جمعه, اپریل 10, 2026
Home Blog Page 451

حامد کرزي؛د ترکیې له سفیر جنګ اونال سره کتلي

د افغانستان پخواني ولسمشر حامد کرزي د ترکیې له سفیر جنګ اونال سره کتلي.

ښاغلي کرزي پر خپله ایکس‌پاڼه د افغانستان له خلکو سره د ترکیې د دوامدارو همکاریو، په ځانګړي ډول افغان ځوانانو ته د تحصیلي بورسونو د ورکړې مننه کړې او دغه هېواد یې د افغانستان تاریخي او نږدې دوست بللی دی.

اشرف غني:د نظام مشروعیت له ماسره دی او مشروع نظام ته د واک انتقال کې مرسته کوم

د افغانستان پخواني ولسمشر اشرف غني یو ځل بیا ټینګار وکړ، چې د نظام مشروعیت د هغه سره دی او حاضر دی یو بل مشروع نظام ته یې سپاري.

پخواني ولسمشر غني چې د لوی اختر په مناسبت په یو غږیز پیغام کې خبرې کولې وویل:« په دې مبارکه ورځ چې ابراهیم ع د قربانۍ او ایثار مثال وړاندې کړ، مونږ هم باید دا سنت پرځای کړو، او د وطن آبادۍ او ښیرازۍ ته کار وکړو.»

پخواني ولسمشر غني په ټینګار سره وویل چې د افغانستان جغرافیوي موقعیت او منابع دغه هیواد سوکالۍ او آبادۍ ته رسولی شي؛ خو شرط یې ولسي او جمعې عقل پورې وتاړه.

ښاغلي غني یو ځل په غیر مستقیم ډول په طالبانو غږ وکړ، چې که ولسي مشروعیت او د خلکو ارادې ته مراجعه ونه کړي، لمنځه به لاړ شي.

پخوانی ولسمشر اشرف غني:د افغانستان د خپلواکۍ او سوکالۍ لپاره باید په ابراهیمي سنت عمل وکړو او د پرمختګ لپاره قربانۍ ورکړو

د افغانستان پخواني ولسمشر اشرف غني د لوي اختر په مناسبت په خپل پیغام کې ویلي چې افغانان له جدي او عمیق بحران سره مخ دی.

نوموړي ټینګار کړی چې بحثونو کې باید د یو بل له ملامتولو تیر شو او په یو ملي محور باید راټول شو.

پخواني ولسمشر په لویدیځې نړۍ نیوکه وکړه چې په سختو شرایطو کې افغانان له خپلو هیوادونو اخراجوي او د ژوند شرایط ورته سخت شوي دي.

ښاغلي غني له افغانانو وغوښتل چې لاسونه سره ورکړي او ټول باید د افغانستان د خپلواکۍ او آبادۍ لپاره ابراهیمي سنت پرځای کړي او له ځانځانې تیر شي، تر څو په ګډه د یوې ښې راتلونکې لپاره یو موټی شو.

سمیع سادات:د طالبانو مشر د پاکستان جاسوس او طاغوت دی

د متحدې جبهې مشر جنرال سمیع سادات په خپل اختریز پیغام کې ویلي، د طالبانو مشر ملا هبت‌الله د پاکستان استخباراتي ادارې «ای‌اېس‌ای» له لوري ټاکل شوی او د خلکو له قهره به بالاخره د تېښتې لاره نیسي.

هغه زیاتوي، هبت‌الله د واک پر مهال افغانستان له سخت اقتصادي بحران، بشري ناورین او سیاسي بې‌ثباتۍ سره مخ کړی.

سادات نوموړی «جاسوس» او «طاغوت» بللی او وایي، الله ظالمان نه خوښوي او حتمي به سزا ورکړي.

سادات د طالبانو حکومت په لوی درستیز فصیح‌الدین فطرت هم غږ کړی، چې له طالبانو جلا شي او د مخالفت جبهې سره یو ځای شي.

هغه وایي، طالبان که هر څومره فشارونه راوړي، رژیم یې بقاء نه لري.

کابل کې اختر نشته؛خو ګڼ طالب وزیران سعودي کې د اختر لومړۍ ورځ نمانځي او قرباني کوي

نن د طالبانو حکومت د کابینې یو شمېر غړو سعودي عربستان کې له دغه هېواد سره یو ځای اختر نمانځي.

د ټولنیزو رسنیو کاروونکي نیوکه کوي، چې ولې دوی له پاکستان سره یو ځای لوی اختر اعلان کړ.

دوی وایي، سره له دې، چې ټولو ولیدل، چې د عرفات ورځ تېره ورځ وه؛ خو بیاهم د طالبانو حکومت اختر وروسته اعلان کړ.

د دوی په خبره، د طالبانو حکومت یو شمېر چارواکي سعودي کې قرباني کوي؛ خو کندهاري چارواکي بیا اختر یوه ورځ وروسته نمانځي.

د یادونې ده، چې نن له پاکستان او افغانستان پرته د نړۍ ټولو اسلامي هېوادونو کې د لوی اختر لومړۍ ورځ ده.

سعودي عربستان او ګڼو هېوادونو کې؛نن د لوی اختر نمانځنه کېږي

نن په سعودي عربستان او یو شمېر نورو عربي هېوادونو کې لوی اختر یا د قربانۍ اختر په رسمي ډول نمانځل کېږي.

