مشهوره افغانه سندرغاړې، زلاله هاشمي شاوخوا ۱۵ ورځې مخکې په کابل کې تښتول شوې ده.
د هغې مېړه، سید محسن هاشمي، رسنیو ته ویلي چې تر اوسه د هغې په اړه هېڅ معلومات نه لري، او د موندلو هڅې یې لاهم بې نتیجې دي.
زلاله د خپلو ملګرو د لیدو لپاره له کوره وتلې وه؛ خو له هغه وروسته بېدرکه شوې ده.
زلاله یو ۴ کلن زوی لري چې د کورنۍ په وینا، روغتیايي وضعیت یې ښه نه دی.
د روسیې د بهرنیو چارو وزارت ویاندې، ماریا زاخارووا ویلي چې مسکو دا مهال د طالبانو حکومت د نوي سفیر د راتګ انتظار باسي.
نوموړې له سپوټنیک خبري اژانس سره په مرکه کې زیاته کړې، چې د افغانستان د طالبانو حکومت د رسميت پېژندنې په اړه به پرېکړه د روسیې د مشرتابه له لوري په مناسب وخت کې وشي.
هغې ویلي، چې دوی د طالبانو حکومت سره همکارۍ ته ژمن دي.
د طالبانو حکومت د رییسالوزرا اداري مرستیال، مولوي عبدالسلام حنفي، د چین – سویلي اسیا نهم نړیوال نندارتون ته په وینا کې ویلي چې “اسلامي امارت” له چین او د سیمې له نورو هېوادونو سره د کانونو، انرژۍ، ټرانزیټ، ټکنالوژۍ او سوداګرۍ په برخو کې د همکارۍ اراده لري.
هغه ټینګار کړی چې افغان خاوره به د هیڅ هېواد پر ضد نه کارېږي، او “اسلامي امارت” نه یوازې له نورو هېوادونو سره د نه لاسوهنې سیاست لري، بلکې له هغوی هم ورته تمه لري.
حنفي دغه نندارتون د سیمهییزو هېوادونو ترمنځ د اقتصادي، سیاسي او فرهنګي اړیکو د پیاوړتیا یو ښه فرصت بللی دی.
د استرالیا د بهرنیو چارو وزارت اعلان کړی چې د ایران د امنیتي وضعیت د خرابوالي له امله یې خپل سفارت په تهران کې تړلی دی.
د دغه هېواد د بهرنیو چارو وزیرې، پني وُنګ، ویلي چې ټولو استرالیایي دیپلوماتانو او د هغوی کورنیو ته د ایران د پرېښودو امر شوی دی.
نوموړې زیاته کړې چې قونسلي کارکوونکي یې آذربایجان او د ایران پولې ته استول شوي، څو له استرالیایي وګړو سره د وتلو پر مهال مرسته وکړي.
د استرالیا سفیر ایان مککانویل به لا هم په سیمه کې پاتې وي.
د امریکا ولسمشر ډونالډ ټرمپ د پاکستان د پوځ له مشر جنرال عاصم منیر سره په سپینه ماڼۍ کې لیدلي او له هغه یې مننه کړې چې له هند سره یې د جګړې مخه نیولې ده.
ټرمپ دا مننه یوه ورځ مخکې، د هند له لومړي وزیر نرېندرا مودي سره د ټیلیفوني خبرو پر مهال هم کړې وه.
د رویټرز د راپور له مخې، دا لومړی ځل دی چې یو امریکایي ولسمشر په سپینه ماڼۍ کې د پاکستان د پوځ د یوه مشر کوربهتوب کوي.
په دې لیدنه کې د ایران پر وضعیت هم خبرې شوې دي.
د حزب اسلامي مشر ګلبدین حکمتیار وایي، که امریکا د اسرائیل د ملاتړ لپاره له ایران سره جګړه وکړي او بریا خپله نه کړي؛ نو د شوروي په څېر به له ړنګېدو سره مخ شي.
