ایټالیا کې د اسرائیل پخواني سفیر درور ایدار د کاتولیک مشر پاپ فرانسس تورن کړی، چې د یهودو ضد سړی وو.
د هغه په خبره، نوموړي یوازې غزه کې د وژل شویو ماشومانو په اړه خبرې کولې؛ خو د دوی د وژل شویو ماشومانو په اړه یې هیڅ نه ویل.
درور ایدار ویلي، فرانسس په نړۍ کې د یهود ضد فکر تر ټولو لوی مسوول دی.
هغه د اسرائیل له حکومت غوښتي، چې د نوموړي د جنازې مراسمو کې ګډون ونه کړي.
د ایران د بهرینو چارو وزارت خبر ورکړی، چې عباس عراقچي نن په یو رسمي سفر چین ته ځي.
د یاد وزارت ویاند اسماعیل بقایي ویلي، چې نوموړی به په دې سفر کې له چینايي چارواکو سره د تهران او واشنګټڼ ترمنځ د اټومي پروګرام پر سر د خبرو په اړه سلا مشورې وکړي.
دا سفر داسې مهال کېږي، چې د ایران او امریکا ترمنځ دوه پړاوه خبرې پای ته رسېدلې او ټاکل شوې چې درېیم پړاو مذاکرات د شنبې په ورځ پیل شي.
د افغانستان لپاره د پاکستان ځانګړي استازي محمد صادق خان ویلي چې د پاکستان د لومړي وزیر مرستیال او د بهرنیو چارو وزیر اسحاق دار وروستۍ سفر کابل ته د افغانستان او پاکستان د ګډې سوداګرۍ او صنعتي خونې لهخوا تود هرکلی شوی دی.
نوموړي په خپل ایکسپاڼه لیکلي چې دغه خونه هیله څرګندوي چې د اسحاق ډار دا لیدنه وکولای شي د دواړو هېوادونو ترمنځ د کلیدي برخو لکه سوداګرۍ، ترانزیت، امنیت او د خلکو ترمنځ اړیکو په پیاوړتیا کې مرسته وکړي.
کابل ته د پاکستان د لومړي وزیر مرستیال او د بهرنیو چارو وزیر اسحق ډار له سفر وروسته کابل او اسلام آباد کې شمیر سرچینو حماسه میډیا ته وویل چې د طالبانو حکومت اقتصادي مرستیال ملا عبدالغني برادر له پاکستاني پلاوي سره له کتنې ډډه کړې.
پاکستاني خبریال حسن خان هم د خپلو سرچینو له قوله لیکلي چې د پاکستان د بهرنیو چارو وزیر اسحق ډار د ملاقاتونو په سکیجول کې د ملا عبدالغني برادر سره د کتنې وخت ټاکل شوی وو، خو نوموړي له پاکستاني لوري سره دغه کتنه رد کړې، او په یو ولایتي سفر وتلی دی.
حسن خان وایي، کله چې د ملا عبدالغني برادر له دفتر سره د ملاقات لپاره تماس نیول کیږي، په ځواب کې ویل کیږي« ملا صیب مصروف دی»
حسن خان نیوکه کړې چې اسحق ډار کوم عادي شخص نه بلکې د پاکستان د لومړي وزیر مرستیال او د بهرنیو چارو وزیر دی او دا ډول برخورد د پاکستاني لوري بی عزتي ده.
د جمهوري حکومت د چارو ادارې لوی رییس فضل محمود فضلي وايي، افغان ټولنه به د نجونو پر زدهکړو د بندیز دوام ونه مني.
د هغه په خبره، دا پرېکړه ولسي رېښه نه لري او افغاني ټولنې ته د منلو نه ده.
نوموړی زیاتوي، افغانانو هغه روایتونه منلي، چې له خپلې ټولنې یې راوتلي او هر وارد شوی فکر، چې ولسي بنسټ نه لري ماتېدونکی وي.
فضلي وايي، که ولس په ملي پروسو او تصمیم نیولو کې خپل رول ونه ویني؛ نو دغسې پروسې د ځان نه؛ بلکې پردۍ ګڼي، چې بیا یې د منلو پر ځای ردوي.