په دې مناسبت، میلیونه مسلمانان چې د حج د فریضې د ادا کولو لپاره سعودي ته تللي، نن سهار به له مزدلفې څخه منی ته ستانه شي، شیطان به په ډبرو وولي، د قربانۍ مراسم به ترسره کړي، کعبه شریفه کې به طواف وکړي، خپل سرونه به وخريي او احرام به خلاص کړي.

د سعودي عربستان د چارواکو په وینا، سږ کال له ۱.۶ مېلیونو څخه زیات حاجیان د نړۍ له ګوټ ګوټ څخه مکې ته ورغلي دي.

د حج اصلي رکن، چې د عرفات ورځ ده، د پنجشنبې په ورځ (د غبرګولي ۱۵مه) ترسره شو.

حاجیانو د عرفات په غونډۍ کې د جمعې او دعا مراسم ترسره کړل، چې پکې یې د مسلمانانو تر څنګ، د فلسطین د خلکو لپاره ځانګړې دعا وکړه.

سږکال د حج مراسمو کې؛له ۱.۶ میلیونو څخه زیاتو حاجیانو برخه اخیستې وه

سعودي عربستان وایي،سږکال د حج مراسمو کې له ۱.۶ میلیونه څخه زیاتو حاجیانو برخه اخیستې.

د حرمین، شریفین ادارې لیکلي، چې عرفات غونډۍ ته د دوی د ختلو مراسم په ښه ډول ترسره شول.

د یادونې ده، چې سبا له افغانستان او پاکستان پرته ټوله نړۍ کې د لوی اختر لومړۍ ورځ ده.

د بوش څېړنیز بنسټ:طالبانو په افراطیت سره نړیوال ګواښ جوړ کړی

د جورج ډبلیو بوش څېړنیز بنسټ د نړیوالو چارو مسؤله ناتالي ګونلا-پلاتس او ارشد غړې جسیکا لوډویګ په یوه مقاله کې لیکلي چې طالبان له افراطیت، فساد او زور زیاتي سره یو نړیوال ګواښ جوړ کړی دی.

دوی ویلي، هغو افغانانو چې د امریکا او نړیوالې ټولنې سره یې د سولې او پرمختګ لپاره همکاري کړې، اوس د طالبانو د انتقامي اقداماتو له خطر سره مخ دي.

په مقاله کې خبرداری ورکړل شوی چې که دغه افغانان بېرته واستول شي؛ نو د ازادۍ له لاسه ورکولو یا د مرګ له ګواښ سره به مخ شي.

لیکوالانو همداراز د امریکا د ځینو با نفوذه څېرو د بې‌پروایۍ په زیاتېدو اندېښنه ښودلې او ویلي یې دي چې دوی د طالبانو تر واک لاندې د افغانانو له ورځني کړاوه سترګې پټوي.

د رحیم سکندر جبري اعتراف؛طالب فعالانو په خپل حکومت توندې نیوکې کړي

د طالبانو د اصلاحي کمیسیون له لوري د دې ډلې د فعال رحیم سکندر تر نیول کیدو او جبري اعتراف وروسته د طالبانو ګڼو پلویانو د خپل حکومت دغه چاره غندلې او د خپلو ملګرو پر وړاندې یې بې اصافي بللې.

طالب پلوي ټولنیز فعال مسلم کندزي لیکلي، چې په دومره قربانیو له راغلي نظام سره داسې کوچني کارونه هیڅ خوند نه کوي او داسې چارې ټول نظام تر سوال لاندې راولي.

د فاتح کندز په نوم بل طالب فعال لیکلي:« مولوي سعيدالله صاحب!
په یوه عادي اشتباه د خپل فکر ملګري نېول، بندي کول او بیا جبراً اقرار په عامه ميډيا کې له نظام سره نه ښایي. هر څوک چې يې له قدرت څخه ناسمه استفاده مه کوه، که چيرې مجرم وي؛ نو جزا بايد محکمه ورکړي نه ته.»

په همدې حال کې بیا شریف خلیلي رحیم سکندر ته په خطاب کې ويلي:« یو وخت مې درته ویلي وو، چې د پاکستان خلاف څوک خبره نشي کولای.»

ورته مهال بیا سهیل نور ویلي، چې د رحیم سکندر ټیلیفون له طالبانو سره دی او هغوی هم ورنه په خپله خوښه پوسټونه کوي.

خبریال بلال سروري بیا وایي، چې پرون «جنرال» مبین پر پاکستان د نقد له کبله نیول شوی او نن بیا سکندر د دې له کبله نیول شوی، چې ویلي و، له هېواده بهر د جهاد د منع کېدو اعلان باید ونشي.

ځایي سرچینې:دره نور کې د ماین چاودنې له کبله درې طالبان وژل شوي

ځايي سرچینې وايي، چې د ننګرهار ولایت په دره‌نور ولسوالۍ کې د طالبانو په یو رنجر موټر موټر د سړک غاړې ماین چاودنه کړې، چې په پایله کې درې طالبان وژل شوي او یو بل ټپي شوی دی.

دا پېښه تېره ورځ د غبرګولي په ۱۵مه رامنځته شوې.

تر اوسه هېڅ کومې ډلې د دې برید مسئولیت نه دی منلی.

د طالبانو حکومت هم تر اوسه په دې اړه څه نه دي ویلي.