د طالبانو حکومت تر واک لاندې د برېښنا شرکت اعلان کړی چې د اوزبېکستان د انرژۍ وزیر جورابیک میرزا محمدوف او د افغانستان لپاره د دغه هېواد ځانګړی استازی عصمتالله ایرګاشیف کابل ته په رسمي سفر راغلي دي.
دوی د امارتي شرکتونو د رییس احمدجان بلال او د برېښنا شرکت د عمومي اجرائیوي رییس عبدالباري عمر سره لیدلي دي.
په نږدې شیبو کې تمه ده چې د افغانستان برېښنا شرکت او د اوزبېکستان استازي د څلورو مهمو پروژو تړونونه لاسلیک کړي.
د خیبر پښتونخوا په کوهاټ ولسوالۍ کې اووه تنه د نامعلومو وسلهوالو لخوا په ډزو وژل شوي دي.
پولیس وايي، وژل شوي کسان چې عمرونه یې له ۱۷ تر ۳۱ کلونو پورې ښودل شوي، د ټنډه بند له لیدو را ستنېدل، چې ناڅاپه پرې وسلهوالو ډزې وکړې.
تر اوسه کومې ډلې د پېښې مسوولیت نه دی منلی.
د پاکستان حکومت هم د وژل شویو کسانو هویت نه دی څرګند کړی.
پخواني ولسمشر حامد کرزي په پښتونخوا او ګلګت کې د سیلابونو له امله خلکو ته په اوښتې مرګژوبلې خواشیني ښودلې.
کرزي ویلي، چې دی د پېښې د قربانیانو له کورنیو سره د تسلیت مراتب شریکوي.
د یادونې ده، چې هلته د وروستیو سیلابونو له امله تر ۳۵۰ ډېر کسان ووژل شول او ګڼ شمېر نو ټپیان شول.
د امریکا ولسمشر ډونالډ ټرمپ ویلي چې اوکراین باید د جګړې د پای ته رسېدو لپاره له روسیې سره هوکړې ته ورسېږي، ځکه په وینا یې «روسیه ستر ځواک دی؛ خو اوکراین داسې نه دی.»
د رویټرز د راپور له مخې، دغه څرګندونې هغه مهال وشوې چې ټرمپ په الاسکای کې د روسیې له ولسمشر ولادیمیر پوتین سره ولیدل.
رویټرز وایي، پوتین د اوکراین د لا نورو سیمو غوښتنه کړې او ټرمپ د هغه غوښتنې د اوکراین ولسمشر ولادیمیر زېلېنسکي ته هم رسولي دي.
ویل شوي پوتین ټوله ډونېتسک سیمه غواړي او غواړي چې زېلېنسکي یې ومني.
د رویټرز د راپور له مخې، د اسرایيلو پوځ د غزې د شمالي برخې د تخلیې لپاره چمتووالی نیسي.
چارواکو اعلان کړی چې له نن یکشنبې څخه به د سیمې اوسېدونکو ته خېمې او د لنډمهالي مېشتېدو نور وسایل ورکړي او د غزې سویل ته به یې انتقال پیل کړي.
غزه چې نږدې ۲.۲ میلیونه وګړي لري، د اسرایيلو په خبره د دې لپاره خالي کېږي چې ولسي وګړي خوندي پاتې شي.
په ورته وخت کې د اسرایيلو لومړي وزیر بنیامین نتنیاهو د ټولې غزې د نیولو او لاندې کولو پلان هم پر مخ وړي.
د طالبانو حکومت د کار او ټولنیزو چارو وزارت اعلان کړی چې د ۱۴۰۴ لمریز کال د زمري ۲۸مه، د سې شنبې په ورځ د هېواد د خپلواکۍ د بېرته ترلاسه کولو د ورځې په مناسبت، په ټول هېواد کې عمومي رخصتي ده.
یاد وزارت په یوه خپره شوې خبرپاڼه کې لیکلي چې دا ورځ د انګریزانو د ښکېلاک پای او د خپلواکۍ د ۱۰۶مې پرتمینې کلیزې سره برابره ده.
د ولسي جرګې پخوانۍ غړې، فوزیه کوفي په پاکستان کې د طالبانو د مخالفو سیاستوالو د ناستې جوړېدل یو مثبت ګام بللی دی.
نوموړې وايي که د سیمې هېوادونه د داسې خبرو زمینه برابروي، باید د خلکو ترمنځ د باور جوړولو لپاره یې هرکلی وشي.
ټاکل شوې دا غونډه د اګست په ۲۵ او ۲۶ وشي چې پکې د ښځو ډلې او د سیاسي ـ مدني ټولنې استازي د افغانستان د راتلونکي او د ښځو پر وضعیت بحث وکړي.
