د ولسي جرګې پخوانی غړی عبدالظاهر قدیر، د متحده عربي اماراتو په دوبی ښار کې د امریکا د استخباراتي پولیسو له لوري نیول شوی دی.

دا خبر د هغه وراره جلال قدیر تأیید کړی او ویلي یې دي چې د ظاهر قدیر له لوري وروستی تماس د حمل ۲۶مه نېټه د دوبی له هوايي ډګره شوی و.

جلال قدیر وايي، له هغه وروسته د ظاهر قدیر ټولې اړیکې پرې شوې دي او تر اوسه نه دی معلوم چې نوموړی چیرې دی.

نوموړی زیاتوي: «خپل کاکا مو موږ ته هماغه شېبه خبر راکړ چې د امریکا استخباراتي پولیسو ونیوه، خو تر هغې وروسته له نوموړي سره هېڅ تماس نه دی شوی.»

د متحده عربي اماراتو حکومت تر دې دمه د نوموړي د نیول کېدو په اړه کوم رسمي دریځ یا اعلامیه نه ده خپره کړې.

د نړۍ د کاتولیک مذهب مشر پاپ فرانسس ومړ.

هغه نن پرځایي وخت اوه بجې د ژوند پور پرې کړ.

فرانسس، له تېرو دوو میاشتو راهیسې له سختې ناروغۍ کړېده، چې نن یې د ۸۸ کالو په عمر ساه ورکړه.

د طالبانو حکومت او قزاقستان هوکړه کړې چې د دواړو هېوادونو ترمنځ به د سوداګرۍ کچه درې میلیارده ډالرو ته لوړه شي.

دا هوکړه د طالبانو د صنعت او سوداګرۍ وزارت د سرپرست نورالدین عزیزي او د قزاقستان د اقتصاد وزیر ترمنځ لیدنه کې شوې ده.

په دې لیدنه کې نورالدین عزیزي ویلي، دواړه لوري دا ظرفیت لري، چې د سوداګرۍ دا کچه تر دې نوره هم لوړه کړي.

د اسراییل پوځ منلې چې تېره میاشت د رفح ښار ته نږدې په یوه برید کې د ۱۵ روغتیايي کارکوونکو وژل کېدل یوه مسلکي ناکامي وه.

یاد پوځ ویلي، د دې پېښې د پایلو له امله یو نظامي قومندان له دندې لرې کېږي.

اسراییلو ویلي، چې یاده پېښه د مارچ میاشتې په ۲۳مه نېټه رامنځته شوې وه.

د یادونې ده چې دغې پېښې د نړیوالو سخت غبرګونونه راپارولې وه.

د قزاقستان د لومړي وزیر مرستیال او د دغه هېواد د اقتصاد وزیر سیریک ژومانگارین نن په یو رسمي سفر کابل ته را ورسېد.

هغه د کابل هوايي ډګر کې ویلي، چې نن به د دواړو هېوادونو ترمنځ یو مهم اقتصادي تړون ترسره شي.

بل لورته بیا قزاقستاني رسنیو ویلي وو، چې نوموړی ښايي د طالبانو له چارواکو سره د کتنو ترڅنګ په قزاق ـ افغان نندارتون کې هم ګډون وکړي.

د امریکا ولسمشر هیله څرګنده کړې چې روسیه او اوکراین به روانه اوونۍ کې د جګړې د پای ته رسولو لپاره یوې هوکړې ته ورسېږي.

ولسمشر ډونالډ ټرمپ ویلي، چې د روسیې او اوکراین ترمنځ د سولې تر هوکړې وروسته به دواړه هېوادونه له امریکا سره د سترو سوداګریزو معاملاتو پیل وکړي.

ټرمپ د یکشنبې په ورځ، پر خپله ټولنیزه شبکه «تروت سوشیال» لیکلي، چې کییف او مسکو به له امریکا سره، چې دا مهال په اقتصادي پرمختګ کې ده، ستره سوداګري پیل کړي او ډېرې شتمنۍ به تر لاسه کړي.

د افغانستان لپاره د پاکستان ځانګړي استازي محمد صادق ویلي، چې پاکستان یو نوی مرکز پرانیستی، ترڅو له افغان کډوالو سره د ستونزو په ځانګړې توګه د پولیسو د ناوړه چلند په اړه مرستې وکړي.

