ټولو افغانانو ګډ کور دی، چیرته چې حکومت د خلکو استازیتوب کوي.

متقي دا هم ویلي، چې په هېواد کې کومه منظم اپوزیسیون یا مخالفه ډله نه شته.

نوموړي پر افغانستان لګول شوي بندیزونه ناعادلانه بللي او ټینګار یې کړی چې باید د قانوني سوداګرۍ او دوه اړخیزو همکاریو لپاره دا بندیزونه لرې شي.

د غور طالب چارواکي وايي، چې د عابدې په نوم مېرمن د اجباري واده له امله نه، بلکې له خاوند سره د څلور کلونو شخړو له امله ځان وژنه کړې.

دوی ویلي، کله چې د دوی دوسیه تر محکمې ورسېده، نو درې ګونو محکمو د کره شواهدو او اسنادو له ارزونې وروسته، خپله فیصله اعلان کړه، چې پکې د دې مېرمنې د خاوند په ګټه تمامه شوه، خو د دوی په وینا، دې مېرمنې د محکمې د حکم له تطبیق څخه لا مخکې ځان ته اور اچولی او مړه شوې ده.

په ورته وخت کې د طالبانو د امر بالمعروف وزارت وياند سيف خېبر ويلي، چې په غور کې عابدې د کورني تاوتریخوالي له امله ځان ته اور اچولی.

هغه زياته کړې، چې پېښه د طالبانو له غړو سره تړاو نه لري او دا موضوع د بهرنیو استخباراتو لخوا طالبانو پورې تړل شوې.

بل لورته د عابدې کليوالو بيا د پېښې پر مهال ويلي و، چې کورنۍ يې غوښتل هغه د طالبانو يو غړي ته په نکاح ورکړي او وروسته له هغه چې طالب جنګياليو د هغې د وړلو لپاره کور محاصره کړ؛ نو عابدې ځانته اور واچوه.

په فراه ولایت کې یو سړي د فقر او اقتصادي ستونزو له امله ځان وژنه کړې ده.

یو شمېر ځایي سرچینو رسنیو ته ویلي، چې د دې سړي نوم آغا صاحب و او هغه د غزني ولایت اوسیدونکی و.

سرچینې زیاتوي چې آغا صاحب د ژوند ستونزو سره مخ و او په پای کې یې خپل ژوند پای ته ورسولو.

د طالبانو حکومت تر اوسه په دې اړه څه نه دي ویلي.

د پاکستان د پلان جوړونې وزير احسن اقبال ويلي، چې هند نشي کولای له اندس د اوبو له تاريخي تړون څخه يو طرفه وتل اعلان کړي.

نوموړي دا څرګندونې په دوبۍ کې د پاکستان د قونسلګرۍ له‌خوا یوې جوړې شوې غونډې ته کړې.

هغه ويلي، نړيوال بانک د تړون تضمين کوونکی دی او د دې مسؤليت لري چې د تړون پلي کېدل يقيني کړي.

اقبال زياته کړې چې پاکستان به دیپلوماتيکې هڅې جاري وساتي او د اوبو پر حق به هېڅ ډول معامله ونه کړي.

نوموړي د هند وروستيو تحريکاتو ته په اشارې سره ويلي، که هند تېری وکړي؛ نو زيات تاوان به هم دوی وويني.

د هند حکومت اعلان کړی چې د پاکستان پر ټولو الوتنو یې د خپلې فضايي حريم دروازې تړلې دي.

دغه اقدام وروسته له هغه وشو چې په کشمير کې د سېلانيانو پر کاروان مرګونی برید وشو، چې له امله يې د هند او پاکستان ترمنځ کړکېچ بې‌سارې زیات شوی دی.

پاکستان ویلي، باور لري چې هند ښايي په نږدې ورځو کې نظامي برید وکړي او وايي د هر ډول مقابلې لپاره بشپړ چمتووالی لري.

په ورته وخت کې د امریکا د بهرنیو چارو وزیر مارکو روبیو د پاکستان له لومړي وزیر شهباز شریف او د هند د بهرنیو چارو وزیر جېشنکر سره د دواړو هېوادونو د کړکیچ پر کمېدو خبرې کړې.

ملګرو ملتونو خبرداری ورکړی چې افغانستان ته د بشري مرستو د بندېدو له امله به د مرستو بهير له سختو ستونزو سره مخ شي او د ميليونونو کسانو ژوند به خطر کې واچوي.