د افغان سولې لپاره د امریکا پخواني ځانګړي استازي زلمي خلیلزاد که څه هم د دې ناستې د ترسره کېدو خبر تایید کړی؛ خو د پاکستان کوربهتوب یې ناسم کار بللی او خبرداری یې ورکړی چې ځینې ګډونوال د طالبانو حکومت د پرځولو ټینګار لري.
په پاکستان کې د ولسمشر اصف علي زرداري د احتمالي استعفا او د پوځ مشر عاصم منیر د ولسمشر کېدو په اړه وروستۍ اوازې د پوځ مشر پخپله رد کړې دي.
عاصم منیر دا ګنګوسې “توطیه” بللې او ویلي یې دي چې دا د حکومت او چارواکو د مخالفو ډلو کار دی.
هغه په بروکسل کې ویلي: «زه د هېواد د ساتنې لپاره جوړ شوی یم، هېڅ بل مقام نه غواړم، ستره هیله مې شهادت دی.»
منیر ویلي، سیاسي پخلاینه یوازې د رښتینې بښنې په صورت کې ممکنه ده، چې ګومان کېږي اشاره یې د تحریک انصاف بنسټګر عمران خان ته وه.
نوموړي همداراز ډاډ ورکړی چې پاکستان به د امریکا او چین په اړیکو کې توازن وساتي، هند ته یې د نیابتي جګړې د هڅو په اړه خبرداری ورکړی او د طالبانو حکومت ته یې ویلي چې پاکستاني طالبان دې دغه هېواد ته نه اړوي.
د یادونې ده چې د طالبانو حکومت بیا تل ټینګار کړی چې د پاکستاني طالبانو موضوع د پاکستان کورنۍ ستونزه ده.
د فرانس پرېس خبري اژانس ویلي، چې په افغانستان کې د وچکالۍ او ناڅاپي سېلابونو له امله د خلکو د بېځایه کېدو کچه لوړه شوې ده.
د ملګرو ملتونو د معلوماتو له مخې، یوازې د روان کال له پیل راهیسې تر پنځه میلیونه زیات افغانان د اقلیم د بدلونونو له امله اغېزمن شوي او شاوخوا ۴۰۰ زره کسان بېکوره شوي دي.
راپور زیاتوي چې ډېری افغانان په خټو کورونو کې ژوند کوي او د کرهڼې او مالدارۍ له لارې ځانونه ساتي چې دې وضعیت یې د طبیعي پېښو پر وړاندې ډېر زیانمن کړي دي.
بل لورته د طالبانو حکومت د اوبو د مدیریت ځینې پروژې اعلان کړي، خو د وچکالۍ د حل لار یې د خداي اراده بللې ده.
یو لوړپوړی لویدیځ ډیپلومات وایي چې د طالبانو حکومت د کورنیو چارو وزیر سراجالدین حقاني له شیخ هبتالله اخندزاده څخه د لنډ مهال واټن اخیستو سره ستر سیاسي تاوان وکړ او دې کار د طالبانو د یو اړخ موقف ته صدمه ورسوله.
دغه دیپلومات د نوم نه اخیستو په شرط ویلي، حقاني ګومان کاوه چې له هبتالله اخندزاده څخه واټن نیول به د نړیوال ملاتړ لامل شي؛ خو نړۍ هېڅکله هغه ډلې ته ملاتړ نه ورکوي چې له القاعدې سره اړیکې ولري.
دی زیاتوي، حقاني د طالبانو حکومت له رهبر سره دوه میاشتې اړیکې پرې کړې؛ خو په دغه موده کې هبتالله اخندزاده د هغه پوښتنه ونه کړه او کله چې حقاني بېرته د اړیکې هڅه وکړه؛ نو د واک ډېره برخه یې له لاسه ورکړې وه.
ډیپلومات وايي، د حقاني نږدې کسانو ورته ویلي چې هغه باید یا له هبتالله سره نږدې پاتې شوی وای، یا یې باید د مخالفت لړۍ پر مخ بیولې وای.
نوموړي ویلي، چې ابراهیم صدر، چې د داخله وزارت مرستیال او د اخندزاده نږدې کس ګڼل کېږي، د حقاني د نهشتون پر مهال ټول واک تر لاسه کړی او نور هم پیاوړی شوی.
راپور زیاتوي، صدر له حقاني غوښتي چې د خپلو دفترونو شتمنۍ او نغدې پیسې د طالبانو حکومت ادارې سره ثبت کړي.
دا ډیپلومات ټینګار کوي چې حقاني باید له القاعده او تحریک طالبان پاکستان سره اړیکې پرې کړي.