د آلمان صدراعظم فریدریش مرتس اعلان کړی چې هېواد به یې د هغو سوریایي پناه اخیستونکو د اخراج بهیر چټک کړي چې جرمونه یې کړي دي.

نوموړي ویلي، حکومت یې د دې پلان عملي کولو ته ژمن دی او دا پالیسي به په مشخص ډول پر مخ یوسي.

مرتس، چې د سوریې موقتي ولسمشر احمد الشرع ته د برلین د سفر بلنه ورکړې، ټینګار کړی چې د سوریې جګړه پای ته رسېدلې او نور د پناه اخیستنې لپاره دلیلونه ختم شوي.

د ده په وینا، آلمان غواړي د سوریې د ثبات په بهیر کې رول ولوبوي.

د راپورونو له مخې، د سوریې ولسمشر به روانه میاشت واشنګټن ته سفر وکړي.

د پاکستان د پوځ ویاند احمد شریف چوهدري وايي چې د طالبانو له لوري د امنیتي همکاریو لپاره وړاندې شوي شرطونه هېڅ اهمیت نه لري او اسلام‌اباد یوازې د ترهګرۍ پر له‌منځه وړلو تمرکز کوي.

هغه د طالبانو حکومت ته خبرداری ورکړی چې باید د ټي‌ټي‌پي او نورو ډلو فعالیتونه مهار کړي او هغه بریدګر چې افغانستان ته تښتېدلي پاکستان ته وسپاري.

چوهدري ادعا کړې چې د طالبانو حکومت ځینې کسان د پاکستان پر ضد بریدونو کې ښکېل دي او د نشه‌يي توکو کارونو له لارې وسله‌والو ته لوی عاید ترلاسه کېږي.

هغه ویلي چې که څه هم د قطر او ترکیې په منځګړیتوب لنډمهاله اوربند شوی، خو پاکستان د طالبانو پر تعهد شک لري او پوځي عملیات به روان وي.

د حزب اسلامي ګوند مشر ګلبدین حکمتیار د شمالي ولایتونو د وروستۍ زلزلې د قربانیانو له کورنیو سره د خواخوږۍ او تسلیت مراتب وړاندې کړي.

حکمتیار په خپل پیغام کې د زیانمنو کورنیو ته د روغتیا دعا کړې او هغوی سره یې خواشیني څرګنده کړې.

هغه له شتمنو افغانانو او حکومتي ادارو غوښتي، چې د خپلو مرستو او همکارۍ له لارې د مصیبت‌ځپلو خلکو دردونه او ستونزې راکمې کړي.

د قطر د بهرنیو چارو وزارت د یوې اعلامیې له لارې د “افغانستان” طالبانو له حکومت او ولس سره د شمالي ولایتونو د زلزلې له امله خواخوږي څرګنده کړې ده.

په اعلامیه کې د قربانیانو کورنیو ته د تسلیت او د ټپیانو د ژر روغېدو هیله څرګنده شوې ده.

د اسراییل لومړي وزیر بنیامین نتانیاهو ویلي، هېواد یې د داسې لوی پوځ اړتیا لري چې د زېرمې ځواکونه یې بنسټ جوړ کړي.

نوموړي دا څرګندونې د پوځ د زېرمې له لوړپوړو افسرانو سره په ګډه ناسته کې کړي او ویلي یې دي چې، د حماس له یرغل وروسته په تېرو دوو کلونو کې په څو جبهاتو کې د ځمکنۍ جګړې مسؤلیت تر ډېره د همدې زېرمې ځواکونو پر غاړه و.

نتانیاهو ویلي، اسراییل د سیمې په بدلون سربېره، خپله بڼه هم بدله کړې ده.

د ده په وینا، اوس نور د مهار سیاست پای ته رسېدلی او د تلپاتې نوښت او اقدام مرحله پیل شوې ده.

هغه د زېرمې ځواکونو مېړانه ستایلې او ویلي یې دي: “تاسو یو ځل بیا د دښمن له اټکل سره برعکس ډګر ته حاضر شوئ. هغوی تېروتنه وکړه — نه یوازې زموږ په اړه، بلکې ستاسو په اړه هم.”

پخواني ولسمشر محمد اشرف غني د شمالي ولایتونو بلخ او سمنګان د زلزله‌ځپلو له کورنیو سره خپله ژوره خواخوږي څرګنده کړې ده.

ښاغلي غني د هغو افغانانو ستاینه کړې چې د هېواد له دننه او بهر د زلزله‌ځپلو سره مرستې کوي، او دا یې د افغانانو د یووالي او انساني احساس څرګندونه بللې ده.