پخواني ولسمشر حامد کرزي د پاپ فرانسس د مړینې له کبله ژوره خواشیني ښودلې.
کرزي ویلي، چې د هغه نه ماتېدونکې تواضع، د ادیانو ترمنځ د همغږۍ لپاره ژمنتیا، او له مسلمانو ملتونو سره اړیکې به د نړۍ ګڼ خلک یاد ساتي.
د نوموړي په خبره، پاپ د شفقت او یووالي داسې مثال پرېښود چې نسلونه نسلونه به یې یاد ساتي.
د یادونې چې پاپ فرانسس نن د ۸۸ کالو په عمر ومړ.
د زیاتو غبرګونونو له کبله د کارنګي مؤسسې له لوري د اټومي سیاست په نړیوال کنفرانس کې د ایران د بهرنیو چارو د وزیر وینا لغوه شوې.
په ملګرو ملتونو کې د ایران استازولي د دغې وینا د لغوه کېدو خبر ورکړی.
بل لورته یادې مؤسسې ویلي چې د دوی اجنډا پر خپل ځای ده.
تر دې وړاندې د “ایران اټومي پروګرام پر وړاندې د یووالي سازمان” مدیر عراقچي ته د وینا وخت ورکول شرموونکي بللي وو.
هغه ویلي وو چې عباس عراقچي د یو تروریستي سازمان غړی دی.
نایروبي ټایمز راپور ورکړی، چې د افغانستان د پخواني حکومت د ولسي جرګې مرستیال حاجي ظاهر قدیر د امریکا په غوښتنه د کینیا پلازمېنې نایروبي کې نیول شوی.
کینیایي څارنوالانو د جمعې په ورځ امریکا ته د ظاهر قدیر د سپارلو موافقه کړې.
د دوی په خبره، ظاهر قدیر غوښتل ځان امریکا ته د سپارلو له قضیې بچ کړي.
پر هغه د نشهیي توکو او وسلو د قاچاق تور دی.
تر اوسه امریکایي چارواکو په دې اړه څه نه دي ویلي.
د قزاقستان راغلي پلاوي د طالبانو حکومت اقتصادي مرستیال ملا عبدالغني برادر سره تر کتنې وروسته د بهرنیو چارو سرپرست وزیر امیرخان متقي سره کتلي دي.
د یاد وزارت ویاند ضیاءاحمد تکل ویلي، چې په دې ناسته کې پر دوو اړخیزو سیاسي، اقتصادي اړیکو، ټرانزیټ او ټرانسپورټ خبرې شوې دي.
متقي له قزاقي لوري غوښتي، چې د اقتصادي پیاوړتیا لپاره دې افغان لوري ته ویزې زیاتې او دې برخه کې اسانتیا رامنځته کړي.
د سرچینې د معلوماتو له مخې، په دې لیدنه کې د قزاقستان د اقتصاد وزیر افغانستان یو نه بېلېدونکی شریک بللی دی.
د طالبانو حکومت د کرنې، اوبولګولو او مالدارۍ وزارت معین او په کابل کې د ایران د سفارت سرپرست علي رضا بیکدلي د کرنې او مالدارۍ په برخو کې د همکاریو د پراخېدو په هدف سره ولیدل.
د کرنې وزارت په خپره کړې خبرپاڼه کې راغلي چې د وزارت مرستیال صدراعظم عثماني په دې ناسته کې ویلي، د کوکنارو کښت د مخنیوي لپاره اړینه ده چې له ګاونډیو هېوادونو سره همغږي رامنځته شي، ترڅو افغان بزګرانو ته د عاید بدیل برابر شي او ګاونډي هېوادونه د نشهيي توکو له ناوړه اغېزو خوندي پاتې شي.
په دې لیدنه کې د ایران د سفارت سرپرست، عليرضا بیکدلي ویلي چې تهران لېواله دی له افغانستانه غوښه وارد کړي، او غواړي په کرنه او مالدارۍ کې له افغانستان سره همکاري پراخه کړي.
دغه لیدنه د دواړو هېوادونو ترمنځ د اقتصادي اړیکو د پراختیا په هدف ترسره شوې ده.