ملګرو ملتونو ويلي، دا مهال ۲۳ ميليونه افغانان مرستو ته اړتيا لري؛ خو د مالي سرچينو له کمښت سره يوازې نيمايي ته به رسېدنه وشي.

یاد سازمان همداراز ویلي، چې د بوديجې د کمښت له امله تر ۴۰۰ ډېر روغتيايي مرکزونه تړل شوي او درې ميليونه کسان له لومړنيو روغتيايي خدمتونو بې‌برخې شوي دي.

امريکا او اوکراين د چهارشنبې په ورځ د منرالونو يو مهم تړون لاسليک کړ، چې له اوږده ځنډ وروسته د دواړو هېوادونو ترمنځ د اقتصادي همکارۍ نوې ژمنتيا بلل کېږي.

د امريکا د خزانې وزير سکاټ بيسنټ ويلي، دا تړون د اوکراين د سولې او هوساينې لپاره د دواړو لوريو ژمنتيا څرګندوي.

بل لور ته اوکراين ويلي، د تړون له مخې به د خپلو نادره زېرمو بشپړ کنټرول وساتي، او دواړه هېوادونه به يو شريک د بيا رغونې صندوق جوړوي.

اوکراين دا تړون د اوږدمهاله پانګونې لپاره مهم ګام بللی دی.

د امریکا ولسمشر ډونالډ ټرمپ ويلي، امريکايي حضور به د ناوړه عناصرو مخه ونيسي.

د امريکا د بهرنيو چارو وزير مارکو روبيو له هند او پاکستان غوښتي چې د جمو او کشمير د وروستۍ ترهګريزې پېښې وروسته، د تاوتريخوالي د کمولو لپاره ګډ کار وکړي.

نوموړي د پاکستان له لومړي وزير شهباز شريف او د هند د بهرنيو چارو له وزير سبرامنیم جېشنکر سره جلا جلا ټليفوني خبرې کړې دي.

روبيو د اپرېل په ۲۲مه د پاهلګام بريد غندلی او له پاکستان يې د پلټنو په برخه کې د بشپړې همکارۍ غوښتنه کړې.

هغه دواړه هېوادونه هڅولي چې مستقيمې خبرې پيل کړي او د سولې لپاره ګډې هلې‌ځلې وکړي.

د پاکستان لومړي وزیر شهباز شريف د هند کړنې “پارونکي” بللي او ويلي يې دي چې پاکستان د ترهګرۍ پر ضد جګړه کې سترې قربانۍ ورکړي دي.

هغه د پېښې د نړېوالې، روڼې او بې‌طرفې پلټنې غوښتنه کړې او له امريکا يې غوښتي چې هند ته د مسؤلانه چلند مشوره ورکړي.

د پاکستان د بهرنیو چارو وزیر او د لومړي وزیر مرستیال اسحاق ډار ویلي، هند چې د پاهلګام برید پړه پرته له ثبوته پر پاکستان اچوي، غواړي له خپلو امنیتي ناکامیو او د کشمیر له مسلې پام واړوي.

اسحاق ډار د پوځ د ویاند او د بهرنیو چارو وزارت له ویاند سره یو ځای په یوه خبري ناسته کې ویلي، پاکستان د سیمې ثبات ته ژمن دی؛ خو د هر ډول برید په صورت کې به پرېکنده ځواب ورکړي.

ډار زیاته کړې چې د ترهګرۍ قرباني پاکستان دی او له همدې امله د ملکي وګړو وژنې غندنه کوي؛ خو هند باید د ثبوتونو پر بنسټ خبرې وکړي، نه د سیاست پر بنسټ.

نوموړي له نړیوالې ټولنې غوښتي چې د هند له خوا د اسلام‌ضد نفرت، دروغجنو تورونو، او د اوبو تړون د یو اړخیز لغوه کولو په څېر ګامونو ته باید جدي پام وکړي.

پاکستانۍ رسنۍ وایي، چې د پاکستان امنیتي ځواکونو او د هندي ځواکونو ترمنځ په سرحدي کیني او منډل سیمو کې نښتې شوي.

دوی وایي، دا بریدونه د اپرېل پر ۲۹ او ۳۰مه د شپې ترسره شوي.

د پاکستان پوځ ادعا کړې چې دغه نښتو کې یې د هند چکپترا پوسته هم له منځه وړې ده.

پاکستان وايي، پوځ یې د هېواد د دفاع لپاره چمتو دی، او هند دې له پاروونکو اقداماتو ډډه وکړي.