هغه د ملګرو ملتونو په ګډون له نړیوالو ادارو غوښتي چې د افغانانو په نوم ترلاسه شوې مرستو کې د شفافیت نشتوالی پای ته ورسوي او د لګښتونو څرنګوالی روښانه کړي.

نوموړي زیاته کړې، افغانستان اوس د منځنۍ آسیا له هېوادونو سره د پراخو اقتصادي اړیکو له امله له پخوا ډېر پر ځان بسیا شوی دی.

پخواني ولسمشر ټینګار کړی چې د حیرتانو او آقینې بندرونو د عوایدو او لګښتونو شفاف رپوټونه دې له ولس سره شریک شي، څو خلک د خپلو ملي سرچینو د مصرف په اړه باخبره شي.

د امريکا ولسمشر ډونالډ ټرمپ په تازه څرګندونو کې ويلي، چې پاکستان په وروستيو کې د اټومي وسلو ازموينه کړې ده.

نوموړي دا څرګندونې له CBS ټلوېزيون سره په ځانګړې مرکه کې کړي.

د ټرمپ په وينا، دغه ازموينه په پټه ترسره شوې ده او دقيق ځای یې نه شي افشا کولی.

هغه زياته کړې: «پاکستان دا ازموينه داسې ځای کې کړې، چې ډېرو خلکو ته معلومه نه ده. يوازې ځينې ټکانونه احساس شوي، خو نړۍ پرې نه ده خبره.»

نوموړي همدارنګه ویلي، چې چين، روسيه او شمالي کوريا هم وروستيو مياشتو کې د اټومي وسلو ازموينې ترسره کړې دي.

د هند د بهرنیو چارو وزیر جی شنکر د طالبانو حکومت د بهرنیو چارو له سرپرست وزیر مولوي امیر خان متقي سره د شمالي ولایتونو ‎بلخ، ‎سمنگان او ‎بغلان د زلزلې د قربانیانو د مړینې او زیانونو په اړه د خواخوږۍ او همدردۍ څرګندولو لپاره ټلیفوني اړیکه نیولې ده.

جی شنکر په خپله ایکس‌پاڼه ویلي، چې هند له زلزله‌ځپلو سره د بیړنیو مرستو په لېږلو بوخت دی، او د مرستو لومړۍ بسته نن افغان چارواکو ته سپارل شوې ده.

نوموړي زیاته کړې چې د درملو او نورو ضروري توکو بله برخه به هم ډېر ژر افغانستان ته ورسېږي.

د دواړو لورو ترمنځ د خبرو پر مهال، د هند او افغانستان د دوه اړخیزو اړیکو د پرمختګ، د خلکو ترمنځ د اړیکو د زیاتوالي او د سیمې د روان وضعیت په اړه هم مفصل بحث شوی دی.

د هند د بهرنیو چارو وزیر د متقابل تفاهم او سیمه‌یز ثبات د ټینګېدو هرکلی کړی دی.

د مصالحې شورا پخواني مشر ډاکتر عبدالله عبدالله د افغانستان په شمالي ولایتونو کې د وروستۍ زلزلې له امله د زیانمنو شویو کورنیو سره خپله ژوره خواخوږي څرګنده کړې ده.

ډاکټر عبدالله ویلي:«موږ ځان د شهیدانو له کورنیو سره په غم کې شریک بولو او د ټپیانو د عاجلې روغ‌تیا هیله کوو.»

هغه له مرستندویو بنسټونو، ملي سوداګرو او شتمنو هېوادوالو غوښتي چې ژر تر ژره د زلزله‌ځپلو د مرستې لپاره عملي ګامونه واخلي او د خپلو هېوادوالو د ژوند د ژغورلو او ملاتړ په برخه کې خپل انساني مسؤولیت ادا کړي.

د ایران د بهرنیو چارو وزارت ویاند اسماعیل بقایي وايي، تهران د اوبو په اړه د طالبان حکومت له چلنده راضي نه دی او چارواکو یې د هلمند د اوبو تړون د عملي کولو غوښتنه کړې.

نوموړي په تهران کې د خبري ناستې پر مهال وویل چې د هریرود د حقابې لیکلې هوکړه نه‌شته؛ خو د نړیوالو قوانینو له مخې برلاس هېواد د پوره تعهداتو مسوولیت لري.

بقایي زیاته کړې چې سلما بند تازه اوبه خوشې کړي او هیله یې څرګنده کړه چې دا کار د «دوستۍ بند» لامل شي.

د ده په وینا، د ایران د بهرنیو چارو وزارت د مرستیال غریب ابادي وروستي سفر کې د اوبو موضوع د بحث مهمه برخه وه.