هغه د سوریې دریځ ستایلی او ویلې یې دي چې دمشق پر ایران د برید لپاره نه خپله خاوره او نه خپله فضا کارېدلو ته پرېږدي.
حکمتیار خبرداری ورکړی چې که اسرائیل له ایران سره په جګړه کې بریالی شي؛ نو پاکستان، ترکیه او سوریه به یې راتلونکي هدفونه وي.
هغه رضا پهلوی هم غندلی او تور یې پرې لګولی چې غواړي امریکا او اسرائیل ته زمینه برابر کړي څو ایران ویجاړ کړي او خلک یې ووژني.
د امریکا ولسمشر ډونالډ ټرمپ ویلي، تر اوسه یې دا پرېکړه نه ده کړې چې له اسراییل سره د ایران پر ضد ودریږي که نه.
هغه زیاتوي، «ښایي دا کار وکړم، ښایي نه. څوک نه پوهیږي چې زه به څه وکړم.»
ټرمپ دا څرګندونې د خبریالانو پوښتنو ته په ځواب کې وکړې او ویې ویل چې هېڅوک د هغه راتلونکی ګام نه شي اټکل کولای.
نوموړي همداراز وویل چې ایراني چارواکو یو وخت غوښتل له امریکا سره خبرې وکړي او واشنګټن ته راشي؛ خو دا چانس یې له لاسه ورکړی او اوس دا هڅې ناوخته ګڼي.
له بلې خوا، ایران تر اوسه د ټرمپ د خبرو په اړه غبرګون نه دی ښودلی؛ خو راپورونه وایي، هغه خبرې چې ټاکل شوې وه د ایران او امریکا ترمنځ د عمان په کوربتوب تر سره شي، د ایران او اسراییل ترمنځ د شخړې له امله لغوه شوې دي.
د طالبانو حکومت د بهرنیو چارو وزارت سرپرست امیرخان متقي ویلي، چې افغانستان د ایراني حاجیانو لپاره د یوې میاشتې د ویزو معافیت په پام کې نیولی او په هرات کې یې سیمه ییزو ادارو ته سپارښتنه کړې چې ایران ته د دغو حاجیانو د خوندي لیږد اسانتیاوې برابرې کړي.
نوموړي ویلي، چې دا پرېکړه د طالبانو حکومت د رئیس الوزرا د هدایت پر اساس شوې.
متقي د ایران له سفیر علي رضا بېکدلي سره په کتنه کې یو ځل بیا پر ایران د اسراییل بریدونه غندلي او هغه یې له نړۍواله قوانینو ښکاره سرغړونه بللې ده.
د اسراییل دفاع وزیر یسرائیل کاتز ویلي، د علي خامنهیي په نوم باید نور هیڅوک شتون ونلري.
نوموړي خامنهیي یو دیکتاتور شخص بللی او ویلي یې دي چې خامنهیي ته به نور د ژوند کولو حق ورنکړي.
د یادونې ده چې کاتز تر دې وړاندې هم ویلي و چې د ایران خلک به له دغې دیکتاتور رهبر څخه خلاص کړي تر څو سیمه او هېواد یې یو نوی پړاو پیل کړي.
د اسرائیلو د دفاع وزیر، یسرائیل کاتز، د ایران له خوا د اسرائیلو پر روغتون او د استوګنې پر سیمو د توغندیز برید په غبرګون کې ویلي، چې ما او لومړي وزیر بنیامین نتنیاهو پوځ ته امر کړی چې د ایران پر ستراتیژیکو هدفونو او د تهران پر حکومتي مرکزونو بریدونه شدید کړي، څو د “آیتالله خامنهیي” د رژیم ګواښ له منځه ولاړ شي.
کاتز دا بریدونه د جګړې تر ټولو ستر جنایتونه وبلل او ټینګار یې وکړ چې خامنهیي باید د خپلو جنایاتو حساب ورکړي.
هغه خامنهیي یو وېرېدلی دیکتاتور وباله، چې د خوندي پټنځایونو له دننه نه په قصدي توګه روغتونونه او ملکي ودانۍ په نښه کوي.