نوموړي زیاته کړې، چې دغه مرکز به د “فډرال کنټرول خونې” په نوم ۲۴ ساعته او د اونۍ په هره ورځ فعال وي، څو د هغو افغان کډوالو شکایتونو ته رسیدنه وکړي، چې د خپل هېواد افغانستان ته د بېرته ستنېدو پر مهال د پاکستاني پولیسو له خوا له بد چلند سره مخ شوي وي.

محمد صادق څرګنده کړې، چې دا اقدام د پاکستان د لومړي وزیر د مرستیال او بهرنیو چارو وزیر اسحاق ډار کابل ته د وروستي سفر وروسته عملي شوی دی.

د طالبانو حکومت ویاند ذبیح‌الله مجاهد وایي، چې د مهاجرینو د ستونزو د حل لپاره د عالي کمېسیون بېلابېل کمیټې هره ورځ په دوامداره ډول فعالیت کوي، چې پکې د مهاجرینو ثبت، انتقال، د خدمتونو وړاندې کول او نقدي مرستو وېشل شامل دي.

نوموړي د ترسره شویو چارو په تړاو ویلي، چې پرون یکشنبه لږ تر لږه ۶۲۳ کورنۍ ثبت شوي، ۷۴۷ کورنۍ انتقال شوې او ۵۸۹ کورنۍ په موقتي ډول په کمپونو کې ځای پر ځای شوي دي.

د مجاهد په وینا، له شپږو میلیونو زیاتې افغانۍ هم یادو مهاجرینو ته د نقدي مرستو په توګه وېشل شوي دي.

د یادونې ده چې دا مرستې او اقدامات د طالبانو له خوا د هغو مهاجرینو د حالت د ښه‌والي لپاره ترسره کېږي، چې په دې وروستیو کې له ایران او پاکستان څخه راستنېږي.

د پښتون ژغورنې غورځنګ ډنمارک څانګې نن د دغه هېواد اغوس کې د افغان کډوالو د جبري اېستل کېدو په غبرګون کې لاریون کړی.

حماسه میډیا ته په رالېږل شویو معلوماتو کې ویل شوي، چې لاریون کوونکو له افغان کډوالو سره د پاکستان چلند غیر انساني او غیر اسلامي بللی.

د یادې څانګې مشر میرویس سالم وزیر ویلي، دوی شاهد دي چې پاکستان افغان کډوالو سره غیر انساني کړنې روانې کړي دي.

د یادونې ده چې روانه اوونۍ پشتون ژغورنې غورځنګ په ډېرو هېوادونو کې لاریونونه پیل کړي.

بریتانوي سیلاني تویوسي اوسېدین ویلي، چې افغانستان کې یې له یو طالب سره جنسي اړیکه ټینګه کړې.

بریټانوي رسنۍ ډیلي میل ویلي، چې ۳۰ کلن اوسېدن چې د پاکستان له لارې افغانستان ته راغلی وایي، یو هوټل کې له طالب امنیتي ساتونکي سره مخ شوی او بیا یې ترې غوښتي چې له ده سره ډوډۍ او فلم یوځای وګوري.

نوموړی ډیلي میل ته زیاته کړې، تر دې وروسته یې طالب ساتونکی ملګری شو، چې بیا یې جنسي اړیکه هم ټینګه کړه.

د هغه په خبره، طالبان رومانتیکه اړیکه او په ځانګړي ډول ښکلول ډېر خوښوي او دا طالب ښه پوهېده چې څه وکړي.

نوموړی وایي، هڅه یې کوله چې په دا ډول اړیکو کې محتاط اوسي.

هغه دا هم ویلي چې له تېرو دوو کلونو راهیسې یې ۶۹ هېوادونو ته سفر کړی، ویلي، هڅه کوي چې په هر هېواد کې ځانګړې تجربې ولري، حتی که هغه هېوادونه محدودیتونه ولري.

دغه ګرځندوی ویلي چې له امنیتي ستونزو، د طالبانو له پراخ شتون، او د خلکو له سخت وضعیت سره هم مخ شوی و، او حتی څو ځل یې دا احساس کړی چې شاید له دغه سفره ژوندی ونه وځي.